Low Back Pain လို့ခေါ်တဲ့ နောက်ကျော နာကျင်ခြင်း ဝေဒနာဟာ အသက်အရွယ်မရွေး ကြုံတွေ့ရနိုင်တဲ့ အခြေအနေတစ်ခု ဖြစ်ပါတယ်။ များသောအားဖြင့် အထိုင်များသူတွေမှာ နောက်ကျောနာကျင်ခြင်း ဝေဒနာအများဆုံး ခံစားရတက်ပြီး တစ်ခါတစ်ရံမှာ အိပ်စက်မှုပုံစံ မှားယွင်းတာ ၊ အလေးအပင် မ, မိတာ ၊ အားကစား အပြင်းအထန်လုပ်မိတာ စတဲ့ အခြေအနေ အကြောင်းကြောင်းကြောင့်လည်း ဖြစ်တက်ပါတယ်။ နောက်ကျော နာကျင်ခြင်း ဝေဒနာဟာ ပုံမှန် ၃ ရက်ကနေ ၇ ရက်အတွင်း သက်သာသွားတက်ပေမယ့် ပြင်းထန်ရင်တော့ လနဲ့ချီပြီး ကြာတက်ပါတယ်။ အကောင်းဆုံးကတော့ ဆရာဝန်လမ်းညွှန်ချက်နဲ့အညီ ကျန်းမာရေးစစ်ဆေး ကုသမှုခံယူတာ ၊ လေ့ကျင့်ခန်းလုပ်တာ စတဲ့နည်းလမ်းတွေနဲ့ နောက်ကျောနာခြင်းကို သက်သောအောင် ကုသလို့ ရပါတယ်။ အခုပြောပြမယ့် လွယ်ကူရိုးရှင်းတဲ့ နေ့စဉ် အလေ့အထ လေးတွေကို ပြုလုပ်မယ်ဆိုရင်လည်း နောက်ကျော နာကျင်ခြင်း ကို အထိုက်အလျှောက် သက်သာစေမှာပဲ ဖြစ်ပါတယ်။
(၁) အပေါ့စား လှုပ်ရှားမှုတွေနဲ့ နေ့တစ်နေ့ကို စတင်ပါ
Photo : The Art of Manliness
မနက်ခင်း အိပ်ရာနိုးချိန်မှာ ပေါ့ပေါ့ပါးပါး ပြုလုပ်နိုင်တဲ့ ကိုယ်လက်လှုပ်ရှားမှုလေးတွေနဲ့ စတင်တာဟာ ပင်ပန်းနွမ်းနယ်နေတဲ့ ကြွက်သားတွေနဲ့ အကြောအဆစ်တွေကို နိုးထစေဖို့ ကူညီပေးနိုင်ပါတယ်။ ဒါ့ကြောင့် မနက်အိပ်ရာနိုးတာနဲ့ အိပ်ရာပေါ်မှာပဲ အကြောလျော့ လေ့ကျင့်ခန်းတွေ ပြုလုပ်တာ ၊ ယောဂနဲ့ အသက်ရှု လေ့ကျင့်ခန်းတချို့ ပြုလုပ်တာတွေ လုပ်နိုင်ပါတယ်။ ဒါပေမယ့် ပြင်းထန်တဲ့ ခါးနာဝေဒနာ ခံစားနေရပါက ဆရာဝန် ညွှန်ကြားတဲ့ လှုပ်ရှားမှု လေ့ကျင့်ခန်းတွေကိုသာ ပြုလုပ်ဖို့ အကြံပြုချင်ပါတယ်။
(၂) သက်တောင့်သက်သာရှိတဲ့ ဖိနပ်တွေကို ဝတ်ဆင်ပါ
Photo : Reead
နောက်ကျော နာကျင်ခြင်း ဝေဒနာ ခံစားနေရပါက သက်တောင့်သက်သာရှိတဲ့ ဖိနပ်တွေကိုပဲ ဦးစားပေး ရွေးချယ်ဝတ်ဆင်ဖို့ အကြံပြုချင်ပါတယ်။ အဓိကအားဖြင့် ဒေါက်ပါတဲ့ ဖိနပ်တွေ ၊ ဖိနပ်အမြင့်တွေကို ရှောင်ကြဉ်သင့်ပါတယ်။ တစ်နေ့တာလုံး သက်တောင်သက်သာနဲ့ ပေါ့ပေါ့ပါးပါးစီးလို့ရမယ့် Shoes တွေကသာ အကောင်းဆုံး ဖြစ်ပါတယ်။
(၃) လေ့ကျင့်ခန်းလုပ်ပါ
Photo : Verywell Health
