လတ်ဆတ်တဲ့ အသီးအနှံတွေမှာ ခန္ဓာကိုယ်အတွက် မရှိမဖြစ်လိုအပ်တဲ့ ဗီတာမင်နဲ့ အာဟာရဓာတ်တွေ ကြွယ်ဝစွာ ပါဝင်ပါတယ်။ အသီးအနှံတွေ များများစားပေးတာက ကျန်းမာရေးအတွက် အကျိုးပြုစေရုံသာမက အသားအရေအတွက် မယုံနိုင်လောက်တဲ့ အကျိုးကျေးဇူးတွေ များစွာ ရစေပါတယ်။ အသားအရေ ကြည်လင်ဝင်းမွတ်နေခြင်းဟာ လူတစ်ယောက်ကို ဆွဲဆောင်မှုတိုးစေတဲ့ အချက်တစ်ခု ဖြစ်တာကြောင့် ကွီးတို့ရဲ့ အသားအရေ ကို သဘာဝအတိုင်း ကြည်လင်လာစေဖို့ စားပေးသင့်တဲ့ အသီးအနှံ ၅ မျိုး အကြောင်း ပြောပြပေးချင်ပါတယ်။
(၁) လိမ္မော်သီး
Photo : MasterClass
လိမ္မော်သီးမှာ အသားအရေအတွက် လိုအပ်တဲ့ သဘာဝ ဗီတာမင် C ဓာတ်များ ကြွယ်ဝစွာ ပါဝင်ပါတယ်။ လိမ္မော်သီးက အသားအရေအတွင်းပိုင်းအထိ ရေဓာတ်ကိုထိန်းထားပေးပြီး မွဲခြောက်နေတဲ့ အသားအရေကို ပြန်လည် ကြည်လင်ဝင်းပလာစေဖို့ ကူညီပေးသလို အရွယ်မတိုင်ခင် အိုမင်းရင့်ရော်မှုကို ကာကွယ်ပေးတဲ့ ကော်လာဂျင်ကိုလည်း တည်ဆောက်ပေးပါတယ်။ တစ်နေ့ကို တစ်ကြိမ် လိမ္မော်သီး တစ်ဝက်ခန့် စားပေးနိုင်ပါတယ်။
(၂) ပန်းသီး
Photo : HealthifyMe
ကျန်းမာရေးကောင်းချင်ရင် ပန်းသီးတစ်လုံးနေ့တိုင်း စားပေးရမယ်ဆိုတဲ့ စကားလေးကို ကြားဖူးကြမယ် ထင်ပါတယ်။ ပန်းသီးဟာ ခန္ဓာကိုယ်ကျန်းမာရေးအတွက် အကျိုးပြုသလို အသားအရေကောင်းမွန်စေဖို့လည်း အထောက်အကူ ပြုပါတယ်။ ပန်းသီးမှာ ဗီတာမင် A ၊ ဗီတာမင် C ၊ ဓာတ်တိုးဆန့်ကျင် ပစ္စည်းများ ၊ ပိုတက်စီယမ် ၊ မဂ္ဂနီဆီယမ်နဲ့ အမျှင်ဓာတ်များ ပါရှိတာကြောင့် ကွီးတို့ရဲ့ အသားအရေကို ကျန်းမာနုပျိုစေပြီး သဘာဝအတိုင်း ကြည်လင်လာစေမှာ ဖြစ်ပါတယ်။
(၃) ဖရဲသီး
Photo : Simply Recipes
ရေဓာတ် ဖြည့်တင်းပေးနိုင်တဲ့ အကောင်းဆုံး အသီးအနှံကတော့ ဖရဲသီးပါပဲ။ ဖရဲသီးဟာ ရေဓာတ် ၉၂ ရာခိုင်နှုန်းနဲ့ ဖွဲ့စည်းထားတဲ့အပြင် ဗီတာမင် C ၊ ဗီတာမင် A နဲ့ ဗီတာမင် B1 ကဲ့သို့ အာဟာရဓာတ်များစွာလည်း ကြွယ်ဝစွာပါဝင်ပါတယ်။ ဖရဲသီး စားပေးခြင်းဖြင့် အသားအရေ မညီမညာခြင်းနဲ့ ယို့ယွင်းပျက်စီးတွေကို ကာကွယ်ပေးပြီး ရောင်ရမ်းမှုနဲ့ အိုမင်းရင့်ရော်ခြင်း လက္ခဏာတွေကို လျော့ကျပေးကာ အသားအရေကို ကြည်လင်ဝင်းမွတ်နေစေမှာ ဖြစ်ပါတယ်။
(၄) သရက်သီး
Photo : Eat This, Not That
သရက်သီးဟာ အသီးတွေရဲ့ ဘုရင်လို့ ခေါ်ရလောက်တဲ့အထိ အရသာရှိရုံမက အသားအရေ ကျန်းမာရေးအတွက်လည်း အထူးကောင်းမွန်တဲ့ အသီးအနှံ တစ်မျိုး ဖြစ်ပါတယ်။ ဗီတာမင် A ၊ ဗီတာမင် E ၊ ဗီတာမင် C နဲ့ ဗီတာမင် K တို့အပြင် အသားအရေကို ကျန်းမာပြီး သဘာဝအတိုင်း Glow နေစေမယ့် Flavonoids ၊ Polyphenolics ၊ Beta-carotene နဲ့ Xanthophylls ဓာတ်များလည်း ပါရှိပါတယ်။ သရက်သီးဟာ ရောင်ရမ်းမှုတွေကို လျှော့ချပေးရုံမက ဝက်ခြံများကိုလည်း လျော့ပါးသက်သာစေနိုင်ပါတယ်။
(၅) သခွားသီး
Photo : SNAP-Ed Connection – USDA
သခွားသီးဟာ ကွီးတို့ရဲ့အသားအရေကို အစိုဓာတ် မြှင့်တင်ပေးနိုင်တဲ့ အကောင်းဆုံး အသီးအနှံတစ်မျိုး ဖြစ်ပါတယ်။ သခွားသီးမှာ အသားအရေ ကြည်လင်ဝင်းမွတ်လာစေဖို့အတွက် မရှိမဖြစ်လိုအပ်တဲ့ ဗီတာမင် C နဲ့ ဗီတာမင် K ဓာတ်များ အမြောက်အများ ပါဝင်ပါတယ်။ သခွားသီးကို အစားအစာတစ်ခုအနေနဲ့ စားလို့ရသလို အသားအရေ ထိန်းသိမ်းခြင်းဆိုင်ရာ သဘာဝပစ္စည်းတစ်ခုအနေနဲ့လည်း အသုံးပြုနိုင်ပါတယ်။
Featured Photo : Cosmopolitan
