ညဘက် နှစ်နှစ်ခြိုက်ခြိုက် အိပ်ပျော်စေဖို့ တကယ်မလွယ်ကူပါဘူး။ အိပ်ရာအနေအထား ၊ အိပ်ရာဝင်ချိန်မှာ ပြုလုပ်လေ့ရှိတဲ့ အလေ့အကျင့်တွေနဲ့ အိပ်ခန်း ပတ်ဝန်းကျင် အခြေအနေတွေအားလုံးဟာ ကွီးတို့ရဲ့ အိပ်စက်မှု ပုံစံအပေါ် အများကြီး အကျိုးသက်ရောက်မှု ရှိစေပါတယ်။ ဒီထဲမှာ အိပ်စက်မှု ပုံစံအနေအထားကလည်း အရေးကြီးဆုံးပါပဲ။ အိပ်စက်မှု ပုံစံတွေအကြောင်း မပြောခင် အိပ်စက်ခြင်းဟာ ကျွန်တော်တို့ရဲ့ စိတ်နဲ့ ခန္ဓာအတွက် ဘယ်လောက်အရေးကြီးတယ်ဆိုတာကို ပြောပြပေးချင်ပါတယ်။ လူတစ်ယောက်ဟာ တစ်နေ့ကို အနည်းဆုံး ၆ နာရီကနေ ၈ နာရီအထိ ပြည့်ပြည့်ဝဝ အိပ်စက်အနားယူဖို့ လိုပါတယ်။ ကောင်းမွန်လုံလောက်စွာ အိပ်စက်ခြင်း အနားယူခြင်းဟာ ကွီးတို့ရဲ့ ဦးနှောက်ကို နောက်တစ်နေ့တာအတွက် ကြိုတင်ပြင်ဆင်နိုင်စေပြီး အချက်အလက်အသစ်တွေကို သင်ယူမှတ်သားနိုင်စေဖို့ ပြင်ဆင်ပေးပါတယ်။ လုံလောက်စွာအိပ်စက်အနားယူခြင်းက နှလုံးနဲ့ သွေးကြောတွေကို ပြန်လည်ကောင်းမွန်စေပြီး နှလုံးသွေးကြောဆိုင်ရာ ရောဂါနဲ့ သွေးဖိအားမြင့်တက်ခြင်းမှလည်း ကာကွယ်ပေးပါတယ်။
ဒါတင်မကသေးပါဘူး ကျန်းမာတဲ့ ကိုယ်ခံအားစနစ်ကို တည်ဆောက်ဖို့ ကူညီပေးပြီး စိတ်ခံစားချက်ကို ကောင်းမွန်စေဖို့နဲ့ တွေးခေါ်ပုံ ၊ တုံ့ပြန်ပုံတွေအပေါ်မှာလည်း သက်ရောက်မှုရှိပါတယ်။ ဒါကတော့ ကျွန်တော်တို့ရဲ့ စိတ်နဲ့ခန္ဓာကိုယ်အပေါ် ကောင်းစွာအိပ်စက်အနားယူခြင်းက သက်ရောက်တဲ့ အချက်တွေပဲ ဖြစ်ပါတယ်။ အိပ်စက်မှု ပုံစံကတော့ လူတစ်ယောက်နဲ့ တစ်ယောက်မတူပေမယ့် ယေဘုယျအားဖြင့်တော့ ၅ မျိုး ခွဲခြားနိုင်ပါတယ်။ ဒီဆောင်းပါးလေးမှာတော့ မတူညီတဲ့အိပ်စက်မှု ပုံစံအမျိုးမျိုးနဲ့ သူတို့ရဲ့ ကောင်းကျိုးဆိုးပြစ် တွေကို ပြောပြပေးသွားမှာ ဖြစ်ပါတယ်။
(၁) မှောက်လျက်အိပ်ခြင်း
Photo : Prairie Spine
ပင်ပန်းတဲ့ တစ်နေ့တာကို ဖြတ်သန်းပြီးတဲ့နောက်မှာ ခြေပစ်လက်ပစ် အိပ်လိုက်တဲ့ နေ့တွေ ကြုံဖူးမှာပါ။ ခေါင်းအုံးကို မျက်နှာအပ်ပြီး မှောက်လျက်အိပ်စက်တဲ့ ပုံစံဟာ သက်တောင့်သက်သာရှိတယ်လို့ ခံစားရနိုင်ပေမယ့် ရေရှည်အတွက်တော့ မကောင်းတဲ့ အချက်တွေ ရှိနေပြန်ပါတယ်။
အားသာချက်
မှောက်လျက်အိပ်စက်ခြင်းရဲ့ ကောင်းတဲ့ အချက်တစ်ခုကတော့ ဟောက်တာကို သက်သာစေပါတယ်။
အားနည်းချက်
