တစ်နေ့လုံး ထိုင်ပြီး အလုပ်လုပ်ရလို့ပဲ ဖြစ်ဖြစ်၊ မလှုပ်ရှားမိလို့ ခန္ဓာကိုယ်က အညောင်းမိပြီး တစ်ကိုယ်လုံး တောင့်တင်းနေပြီလား။ ဒီလို အချိန်ကြာကြာ မလှုပ်ရှားမိပါက ကြွက်သားတွေ တောင့်တင်းနာကျင်တာ၊ ခါးနာတာ၊ ကြွက်သားနဲ့ အရိုး ပုံမမှန် မသက်မသာဖြစ်တာ စတာတွေ ခံစားရနိုင်ပါတယ်။ ဒါ့ကြောင့် အကြောဆန့် လေ့ကျင့်ခန်းတွေကို ပြုလုပ်ပေးသင့်ပါတယ်။ အကြောဆန့် လေ့ကျင့်ခန်းတွေ ပုံမှန်လုပ်ခြင်းက ကျန်းမာကြံ့ခိုင်မှုရဲ့ အရေးကြီးသော အစိတ်အပိုင်း တစ်ခုလည်း ဖြစ်ပါတယ်။ အကြောဆန့် လေ့ကျင့်ခန်းတွေက ကွီးတို့ တင်းနေသမျှ ကြွက်သားတွေကို ပြေလျော့စေမယ့် လှုပ်ရှားမှုတွေ ဖြစ်သည်သာမက သွေးလည်ပတ်မှုကောင်းစေကာ စိတ်ကို တည်ငြိမ်စေပါတယ်။
ဒါ့အပြင် ခန္ဓာကိုယ် ပျော့ပြောင်းပြီး လှုပ်ရှားသွားလာမှုလည်း လွယ်ကူစေပါတယ်။ ပုံမှန်ပြုလုပ်သွားမယ်ဆိုရင် နာမကျန်းဖြစ်ခြင်းကို ကာကွယ်ပေးနိုင်သည်သာမက ညဘက်မှာ ပိုမိုကောင်းမွန်သော အိပ်စက်ခြင်းကို ရရှိစေနိုင်ပါတယ်။ တစ်နေ့တာလုံးမှာ ခန္ဓာကိုယ်ပေါ့ပါးမှု ရှိနေဖို့လည်း ပြုလုပ်ပေးနိုင်ပါတယ်။ လေ့ကျင့်ခန်း အပြင်းအထန်တွေ ပုံမှန်မပြုလုပ်နိုင်ဘူး ဆိုရင်တောင် အကြောဆန့်လေ့ကျင့်ခန်းတွေကို ပြုလုပ်ပေးသင့်ပါတယ်။ ဆက်လက်ပြီးတော့ ထိရောက်တဲ့ လေ့ကျင့်ခန်းတွေကို ကြည့်လိုက်ရအောင်ဗျာ။
The Runner’s Stretch
Photo : Real Simple
ဒီလေ့ကျင့်ခန်းကို လုပ်မယ်ဆိုရင် ကွီးတို့ရဲ့ ခြေထောက်များကို ပခုံးအကွာအဝေးအတိုင်းထားပြီး မတ်မတ်ရပ်ပါ။ ပြီးလျှင် ညာဘက်ခြေထောက်ကို ရှေ့သို့ တစ်လှမ်းတိုးပါ။ ထို့နောက်ဒူးကို ကွေးပြီး လက်များကို ရှေ့ခြေထောက်ကို ထိလိုက်ပါ။ ထို့နောက် ညာဖက်ခြေထောက်ကို ပြန်ဖြောင့်လိုက်ပြီး အသက်ရှုသွင်းက မူလ အနေအထားသို့ ဖြေးဖြေးချင်းပြန်သွားပါ။
ဒီလေ့ကျင့်ခန်းကို ဘယ်-ညာ တစ်လှည့်စီ ၄ ကြိမ်ပြုလုပ်ပါ။
The Standing Side Stretch
Photo : Real Simple
ပထမဦးစွာ ဖြောင့်တန်းစွာ တည့်တည့်ရပ်ပါ။ ပြီးနောက် ကွီးတို့လက်များကို ပုံမှာပြထားသည့်အတိုင်း လက်ချောင်းများကို တွဲလျက် ခေါင်းပေါ်မှာ အတည့်အနေအထားအတိုင်း ထားပါ။ ပြီးလျှင် ခန္ဓာကိုယ်အပေါ်ပိုင်းကို ညာဘက်သို့ကွေးပြီး အသက်ရှူသွင်းပါ။ ဖြည်းဖြည်းချင်း ငါးချက်လောက် အသက်ရှုပါ။ ထို့နောက် အလယ်ဗဟိုသို့ ဖြည်းဖြည်းချင်း ပြန်သွားပါ။ ဘယ်ဘက်ကိုလည်း ထိုကဲ့သို့ ပြုလုပ်ပါ။
ဘယ်-ညာ တစ်လှည့်စီ ပြုလုပ်ပါ။
The Forward Hang Stretch
Photo : Real Simple