လေ့ကျင့်ခန်းလုပ်တာက နောက်ကျော နာကျင်ခြင်းကို သက်သာစေမယ့် အကောင်းဆုံး နည်းလမ်းတစ်ခုပါ။ ဒါပေမယ့် လေ့ကျင့်ခန်း လုပ်လေ့လုပ်ထ မရှိသူတစ်ယောက်ဆိုရင်တော့ ပေါ့ပေါ့ပါးပါး ပြုလုပ်လို့ရတဲ့ လေ့ကျင့်ခန်းတွေနဲ့ ဖြည်းဖြည်းချင်း စတင်သင့်ပါတယ်။ ဥပမာ လမ်းလျှောက်ခြင်း ၊ စက်ဘီးစီးခြင်း သို့မဟုတ် တစ်နေ့ကို မိနစ် ၃၀ ခန့် ရေကူးခြင်းစတဲ့ ထိခိုက်မှုနည်းတဲ့ လေ့ကျင့်ခန်းတွေ ပြုလုပ်နိုင်ပါတယ်။ အကြောလျော့ခြင်းနဲ့ ယောဂ လေ့ကျင့်ခန်းတွေကလည်း ကြွက်သားတွေရဲ့ ပျော့ပြောင်းမှုကို တိုးစေပြီး လှုပ်ရှားလို့ ပိုကောင်းအောင် ကူညီပေးနိုင်ပါတယ်။ လိုအပ်ပါက ကိုယ်နဲ့သင့်တော်မယ့် အကောင်းဆုံးလေ့ကျင့်ခန်း အမျိုးအစားတွေကို ဆရာဝန်နဲ့ တိုင်ပင်ပြီး အကြံဉာဏ် တောင်းခံနိုင်ပါတယ်။
(၄) ထိုင်တဲ့အခါ သက်တောင့်သက်သာရှိပါစေ
Photo : The New York Times
အကယ်၍ ကွီးတို့က အချိန်ကြာမြင့်စွာ ထိုင်ခုံမှာထိုင်ပြီး အလုပ်လုပ်ရသူ တစ်ယောက်ဆိုရင် ထိုင်ရတာ ပိုပြီး သက်တောင့်သက်သာရှိစေမယ့် ထိုင်ခုံမျိုးကို ရွေးချယ်ဖို့ လိုပါလိမ့်မယ်။ ကွီးတို့ အတွက် ပိုပြီးသက်တောင့်သက်သာ ဖြစ်စေမယ့် ပုံစံမျိုးကို လိုသလို ချိန်ညှိပြီး ထိုင်နိုင်မယ့် ထိုင်ခုံမျိုးကို ရွေးချယ်ပါ။ ခါးအောက်ပိုင်းမှာ ခေါင်းအုံးအသေးတစ်လုံး ဒါမှမဟုတ် လိပ်ထားတဲ့ ပုဝါတစ်ခု ခုပြီးထိုင်ခြင်းကလည်း ခါးနဲ့ နောက်ကျော နာကျင်ခြင်းကို သက်သာစေနိုင်ပါတယ်။ နောက်ထပ် နည်းလမ်းတစ်ခုကတော့ ခြေထောက်ကို ခွေးခြေခုံပေါ်မှာတင်ပြီး ထိုင်ခြင်းကလည်း ခါးနာခြင်းကို သက်သာစေပါလိမ့်မယ်။
(၅) အနားယူပါ
Photo : Healthline
ကွီးတို့က တစ်နေ့ကုန်ထိုင်ပြီး အလုပ်လုပ်ရသူတစ်ယောက် ဒါမှမဟုတ် အချိန်ကြာကြာ မတ်တပ်ရပ်ပြီး အလုပ်လုပ်ရသူတစ်ယောက်ဆိုရင် ခန္ဓာကိုယ်ကို မကြာခဏ အနားယူပေးဖို့ လိုပါတယ်။ ၁ နာရီလောက် အလုပ်လုပ်ပြီးတာနဲ့ ၅ မိနစ်လောက် အကြောဆန့်တာ ၊ အညောင်းညာဖြေတာမျိုး လုပ်သင့်ပါတယ်။ ဒါမှလည်း အရိုးအဆစ်နဲ့ ကြွက်သားတွေရဲ့ တင်းကျပ်မှုကို လျော့ကျစေပြီး နောက်ကျော နာကျင်မှု ဝေဒနာကို သက်သာစေမှာ ဖြစ်ပါတယ်။
အထက်ပါ အချက်တွေအပြင် နောက်ကျော နာကျင်ခြင်း ဝေဒနာကို သက်သာစေဖို့ ကွီးတို့ ပြုလုပ်နိုင်တဲ့ အရာလေးတွေလည်း ရှိပါသေးတယ်။ အဲ့ဒါတွေကတော့ အိပ်တဲ့အခါ ဘေးတစ်စောင်းအနေအထားနဲ့ ခြေထောက်နှစ်ဖက်ကြားမှာ ခေါင်းအုံးညှပ်ပြီး အိပ်စက်ပါ။ အလေး အပင်တွေ မ,တာ ၊ တွန်း/ဆွဲ တဲ့အခါတွေမှာ သတိထားပါ။ ဒဏ်ရာရနိုင်တဲ့ လေ့ကျင့်ခန်းနည်းတွေ ရှောင်ပါ။ လမ်းလျှောက်တဲ့အခါ ၊ ထိုင်တဲ့အခါတွေမှာ ခါးကို မတ်မတ်ထားပြီး ကိုယ်နေဟန်ထား မှန်ကန်အောင် ထိန်းသိမ်းပါ။ ဒါဆိုရင်တော့ နောက်ကျော နာကျင်ခြင်း ဝေဒနာကို အတော်အသင့် သက်သာစေမှာပဲ ဖြစ်ပါတယ်။
Featured Photo : Advanced Relief Institute