မှောက်လျက်အိပ်တာက မနက်အိပ်ရာနိုးချိန်မှာ ကိုယ်လက်မအီမသာဖြစ်တတ်ပါတယ်။ ဒီလို အိပ်စက်တဲ့ပုံစံဟာ လည်ပင်းကိုတင်းကျပ်စေပြီး ဦးခေါင်းနဲ့ ကျောရိုးတစ်လျှောက်ကို မသက်မသာဖြစ်စေတဲ့အတွက် ခေါင်းကိုက်တာ ၊ ခါးနာတာတွေ ဖြစ်စေနိုင်ပါတယ်။ အထူးသဖြင့် ကိုယ်ဝန်ဆောင်ချိန်မှာ အမျိုးသမီးတွေအနေနဲ့ မှောက်လျက်အိပ်စက်တဲ့ ပုံစံကို အထူးရှောင်ကြဉ်ဖို့ လိုပါတယ်။ ကျွမ်းကျင်သူတွေကတော့ မှောက်လျက်အိပ်စက်တဲ့ ပုံစံက အဆိုးဆုံးအိပ်စက်မှု အနေအထားတစ်ခုလို့ သတ်မှတ်ထားကြပြီး ခေါင်းအုံးအကူအညီနဲ့ ဘေးဘက်ကို ဖြည်းဖြည်းချင်းစောင်းအိပ်ဖို့ အကြံပြုထားပါတယ်။
(၂) ညာဘက်စောင်းအိပ်ခြင်း
Photo : Daily Mail
လေ့လာမှုတွေအရ လူတော်တော်များများ သဘောကျတဲ့ အိပ်စက်မှုပုံစံက ဘေးတစောင်းအိပ်စက်တဲ့ ပုံစံဖြစ်ပါတယ်။ ဘေးတစောင်း အိပ်စက်ရာမှာ ညာဘက်ကိုစောင်းအိပ်တဲ့ ပုံစံနဲ့ ဘယ်ဘက်ကိုစောင်းအိပ်တဲ့ ပုံစံဆိုပြီး ၂ မျိုးရှိပါတယ်။ ယေဘုယျအားဖြင့်တော့ ညာဘက်စောင်းအိပ်တာနဲ့ ဘယ်ဘက်စောင်းအိပ်တာက အတူတူပဲလို့ သတ်မှတ်လို့ရပြီး ပုံစံတစ်ခုချင်းစီမှာ ကိုယ်စီထူးခြားချက်လေးတွေ ရှိနေပါတယ်။
အားသာချက်
ညာဘက်စောင်းအိပ်ခြင်းက ကွီးတို့ရဲ့ကျောရိုးကို သဘာဝပုံစံအတိုင်း ပြေလျော့စေပါတယ်။
အားနည်းချက်
ညာဘက်ကိုစောင်းအိပ်တဲ့ ပုံစံဟာ နှလုံးသွေးကြောစနစ်တစ်ခုလုံးအပေါ် သက်ရောက်မှုရှိစေပြီး အဆုတ်ကို တင်းမာစေကာ နံရိုးကို ဖိအားဖြစ်စေပါတယ်။ ၎င်းက သွေးလည်ပတ်မှုကို အဟန့်အတားစေတဲ့အတွက် အိပ်ပျော်နေချိန်အတွင်းမှာ မကြာခဏ လှုပ်ရှားစေပြီး နှစ်နှစ်ခြိုက်ခြိုက် အိပ်ပျော်စေဖို့ရန် ခက်ခဲစေနိုင်ပါတယ်။
(၃) ဘယ်ဘက်စောင်းအိပ်ခြင်း
Photo : Sleep Foundation
အားသာချက်
ဘယ်ဘက်စောင်းအိပ်ခြင်းက အက်ဆစ်ပြန်တက်ခြင်းနဲ့ ရင်ပူခြင်းတွေကို သက်သာစေနိုင်တဲ့ အိပ်စက်မှု ပုံစံတစ်ခု ဖြစ်ပါတယ်။ ဒါပေမယ့်လည်း အစာအိမ်အပေါ်မှာတော့ ဖိအားများလွန်းနိုင်ပါတယ်။ ကျွမ်းကျင်သူတွေကတော့ ကိုယ်ဝန်ဆောင်မိခင်တွေအတွက် ဘယ်ဘက်စောင်းအိပ်တဲ့ ပုံစံဟာ အသင့်တော်ဆုံးဖြစ်တယ်လို့ လမ်းညွှန်ထားပါတယ်။
အားနည်းချက်
ဘယ်ဘက်ကို အရမ်းကွေးလွန်းပြီး အိပ်စက်မယ်ဆိုရင်တော့ အသက်ရှုရ ခက်ခဲတာမျိုး ဖြစ်နိုင်ပါတယ်။
ညာဘက်ပဲစောင်းအိပ်အိပ် ၊ ဘယ်ဘက်ကိုပဲ စောင်းအိပ်အိပ် ဘေးတစောင်းအိပ်မယ်ဆိုရင် အိပ်စက်မှု အနေအထားကို ပိုကောင်းမွန်စေဖို့ ဒူးခေါင်းကြားမှာ ခေါင်းအုံးတစ်လုံး ခုပြီး အိပ်စက်သင့်ပါတယ်။
(၄) ခြေမြှောက်အိပ်ခြင်း
Photo : REM-Fit