ကွီးတို့ရဲ့ ခြေထောက်များကို တင်ပါးအကွာအဝေးအတိုင်း မတ်မတ်ရပ်ပြီး ဒူးအနည်းငယ် ကွေးလိုက်ပါ။ လက်များကို ပုံမှာ ပြထားသည့်အတိုင်း အနောက်ဘက်မှာ တွဲချိတ်လိုက်ပါ။ ပြီးလျှင် အသက်ရှုသွင်းပြီး ရင်ဘတ်ကို ချဲ့ရန် ကွီးတို့ရဲ့ လက်များကို ဖြောင့်တန်းထားပါ။ ထို့နောက် သက်ရှူသွင်းပြီး ခါးကိုကွေးကာ လက်နှစ်ဖက်ကို ပုံမှာ ပြထားသည့်အတိုင်း အပေါ်သို့ ဆန့်တန်းထားပါ။ အသက်ပြင်းပြင်း ၅ ကြိမ်လောက်ရှုပြီးအထိ ထိုအနေအထားအတိုင်း နေပါ။
ထို့နောက် မူလအနေအထားကို ပြန်သွားပြီး လေ့ကျင့်ခန်းကို ဆက်လက်လုပ်ဆောင်ပါ။
The Low Lunge Arch Stretch
Photo : Real Simple
ဒီလေ့ကျင့်ခန်းကို လုပ်မယ်ဆိုရင် အရင်ဆုံး ကွီးတို့ ညာဘက်ခြေထောက်ကို ရှေ့သို့ တစ်လှမ်းတိုးပြီး နောက်ခြေထောက်က ပုံမှာ ပြထားတဲ့ အနေအထားအတိုင်း ထားပါ။ လက်နှစ်ဖက်ကို ယှက်လျက် လက်ဖဝါးများက ညာခြေထောက်ရှေ့သို့ ဆောင်ထားပြီး ကြမ်းပြင်သို့ မျက်နှာမူထားပါ။ ထို့နောက် လက်နှစ်ဖက်ကို အပေါ်သို့ ဆန့်တန်းလိုက်ပါ။ သက်တောင့်သက်သာ ရှိသလောက် ဆန့်ထုတ်ပြီး အသက်ကို ပြင်းပြင်းရှုပါ။
ဘယ်-ညာ ခြေထောက်ပြောင်းပြီး တစ်လှည့်စီ ဆက်လက်လုပ်ဆောင်ပါ။
The Seated Back Twist Stretch
Photo : Real Simple
ဒီလေ့ကျင့်ခန်းကို လုပ်မယ်ဆိုရင် အရင်ဆုံး ကြမ်းပြင်ပေါ်သို့ ထိုင်ချလိုက်ပါ။ ထို့နောက် ပုံမှာပြထားသည့်အတိုင်း ဘယ်ခြေကို ဖြောင့်ဖြောင့်ဆန့်တန်းလျက် ချထားပြီး ညာဘက်ဒူးကို ကွေးပြီး ညာခြေကို ဘယ်ခြေထောက်ကို ကျော်ပြီး ချထားပါ။ ထို့နောက်ညာလက်ကိုလည်း ကြမ်းပြင်ပေါ်မှာ ချထားပါ။ ဘယ်ဘက် တံတောင်ဆစ်ကိုကွေးပြီး ပုံမှာပြထားတဲ့အတိုင်း ညာဒူးကို ထိထားလျက် ခန္ဓာကိုယ်ကို လှည့်လိုက်ပါ။ လှည့်ပတ်နေစဉ် အသက်ရှုထုတ်ပြီး လက်မောင်းကို ခြေထောက်သို့ ဖိကာ ညာဘက်သို့ မျက်နှာမူထားပါ။ ထို့နောက် အသက် ၅ ကြိမ်ခန့် ရှုပြီး မူလအနေအထားကို ဖြည်းဖြည်းချင်း ပြန်သွားပါ။
ဒီလေ့ကျင့်ခန်းကိုလည်း ဘယ်-ညာ ခြေထောက်ပြောင်းပြီး တစ်လှည့်စီ ဆက်လက်လုပ်ဆောင်ပါ။
ကွီးတို့ရဲ့ ခန္ဓာကိုယ်မှာ ရှိတဲ့ ကြွက်သားတွေ တင်းနေသမျှ ပြေလျော့စေမယ့် အကြောဆန့်လေ့ကျင့်ခန်းတွေကို ဝေမျှပေးလိုက်တာ ဖြစ်ပါတယ်။ ပုံမှန်ပြုလုပ်သွားရင် ခန္ဓာကိုယ်အတွက် အကျိုးရှိမှာ အမှန်ပါပဲ။ နည်းစနစ်မှန်ကန်ဖို့ကိုတော့ အလေးထားရပါမယ်။ အကယ်၍ လေ့ကျင့်ခန်းပြုလုပ်နေစဉ် နာကျင်မှုတစ်ခုခုကို ခံစားရလျှင် ချက်ချင်းရပ်လိုက်ပါ။
Source : Real Simple
Featured Photo : LSTC
