အထီးကျန်ခြင်းဟာ လူတန်းစားမျိုးစုံ ကျားမ,မရွေး ကြုံတွေ့ရနိုင်တဲ့ စိတ်အခြေအနေတစ်ရပ်ပါ။ ဆိုရှယ်မီဒီယာပေါ်မှာ Like တွေ အများကြီး ရနေသူတွေ ၊ လူတွေနဲ့ နေ့စဉ် ထိတွေ့ဆက်ဆံနေရသူတွေတောင် အထီးကျန်မှု ဝေဒနာကို ခံစားရနိုင်ပါတယ်။ တကယ်တော့ လူတွေမှာ ဝမ်းနည်းခြင်းတွေ ၊ မြိုသိပ်ထားရခြင်းတွေ များလာတဲ့အခါ နောက်ဆက်တွဲအနေနဲ့ အထီးကျန်ခြင်း ဆိုတဲ့ ဝေဒနာကို ခံစားရလာတာ ဖြစ်ပါတယ်။ သင့်အနေနဲ့ အထီးကျန်ခြင်း ဝေဒနာကို ရာနှုန်းပြည့် တားဆီးလို့ မရနိုင်ပေမယ့် အထီးကျန် တယ်လို့ ခံစားရတဲ့ အခါမျိုးမှာတော့ အခုပြောတဲ့ နည်းလမ်းလေးတွေနဲ့ အထီးကျန်မှု နွံထဲကရုန်းထွက်လို့ ရနိုင်ပါတယ်။
(၁) ပေါ့ပေါ့ပါးပါးစကားတွေနဲ့ စတင်ပါ
Photo : Danny Franks
သင့်အနေနဲ့ အထီးကျန်တယ်လို့ ခံစားနေရတယ်ဆိုရင် တစ်ကိုယ်တည်း သီးသီးသန့်သန့် နေထိုင်ခြင်းကို ရှောင်ကြဉ်ပြီး လူတွေနဲ့ ပုံမှန်အတိုင်း ထိတွေ့ဆက်ဆံမှုရှိအောင် ကြိုးစားနေထိုင်ဖို့ လိုပါတယ်။ ဒီနေရာမှာ ပေါ့ပေါ့ပါးပါးစကား (Small Talk) တွေက သိပ်ကို အရေးပါပါတယ်။ ကိုယ့်ရဲ့ သူငယ်ချင်းတစ်စုံတစ်ယောက်ကို မက်ဆေ့ချ်ပို့ပြီး ပေါ့ပေါ့ပါးပါး စကားလေးတွေ ပြောကြည့်တာ ၊ ပန်းခြံမှာဆုံတဲ့ သူစိမ်းတစ်ယောက်ကို ရင်းနှီးဖော်ရွေတဲ့ နှုတ်ဆက်စကားလေးတွေနဲ့ မိတ်ဆက်တာမျိုး လုပ်ကြည့်ပါ။ Small Talk လေးတွေ ပြောဆိုတာက လူတွေနဲ့ ဆက်သွယ်ပြောဆိုရာမှာ ပိုမိုလွယ်ကူစေတဲ့ ပေါင်းကူးတံတားတစ်ခုဖြစ်သလို အထီးကျန်ခြင်းကို သက်သာစေနိုင်တဲ့အပြင် သူငယ်ချင်းမိတ်ဆွေအသစ်တွေရစေဖို့လည်း ကူညီပေးနိုင်ပါတယ်။
(၂) စိတ်တူကိုယ်တူ သူငယ်ချင်းတစ်ယောက်နဲ့ တွေ့ပါ
Photo : BuzzFeed
တစ်ယောက်အကြောင်းတစ်ယောက် ကောင်းကောင်းသိနားလည်ထားတဲ့ စိတ်တူကိုယ်တူ သူငယ်ချင်းတစ်ယောက်ရှိခြင်းဟာ ကံကောင်းခြင်းတစ်ခုလို့ ဆိုရမှာပါပဲ။ ကွီးတို့ ခံစားနေရတဲ့ အထီးကျန် ခြင်းဝေဒနာတွေကို ကျော်လွှားနိုင်ဖို့ ကွီးတို့ရဲ့ စိတ်တူကိုယ်တူ သူငယ်ချင်းက အများကြီး ကူညီပေးနိုင်ပါလိမ့်မယ်။ ဝါသနာတူ ၊ စိတ်တူ ၊ အကြိုက်ချင်းလည်းတူပြီး အများကြီး ညှိနှိုင်းစရာမလိုတဲ့ ရင်ဘတ်ချင်းနီးတဲ့ သူငယ်ချင်းတစ်ယောက်နဲ့ အပြင်ထွက်လျှောက်လည် ကြည့်ပါ။ ဝါသနာပါရာတွေ လုပ်ကြည့်ပါ။ ကွီးတို့ရဲ့ ခံစားချက်တချို့ကို ရင်ဘတ်တဲ့ နားထောင်ပေးနိုင်မယ့်သူဆိုရင် ရင်ဖွင့်တိုင်ပင်တာမျိုး လုပ်ကြည့်ဖို့ အကြံပြုချင်ပါတယ်။