အိပ်ပျော်နေစဉ်မှာ ခြေထောက်တွေဟာ အထက်အောက် ရွေ့လျားနေနိုင်ပါတယ်။ တချို့ဆိုရင် ခြေထောက်တွေက ခါးလည်လောက် အနေအထားမှာရှိနေတဲ့အထိကို ခြေထောက်တွေမြှောက်ပြီး အိပ်စက်လေ့ရှိပါတယ်။ ခြေမြှောက်အိပ်ခြင်းရဲ့ ကောင်းကျိုးဆိုးပြစ်တွေကတော့
အားသာချက်
ခြေထောက်နှစ်ဖက်စလုံးကို ခေါင်းအုံးလိုအမြင့်နေရာတစ်ခုခုခံပြီး မြှောက်အိပ်တာဟာ ခါးနာနေသူတွေအတွက် အရမ်းကိုအထောက် အကူဖြစ်စေပြီး ခါးနာခြင်းကို လျော့ကျသက်သာစေနိုင်ပါတယ်။
အားနည်းချက်
အားသာချက်နဲ့ ပြောင်းပြန်လို့ဆိုရမှာပါ။ ခြေထောက်တစ်ဖက်တည်းကိုပဲ ခါးလည်လောက်အထိ မြှင့်ပြီး အိပ်စက်တဲ့ ပုံစံက ခန္ဓာကိုယ်ကို မညီမညာဖြစ်စေပြီး တင်ပါးဆုံရိုးကို ထိခိုက်စေပါတယ်။ ဒီကနေတဆင့် ခါးနာခြင်းကို ဖြစ်စေနိုင်ပါတယ်။
(၅) ပက်လက်အိပ်ခြင်း
Photo : The Sleep Judge
ပက်လက်အိပ်စက်ခြင်းဟာ အိပ်စက်မှု ပုံစံ ၅ မျိုးထဲမှာ အကောင်းဆုံး ပုံစံတစ်ခု ဖြစ်ပါတယ်။ လေ့လာမှုတွေအရလည်း ပလက်အိပ်ခြင်းဟာ ကျန်းမာရေးအတွက် အကောင်းဆုံးဖြစ်တယ်လို့ ဆိုထားပါတယ်။
အားသာချက်
ပက်လက်အိပ်စက်တဲ့ပုံစံဟာ ခန္ဓာကိုယ်အလေးချိန်ကို ကျောရိုးပေါ်အညီအမျှ ရှိစေတဲ့အတွက် သက်တောင့်သက်သာနဲ့ ပိုပြီး နှစ်နှစ်ခြိုက်ခြိုက် အိပ်ပျော်စေဖို့ ကူညီပေးပါတယ်။ ပက်လက်အနေအထားမှာ မျက်နှာကို မျက်နှာကျက်ရှိရာသို့ မော့ထားရစေတာဖြစ်တဲ့အတွက် မျက်နှာပေါ် အရေးအကြောင်းတွေ ဖြစ်စေခြင်းမှလည်း ကာကွယ်ပေးပါတယ်။ ဒါ့အပြင် အက်ဆစ်ပြန်တက်ခြင်းကိုလည်း ကာကွယ်ပေးပြီး ကိုယ်လက်နာကျင်မှုမရှိစေပဲ နှစ်ခြိုက်စွာ အိပ်ပျော်စေဖို့ ကူညီပေးပါတယ်။
အားနည်းချက်
ဒီအိပ်စက်မှု ပုံစံအနေအထားဟာ ဟောက်တက်တဲ့သူတွေအတွက်တော့ မကောင်းပါဘူး။ ပက်လက်အနေအထားဖြစ်တဲ့အတွက် လည်ချောင်းနဲ့ ဝမ်းဗိုက်ကို ဆွဲငင်အားတိုးစေကာ အသက်ရှု ရခက်ခဲစေပါတယ်။
ပက်လက်အနေအထားအိပ်မယ်ဆိုရင် ပျော့ပျောင်းပြီး သက်တောင့်သက်သာရှိတဲ့ ခေါင်းအုံးတွေကို အသုံးပြုပါ။ ခန္ဓာကိုယ်ကို မှန်ကန်စွာ ချိန်ညှိဖို့ ဦးခေါင်းအောက်မှာ ပျော့ပျောင်းတဲ့ခေါင်းအုံး တစ်လုံး သို့မဟုတ် နှစ်လုံးကို ထားပြီး အိပ်စက်နိုင်ပါတယ်။
အခုပြောပြပေးခဲ့တာကတော့ အိပ်စက်မှု ပုံစံအမျိုးမျိုးနဲ့ သူတို့ရဲ့ ကောင်းကျိုးဆိုးပြစ်တွေအကြောင်းပါ။ ကွီးတို့ရော ဘယ်လို Positions မျိုးနဲ့ အိပ်စက်လေ့ရှိလဲဆိုတာ ကွန်းမန့်မှာ ဆွေးနွေးပေးခဲ့ပါဦး။
Featured Photo : Evolve Physical Therapy
