လူတိုင်းနီးပါး ကြိုက်နှစ်သက်တဲ့ အသီးတွေထဲမှာ သရက်သီး ကတစ်မျိုး အပါအဝင်ပါ။ အထူးသဖြင့် အာရှနိုင်ငံသား အများစုဟာ သရက်သီးစားရတာ နှစ်သက်ကြပြီး အသီးအတိုင်း စားကြသလို မုန့်အဖြစ်တစ်မျိုး ၊ ဖျော်ရည်အဖြစ်တစ်ဖုံ နည်းလမ်းအမျိုးမျိုးနဲ့ စားသုံးကြပါတယ်။ ဒီနေရာမှာ တော်တော်များများ မသိကြတဲ့ အချက်တစ်ခုက သရက်ရွက်ကပေးတဲ့ အကျိုးကျေးဇူးတွေပါပဲ။ သရက်သီးမှာတင်မကပဲ သရက်ရွက် မှာလည်း ဗီတာမင် C ၊ ဗီတာမင် B ၊ ဗီတာမင် A နဲ့ Antioxidant ဓာတ်တွေ ကြွယ်ဝစွာပါဝင်ပြီး အခြားအာဟာရဓာတ်တွေလည်း ပေါပေါများများ ပါရှိပါတယ်။ သရက်ရွက်ဟာ ဆေးဖက်ဝင်ပြီး အနာကျက်စေနိုင်တဲ့ ဂုဏ်သတ္တိတွေလည်း ရှိပါတယ်။ ဒီတစ်ခေါက်မှာတော့ လူတွေ သိပ်သတိမထားမိတဲ့ သရက်ရွက် ကပေးတဲ့ အံ့မခန်း အကျိုးကျေးဇူးတွေကို ပြောပြပေးချင်ပါတယ်။
(၁) သွေးပေါင်ချိန်ကို လျော့ကျစေတယ်
Photo : Penn Medicine
သရက်ရွက်မှာ သွေးတိုးရောဂါကို တိုက်ဖျက်နိုင်တဲ့ ဂုဏ်သတ္တိတွေပါဝင်ပြီး သွေးပေါင်ချိန်ကို လျှော့ချပေးနိုင်စွမ်းရှိပါတယ်။ သရက်ရွက်ဟာ သွေးကြောများကို အားကောင်းစေပြီး Varicose Veins ပြဿနာကို ကုသရာမှာလည်း ကူညီပေးပါတယ်။
(၂) စိတ်ဂနာမငြိမ်ဖြစ်ခြင်းကို သက်သာစေတယ်
Photo : Hard2know
သရက်ရွက်မှာပါရှိတဲ့ Mangiferin လို့ခေါ်တဲ့ ဓာတုဒြပ်ပေါင်းတွေက စိုးရိမ်ကြောင့်ကြမှုကြောင့် ခံစားရတဲ့ စိတ်ဂနာမငြိမ်ဖြစ်မှုတွေကို ပြေလျော့စေပါတယ်။ သရက်ရွက်အနုလေးတွေကို ရေနွေးကြမ်းထဲမှာ စိမ်သောက်မယ်ဆိုရင် စိတ်မရွှင်မလန်းဖြစ်မှုကို ကုသပေးပြီး ခန္ဓာကိုယ်ကို လန်းဆန်းစေပါတယ်။
(၃) သည်းခြေနဲ့ ကျောက်ကပ် ကျောက်တည်ခြင်းကို ကုသပေးတယ်
Photo : Advanced Urology
သရက်ရွက်ဟာ သည်းခြေနဲ့ ကျောက်ကပ် ကျောက်တည်ခြင်းကို ကုသရာမှာ အထောက်အကူ ဖြစ်စေပါတယ်။ သရက်ရွက်ကို ညက်ညက်ထောင်းပြီး အခြောက်လှန်းကာ ရလာတဲ့ သရက်ခြောက်ရွက်တွေကို တစ်ညတာရေစိမ်ထားပြီး သောက်မယ်ဆိုရင် ကိုယ်တွင်းမှာ အနယ်ထိုင်နေတဲ့ကျောက်တွေကို ပြိုကွဲစေပြီး ကျောက်အကြွင်းအကျန်တွေကို ဖယ်ရှားရှင်းလင်းပေးနိုင်ပါတယ်။
