သူငယ်ချင်း ဆိုတာ စာရေးသူတို့ဘဝမှာ ဒုတိယမိသားစုဝင်တွေလို့ ပြောရင်မှားနိုင်မယ် မထင်ပါဘူး။ သူငယ်ချင်းတွေ အများကြီး ရှိတာထက် သင့်အကြောင်းကို ကောင်းကောင်းနားလည်ပြီး သင့်ဘေးမှာ ဘဝရဲ့အနိမ့်အမြင့် အတက်အကျ အလိုက်အမြဲအတူ ရှိနေနိုင်တဲ့ သူငယ်ချင်းကောင်းတွေအချို့ ရှိရင်ပဲ ကံကောင်းတယ်လို့ ပြောလို့ ရပါပြီ။ သင်အောင်မြင်ချိန်မှာ ရင်ထဲကနေ လှိုက်လှိုက်လှဲလှဲ ဝမ်းသာဂုဏ်ယူပေးနိုင်သူ ၊ သင်လဲပြိုချိန်မှာ ကမ်းပေးမယ့် လက်စုံဖြစ်နိုင်သူတွေသာလျှင် ဘယ်တော့မှ အဆုံးအရှုံးမခံသင့်တဲ့ သူငယ်ချင်းကောင်းတွေ ဖြစ်ပါတယ်။ ဒီလိုသူငယ်ချင်းကောင်းတွေ ပိုင်ဆိုင်ရဖို့ကလည်း နည်းနည်းတော့ ခက်သားပါ။ အချို့က သင့်အနားမှာ အတုအယောင် မျက်နှာဖုံးတွေနဲ့ ရှိနေတက်တဲ့ သူငယ်ချင်းတွေလည်း အများကြီး ရှိပါတယ်။ အရေးကြီးတာကတော့ သူငယ်ချင်းဆက်ဆံရေးဖြစ်ဖြစ် ၊ မိသားစုဆက်ဆံရေးဖြစ်ဖြစ် ၊ သမီးရည်းစားဆက်ဆံရေးဖြစ်ဖြစ် တစ်ယောက်ကိုတစ်ယောက်အပြန်အလှန် လေးစားမှုကို နားလည်တန်းဖိုးထားပြီး ပေါင်းကြဖို့ပါ။ အကယ်က အပြန်အလှန် လေးစားမှု မရှိရင် အဲ့ဒီဆက်ဆံရေးဟာ အနှေးနဲ့အမြန် နိဂုံးချုပ်သွားနိုင်ပါတယ်။ ဒါကြောင့် ဒီတစ်ခေါက်မှာတော့ ကိုယ့်အပေါ် လေးစားမှုမရှိတဲ့ သူငယ်ချင်းတွေရဲ့ လက္ခဏာတွေကို ပြောပြပေးချင်ပါတယ်။
(၁) တခြားသူတွေရှေ့မှာ သင့်ကို နှိမ့်ချဆက်ဆံမယ်
Photo : HerWay.net
အချို့သူငယ်ချင်းတွေက လူတွေရှေ့မှာ ကိုယ့်ကို လှောင်ပြောင်ဟာသလုပ်ရတာကို သူတို့ကိုသူတို့ ဆွဲဆောင်မှု ရှိတယ်လို့ ထင်ကြပါတယ်။ တကယ်တော့ ဒါဟာ သင့်အပေါ်ကို တန်ဖိုးမထားတာ ၊ လေးစားမှု မရှိတာကို ဖော်ပြနေတာပါ။ သင်နဲ့သူ့ကြားမှာ ဘယ်လောက်ပဲ ခင်မင်ရင်းနှီးတဲ့ အတိုင်းအတာတစ်ခု ရှိနေပါစေ တခြားသူတွေရှေ့မှာ မကြာခဏဆိုသလို သင့်ကို နှိမ့်ချဆက်ဆံတယ် ၊ ဟာသလုပ်နေတယ်ဆိုရင် အဲ့ဒီဆက်ဆံရေးကနေ အမြန်ဆုံး ရှောင်ဖယ်ရုန်းထွက်လိုက်ဖို့ အကြံပေးချင်ပါတယ်။
(၂) နောက်ကွယ်မှာ သင့်မကောင်းကြောင်း ပြန်ပြောမယ်
Photo : Bona Magazine
