လူတိုင်း လူတိုင်းဟာ ညီတူမျှတူ တစ်နေ့တာအတွက် အချိန် ၂၄ နာရီ ပိုင်ဆိုင်ကြပါတယ်။ လူတိုင်း ညီတူညီမျှ ရတဲ့အချိန်တွေဟာ တန်ဖိုးရှိပါတယ်။ လက်တွေ့ အသုံးချမှုပေါ်မှာ မူတည်ပြီး ရလဒ်တွေဟာ ကွဲပြားသွားခြင်း ဖြစ်ပါတယ်။ လက်ရှိမှာ အောင်မြင်နေသူ တော်တော်များများကို ကြည့်လိုက်ပါ။ အချိန်ကို တန်ဖိုးထားပြီး အကျိုးရှိရှိ အသုံးချတဲ့ သူတွေချည်းပါပဲ။ အချိန်ကို တန်ဖိုးထားပြီး အကျိုးရှိစွာ အသုံးချခြင်းက ကွီးတို့အတွက် အောင်မြင်မှု ရရှိဖို့ ပထမဆုံးခြေလှမ်းပါပဲ။ အချိန်ကို ကောင်းကောင်းအသုံးချဖို့ အတွက် စီမံခန့်ခွဲတတ်ဖို့လည်း လိုပါတယ်။ ဒီဆောင်းပါးလေးမှာတော့ ကွီးတို့အတွက် အချိန် တွေကို ပိုမိုအကျိုးရှိစွာ စီမံခန့်ခွဲ တတ်စေဖို့ နည်းလမ်းကောင်းလေးတွေကို ဖော်ပြပေးချင်ပါတယ်။
Photo : ZOOM.ME
လုပ်ငန်းခွင်မှာလည်း ကိုယ့်ရဲ့ လုပ်ငန်းဆောင်တာတွေ အချိန်မှီ ပြီးမြောက်ဖို့ မလိုလားအပ်တဲ့ အချိန်ဖြုန်းတီးမိတာတွေ မဖြစ်ဖို့အတွက် အချိန်ကို အကျိုးရှိစွာ စီမံတတ်ဖို့လိုပါတယ်။ အချိန်ကို ကောင်းမွန်စွာ စီမံခန့်ခွဲတတ်တဲ့အခါမှာ အလုပ်တာဝန်များကို အနားကပ်မှ အချိန်မှီပြီးစီးဖို့ ရုန်းကန်ရတဲ့ ဒုက္ခတွေ၊ စိတ်ဖိစီးမှုတွေကနေ ကင်းဝေးမှာ ဖြစ်ပါတယ်။ ဒါ့အပြင် အချိန်ကို ကောင်းစွာ စီမံခန့်ခွဲတတ်သူတွေဟာ အလုပ်များများနဲ့ မြန်မြန်ပိုပြီး ပြီးမြောက်အောင်မြင်သလို ကိုယ်ပိုင်အချိန်ပို ရနိုင်ပါတယ်။ ဆက်လက်ပြီးတော့ အချိန် တွေကို ဘယ်လို အကျိုးရှိရှိ စီမံခန့်ခွဲ ရမလဲဆိုတာ ကြည့်လိုက်ရအောင်။
တစ်နေ့တာ လုပ်စရာအလုပ်များကို စာရင်းပြုစုပါ
Photo : HubSpot Blog
တစ်နေ့တာ လုပ်ငန်းဆောင်တာများ မစခင် တစ်နေ့တာလုံးအတွက် လုပ်စရာရှိသော အလုပ်များ၊ အစည်းအဝေး အချိန်များ စသည်တို့ကို စာရင်းပြုစုပါ။ ထို့နောက် လုပ်စရာရှိတဲ့ အလုပ်များကို သူ့အချိန်အလိုက် ဘယ်အချိန်မှာ ဘယ်အလုပ် ပြီးစီးရမယ်ဆိုတာ တစ်ခါတည်း သတ်မှတ်ထားပါ။ အရေးအကြီးဆုံးမှ စပြီး အဓိကထား လုပ်ပြီးနောက် အစဉ်အတိုင်း ပြီးမြောက်အောင်လုပ်ပါ။ ပြီးမြောက်သွားသည့် အလုပ်တစ်ခု စီတိုင်းကို အမှန်ခြစ်ပါ။ ထိုသို့လုပ်ခြင်းဖြင့် ကိုယ့်ရဲ့ အလုပ်ပြီးမြောက်မှုနဲ့ တိုးတတ်မှုကို ကိုယ်တိုင်မြင်ရပြီး စိတ်ကျေနပ် တတ်ကြွလာပါလိ့မ်မယ်။ ကွီးတို့ အနေနဲ့လည်း ထိုသို့လုပ်ခြင်းဖြင့် လုပ်စရာများစွာကို ဘယ်ကစလုပ်ရမှန်း မသိဘဲ အချိန်တွေ ကုန်နေတာမျိုး မဖြစ်တော့ပါဘူး။ ဒီနည်းလမ်းက တကယ်ကို အကျိုးရှိပြီး ထိရောက်ပါတယ်။
အလုပ်များကို Deadline သတ်မှတ်ထားပါ
Photo : Time Management