(၄) အသက်ရှူလမ်းကြောင်းဆိုင်ရာ ပြဿနာတွေကို ကုသပေးတယ်
Photo : Allergic Living
သရက်ရွက်ဟာ အသက်ရှူလမ်းကြောင်းဆိုင်ရာ ပြဿနာအမျိုးမျိုးအတွက် အစွမ်းထက်တဲ့ အိမ်တွင်း ဆေးတစ်ခွက်ပါ။ အအေးမိခြင်း ၊ လည်ချောင်းနာခြင်းနဲ့ ပန်းနာရင်ကျပ်ရောဂါ ခံစားရသူတွေအတွက် အထူးသင့်လျော်ပါတယ်။ သရက်ရွက် ကို ပျားရည်အနည်းငယ်ထည့်ပြုတ်ပြီး ရလာတဲ့ သရက်ရွက်ဖျော်ရည်ကို သောက်သုံးပေးခြင်းဖြင့် အအေးမိခြင်းနဲ့ ချောင်းဆိုးခြင်းကို ထိရောက်စွာ ပျောက်ကင်းစေနိုင်ပါတယ်။ ထို့အတူ အအေးမိဖျားနာခြင်းကြောင့် နောက်ဆက်တွဲဖြစ်ပေါ်လာတဲ့ အသံဝင်ခြင်းကိုလည်း ကုသပေးနိုင်ပါတယ်။
(၅) ဝမ်းကိုက်ရောဂါကို သက်သာစေတယ်
Photo : Medical News Today
သရက်ရွက်ဟာ သွေးဝမ်းသွားခြင်း ၊ ဝမ်းကိုက်ခြင်းကို ကုသရာမှာ အလွန်အသုံးဝင်ပါတယ်။ သရက်ရွက် ကို အရိပ်အောက်မှာ အခြောက်ခံကာ အမှုန့်ကြိတ်ပြီး တစ်နေ့လျှင် နှစ်ကြိမ်မှ သုံးကြိမ်ခန့် ရေဖြင့် သောက်သုံးပေးမယ်ဆိုရင် ဝမ်းကိုက်ရောဂါကို ပျောက်ကင်းသက်သာစေပါတယ်။
(၆) နားကိုက်ခြင်းကို ကုစားပေးတယ်
Photo : Viamed Salud
နားကိုက်ခြင်းဝေဒနာကို ကုသဖို့အတွက် သရက်ရွက်ကို သုံးနိုင်ပါတယ်။ သရက်ရွက် ကနေ ညှစ်ယူထားတဲ့ အရည်ကို လက်ဖက်ရည်ဇွန်းတစ်ဇွန်းခန့်ယူကာ နားအစက်ချဆေးရည်အဖြစ်သုံးမယ်ဆိုရင် နားရွက်ကိုက်ခြင်းကို သက်သာစေမှာ ဖြစ်ပါတယ်။ အရည်ကို အသုံးမပြုမီ အနည်းငယ် အပူပေးပါ။
(၇) အပူလောင်ခြင်းကို သက်သာပျောက်ကင်းစေတယ်
Photo : Medical News Today
အရေပြားပေါ်ရှိ အပူလောင်ဒဏ်ရာတွေကို သက်သာပျောက်ကင်းစေဖို့ သရက်ရွက် လက်တစ်ဆုပ်စာခန့်ကို မီးရှို့ပြာချလိုက်ပါ။ ရလာတဲ့ပြာကို ထိခိုက်ဒဏ်ရာရထားတဲ့နေရာကို လိမ်းပေးပါ။ အပူလောင်ဒဏ်ရာတွေကို သက်သာစေပါလိမ့်မယ်။
Featured Photo : Mishry.com