(၃) Active ဖြစ်အောင်နေပါ
Photo : BroBible
ကိုယ်လက်လှုပ်ရှား လေ့ကျင့်ခန်း ပုံမှန်လုပ်ပြီး ကိုယ့်ကိုယ်ကို Active ဖြစ်အောင်နေသူတွေဟာ စိတ်ဖိစီးမှုနည်းပြီး စိတ်ဖိအားနဲ့ စိတ်ပိုင်းဆိုင်ရာ ပြဿနာတွေကို ကောင်းမွန်စွာ ကျော်လွှားနိုင်စွမ်း ရှိကြပါတယ်။ လေ့ကျင့်ခန်းလုပ်ခြင်းဟာ စိတ်ရောကိုယ်ပါ ကျန်းမာရွှင်လန်းစေပြီး တက်ကြွလန်းဆန်းတဲ့ နေ့ရက်တွေကို ပိုင်ဆိုင်နိုင်စေပါတယ်။ ဒါကြောင့် အထီးကျန်ခြင်းနဲ့ လွန်ဆွဲနေရချိန်မှာ ကိုယ်လက်လေ့ကျင့်ခန်းတွေကို ပုံမှန်လုပ်ဆောင်ပြီး ကိုယ့်ကိုယ်ကို အတက်နိုင်ဆုံး Active ဖြစ်အောင် နေကြည့်ပါ။ အထီးကျန်မှုတွေ သက်သာနိုင်မှာ ဖြစ်ပါတယ်။
(၄) လူမဟုတ်တဲ့ သက်ရှိလေးတွေနဲ့ အချိန်ကုန်ဆုံးပါ
Photo : Unsplash
ကျွန်တော်တို့ လူသားတွေအတွက် ရင်းနှီးမှုနဲ့ ခံစားချက်တွေ ဆက်သွယ်ပေးနိုင်တဲ့ လူမဟုတ်တဲ့ သက်ရှိလေးတွေကတော့ အိမ်မွေးတိရိစ္ဆာန်လေးတွေပါပဲ။ ခွေးလေးတွေ ၊ ကြောင်လေးတွေဟာ စိတ်ဖိစီးမှု ၊ စိုးရိမ်ပူပန်မှု ၊ စိတ်ဓာတ်ကျခြင်းနဲ့ အထီးကျန် ခြင်းတွေကို သက်သာစေဖို့ ကူညီပေးနိုင်ပါတယ်။ သူတို့လေးတွေနဲ့ အတူတူ အချိန်ကုန်ဆုံးတာဟာ အထီးကျန်ခြင်းနွံထဲက ရုန်းထွက်နိုင်ဖို့အတွက် နည်းလမ်းကောင်းတစ်ခုပဲ ဖြစ်ပါတယ်။
(၅) အကူအညီရယူပါ
Photo : The Mayo News
စိတ်ပိုင်းဆိုင်ရာ ကျန်းမာရေးနဲ့ ပတ်သတ်ရင် အကူအညီရယူဖို့ ဘယ်တော့မှတုန့်ဆိုင်းမနေသင့်ပါဘူး။ စိတ်ကိုပိတ်လှောင်ထားပြီး တချို့သောခက်ခဲတဲ့ အခြေအနေတွေကို တစ်ယောက်တည်း ကျိတ်မှိတ်ဖြေရှင်းနေခြင်းထက် ကျွမ်းကျင်တဲ့ စိတ်ပညာရှင်တွေ ၊ စိတ်ပိုင်းဆိုင်ရာအကြံပေး Counsellor တွေနဲ့ ဆွေးနွေးတိုင်ပင်ပြီး အကူအညီရယူတာကပိုပြီး ကောင်းမွန်မှန်ကန်တဲ့ လုပ်ရပ်တစ်ခုပါတယ်။ ကျွန်တော်တို့ လူသားတွေရဲ့ စိတ်ဟာ တစ်ခါတစ်လေမှာ ထွက်ပေါက်ပေးဖို့ လိုတယ်ဆိုတာကိုလည်း နားလည်လက်ခံထားဖို့ လိုပါတယ်။
Featured Photo : 2nd Story Counseling