တစ်နေ့တာ လုပ်စရာများကို သေချာစွာ အချိန်သတ်မှတ်ပြီး လုပ်ဖို့လိုသလို အချိန်တစ်ခု အထိ လုပ်ဆောင်ရမဲ့ Projects တွေ၊ အလုပ် တာဝန်တွေကိုလည်း မိမိတို့ ကိုယ်တိုင် Deadline ထားပြီး ပြီးမြောက်အောင် လုပ်ဖို့လိုပါတယ်။ ကွီးတို့ကိုယ်တိုင် ပြီးမြောက်အောင် လုပ်မဲ့အချိန်ကို နောက်ဆုံးရက် သတ်မှတ်ပြီး ၎င်းကို လိုက်နာရန် အကောင်းဆုံးကြိုးစားပါ။ အလုပ်လုံးဝပြီးမြောက်ရန် ရက်အနည်းငယ်အလိုတွင် ကွီးတို့ကိုယ်တိုင်ရဲ့ (Deadline) နောက်ဆုံးရက်ကို သတ်မှတ်ပါ။ ဒီလို လုပ်ခြင်းအားဖြင့် ကွီးတို့ရဲ့ အလုပ်တာဝန်က ကြိုတင်ပြီးစီးပြီး ပြန်လည် ဖြည့်စွက်စရာရှိလျှင်လည်း အချိန်လုံလောက်မှာ ဖြစ်ပါတယ်။ ဒါ့အပြင် အနားကပ်မှ အမြန်လုပ်ရတဲ့အတွက် အမှားတွေ၊ စိတ်ဖိစီးမှုတွေလည်း ကင်းဝေးပြီး ရလဒ်ကောင်းတွေ ရမှာ ဖြစ်ပါတယ်။
အလုပ်အများကြီးကို တစ်ပြိုင်နက်တည်း မလုပ်ပါနဲ့
Photo : Computer World
အချိန် ကို ကောင်းစွာ စီမံခန့်ခွဲ တတ်ခြင်းဟာ အလုပ်တစ်ခုချင်းစီ အလိုက် တစ်ခုပြီးတစ်ခု သူ့အချိန်အလိုက် ပြီးမြောက်အောင်မြင်အောင် လုပ်တာပါ။ ဒီလိုမဟုတ်ဘဲ အလုပ်အများကြီးကို တစ်ပြိုင်နက်တည်း လုပ်ခြင်းက ဘယ်အလုပ်ကိုမှ သေချာစွာမပြီးပြတ်တဲ့အပြင် အချိန်လည်း ပိုဖြုန်းတီးမိသလို ဖြစ်တတ်ပါတယ်။ ၂၀၀၉ ခုနှစ်တွင် ပြုလုပ်ခဲ့သော Stanford မှာလေ့လာမှုတစ်ခုအရ တစ်ချိန်တည်းတွင် အလုပ်များစွာလုပ်သောသူများ (Multitaskers) များထက် တစ်ကြိမ်လျှင် အလုပ်တစ်ခုကိုသာ အာရုံစိုက်ပြီးလုပ်သူများ က ပိုမိုအလုပ်ပြီးမြောက် အောင်မြင်ကြောင်း တွေ့ရပါတယ်။ ထိုသို့ အလုပ်အများကြီးကို တစ်ပြိုင်နက်တည်း လုပ်ဆောင်ခြင်းက ကျွမ်းကျင်မှုတစ်ခုမဟုတ်ပါ။ အရင် ဦးစားပေးလုပ်ရမဲ့ အလုပ်တစ်ခုကိုသာ အာရုံစူးစိုက်မှုအပြည့်နဲ့ အောင်မြင်အောင်လုပ်ပြီး၊ တစ်ခုပြီးမှသာ နောက်တစ်ခု ဆက်လက်လုပ်ဆောင်ပါ။
အချိန်နဲ့ ပတ်သတ်ပြီး ပန်းတိုင်အသေးလေးများ ထားရှိပါ
Photo : Forbes
ကွီးတို့ရေ အချိန် ကို စနစ်တကျ စီမံခန့်ခွဲ ပြီး လိုက်နာဆောင်ရွက်ရတာဟာ အစပိုင်းမှာ အနည်းငယ် ခက်ခဲနိုင်ပါတယ်။ ဒါကြောင့် အရင်ဆုံး ကွီးတို့ အနေနဲ့ ကိုယ်စွမ်းဆောင်နိုင်မဲ့ အချိန်နဲ့ ပတ်သတ်ပြီး ရည်မှန်းချက် ပန်းတိုင်သေးသေးလေးများကို အရင်ထားရှိပါ။ ထိုပန်းတိုင်များ အောင်မြင်လာတဲ့အခါ ကွီးတို့ အချိန်ကို အကျိုးရှိစွာ စီမံခန့်ခွဲခြင်းရဲ့ အကျိုးကျေးဇူးတွေ ခံစားလာပါလိမ့်မယ်။ ထိုမှတဆင့် ကွီးတို့ ကြိုးစားချင်စိတ်တွေ၊ စိတ်ဓာတ်တွေ တတ်ကြွလာပါလိမ့်မယ်။ ထို့နောက်မှာတော့ ကွီးတို့လိုချင်တဲ့ ကြီးမားတဲ့ ရည်မှန်းချက် ပန်းတိုင်များဆီသို့ တတ်လှမ်းသွားလိုက်ရုံပါပဲ။
ကွီးတို့ရေ အချိန် ကို ကောင်းစွာ စီမံခန့်ခွဲ ပြီး အသုံးချတတ်ခြင်းက အရည်အချင်းတစ်ခုပါ။ အခုဖော်ပြပေးလိုက်တဲ့ အချက်လေးတွေက ကွီးတို့အတွက် အချိန်ကို စီမံတဲ့နေရာမှာ များစွာ အထောက်အကူပြုစေမှာပါ။
Source : PsychCentral
Featured Photo : All Business