နံရံတိုင်းမှာ နားတွေ ရှိပါတယ်။ လူတစ်ယောက်က ကိုယ့်မကောင်းကြောင်းကို နောက်ကွယ်မှာ ကိုယ်မသိဘူးအထင်နဲ့ ပြောလိုက်ပေမယ့် အကြောင်းအမျိုးမျိုးကြောင့် ကိုယ့်နားထဲကို ပြန်ရောက်တဲ့ အခိုက်အတန့်တွေ ပြင်ပလက်တွေ့ဘဝမှာ အများကြီးပါ။ အမှန်တကယ် တစ်ယောက်ကိုတစ်ယောက် အပြန်အလှန် လေးစားမှု ရှိတယ်ဆိုရင် ကိုယ်မှားနေတာ ၊ လွဲနေတာတွေကို ပေါ်တင်မျက်နှာချင်းဆိုင်ပြောပြီး အကြံပြုထောက်ပြလို့ ရပါတယ်။ နောက်ကွယ်မှာ အတင်းချတာကတော့ လေးစားမှုမရှိတဲ့ အကျည်းတန်တဲ့လုပ်ရပ် တစ်ခုပါပဲ။
(၃) လိုအပ်မှ ဆက်သွယ်လာမယ်
Photo : NBC News
သင့် သူငယ်ချင်းနဲ့ သင်က အခြားသူတွေလိုပဲ ပုံမှန်ဆက်ဆံရေးပဲရှိမယ် ၊ အဆက်အသွယ်တော်ရုံမလုပ်ဖြစ်ဘူး သူတို့လိုအပ်တဲ့ အချိန်ရောက်မှသာ သင့်ကို မရမက အသဲအသန် ဆက်သွယ်လာမယ်ဆိုရင် သင့်ကို လိုသုံးလုပ်နေတယ်ဆိုတာ သိနိုင်ပါပြီ။ ဒါက သင့်ကို လေးစားမှု မရှိဘူးဆိုတာ ပြနေတဲ့ ထင်ရှားတဲ့ လက္ခဏာတစ်ခုပါ။ သင့်ရဲ့ ခင်မင်မှုကို တန်ဖိုးမထားသလို သူတို့ လိုအပ်ချိန်မှာ အခွင့်အရေးယူတက်တဲ့ တစ်ကိုယ်ကောင်းသမားတွေပဲ ဖြစ်ပါတယ်။
(၄) သင့်အပေါ် မနာလို ဖြစ်နေမယ်
Photo : NBC News
စစ်မှန်တဲ့ သူငယ်ချင်းတွေဆိုတာ သင်အောင်မြင်ရင် သင့်အတွက် လက်ခုပ်တီးပေးဖို့ ဝန်မလေးကြသူတွေပါ။ သူတို့ထက် တစ်ခုခုသာသွားမှာကို အင်မတန်ကြောက်တယ် ၊ သင်ရဲ့အောင်မြင်မှု Achievements တွေအပေါ် မရှုစိတ်နဲ့ ဝန်တိုမနာလို ဖြစ်နေတယ်ဆိုရင် ဒါက သင့်အပေါ် လေးစားမှု မရှိသလို သူငယ်ချင်းကောင်း သူငယ်ချင်းအစစ်လို့ကို ပြောလို့ မရတော့ပါဘူး။
(၅) သင့်ခံစားချက်တွေကို ရည်ရွယ်ချက်ရှိရှိ ထိခိုက်စေမယ်
Photo : Men’s Health
စာရေးသူတို့ဟာ တစ်ခါတစ်လေမှာ ကိုယ့်ရဲ့ခံစားချက်တွေ ၊ ရင်တွင်းစကားတွေကို ဘော်ဒါသူငယ်ချင်းတွေထံ ရင်ဖွင့်ပြောပြလေ့ ရှိကြပါတယ်။ ကိုယ်ပြောပြခဲ့တဲ့ ကိုယ့်ရဲ့ရင်တွင်းစကားတွေကို တချိန်ချိန်မှာ ပြန်လည်ပြီး နင်းမယ် ၊ အနိုင်လုပ်မယ် ၊ စနောက်ဟာသလုပ်မယ် ၊ ရည်ရွယ်ချက်ရှိရှိ တိုက်ခိုက်လာနေတယ်ဆိုရင်တော့ သင့်သူငယ်ချင်းဟာ သင့်အပေါ် လေးစားမှု လုံးဝမရှိသလို ကိုယ့်ရဲ့အကြောင်းကိုလည်း ပွင့်ပွင့်လင်းလင်း ထုတ်ဖော်ပြောမပြသင့်တဲ့ လူစားမျိုးဆိုတာ နားလည်လက်ခံထားဖို့ လိုပါမယ်။
Source : MomJunction
Featured Photo : The Conscious Vibe
