ကျွန်တော်အပါအဝင် လူတော်တော်များများက ညဉ့်နက်တဲ့အထိ နေနိုင်ကြပေမယ့် မနက်စောစော ထဖို့ ခက်ခဲကြမယ်ထင်ပါတယ်။ များသောအားဖြင့် အလုပ်ကိစ္စတွေကြောင့်လည်းကောင်း၊ ညဉ့်နက်တဲ့အထိ ဖုန်းသုံးတာကြောင့်လည်းကောင်း၊ စိတ်ဖိစီးမှုတွေကြောင့်လည်းကောင်း ညဘက်မှာ တော်တော်နဲ့ မအိပ်ဖြစ်တော့ပါဘူး။ ထိုအခါမှာ မနက်မှာ အချိန်မီ မထနိုင်တော့ဘဲ နောက်ကျမှထတာ၊ အလုပ်နောက်ကျတာ နဲ့ မနက်စာစားဖို့ အချိန်မရှိတော့တာ စတာတွေ ဖြစ်လာပါတယ်။ ဒါက ရေရှည်မှာ ကျန်းမာရေးအတွက်လည်း မကောင်းပါဘူး။

မနက်စောစောထခြင်းက စိတ်ပိုင်းဆိုင်ရာ ကျန်းမာရေးအတွက် အထောက်အကူပြုမှု၊ ပိုမိုကောင်းမွန်သော အာရုံစူးစိုက်မှု၊ ပိုမိုကောင်းမွန်သော အိပ်စက်ခြင်းအရည်အသွေး၊ တစ်နေတာလုံးလန်းဆန်းမှုနဲ့ အခြားသော ကောင်းကျိုးများအပါအဝင် အပြုသဘောဆောင်သော ကျန်းမာရေး အကျိုးကျေးဇူးများလည်း ရရှိစေပါတယ်။ ဒါ့အပြင် အောင်မြင်သူတော်တော်များများကလည်း ၎င်းတို့ရဲ့ မနက်ပိုင်းအလေ့အထတွေကို အာရုံစိုက်လေ့ရှိကြတယ်လို့ ဆိုပါတယ်။ ဒီဆောင်းပါးလေးမှာတော့ မနက်စောစော မထနိုင်တဲ့ ကွီးတို့အတွက် လိုက်နာသင့်တဲ့ နည်းလမ်းကောင်းလေးတွေကို ဝေမျှပေးမှာ ဖြစ်ပါတယ်။

အိပ်ယာစောစော ဝင်နိုင်ဖို့ အချိန်သတ်မှတ်ပါ

Photo : Morningstar Sleeps

မနက်ပိုင်းမှာ စောစောမထနိုင်ခြင်းရဲ့ အဓိကအကြောင်းအရင်းကတော့ ညဘက်မှာ နောက်ကျတဲ့အထိ မအိပ်ပဲ နေလို့ပါပဲ။ ဒါ့ကြောင့် အလွယ်ကူဆုံး ဖြေရှင်းနည်းကတော့ ညဘက်မှာ စောစောအိပ်တဲ့ အလေ့အထကို ကျင့်သုံးခြင်းပါပဲ။ ခန္ဓာကိုယ်ကို ညပိုင်းမှာ စောစောအိပ်ဖို့ လေ့ကျင့်ပေးခြင်းက မနက်ပိုင်းမှာ စောစောထနိုင်ဖို့ ကျင့်သားရလာပါလိမ့်မယ်။ အရွယ်ရောက်ပြီးသား လူတစ်ယောက်အတွက် တစ်ညမှာ ၇ နာရီကနေ ၈ နာရီကြားအိပ်ချိန် ရှိသင့်ပါတယ်။ ဒါမှသာ အိပ်ရေးဝပြီး မနက်ပိုင်းမှာ လန်းလန်းဆန်းဆန်း နိုးထနိုင်မှာပါ။

အိပ်ရာဝင်ခါနီး ဖုန်းသုံးခြင်းကို ရှောင်ပါ

Photo : Revyuh

အိပ်ခါနီး ဖုန်းသုံးနေတာကြောင့် အိပ်ရာဝင်နောက်ကျပြီး မနက်စောစော မထနိုင်တာလည်း အဖြစ်များတဲ့ အကြောင်းအရာတစ်ခုပါ။ ဒါ့ကြောင့် အိပ်ရာမဝင်ခင် မိနစ် ၃၀ ခန့် အလိုကတည်းက စမတ်ဖုန်းနဲ့ လပ်ပ်တော့များကို ကွီးတို့နဲ့ ဝေးဝေးထားလိုက်ပါ။ ဒါက ကွီးတို့ကို စောစောအိပ်ပျော်စေဖို့ အထောက်အကူပြုပါလိမ့်မယ်။ The Sleep Judge ရဲ့ အဆိုအရ ဖန်သားပြင်များမှ ထုတ်လွှတ်သော အပြာရောင်အလင်းများက ကျွန်တော်တို့ ခန္ဓာကိုယ်ရဲ့ သဘာဝ melatonin အဆင့်ကို ပြောင်းလဲစေပြီး အိပ်ပျော်ရန် ပိုမိုခက်ခဲစေပါတယ်။ ဒါ့ကြောင့် အိပ်ရာဝင်ခါနီးအထိ ဖုန်းသုံးတဲ့ အလေ့အကျင့်ကို ပြင်ပါ။

လိုက်ကာဖွင့်ပြီး အိပ်ပါ

Photo : Hatch

ကွီးတို့ရဲ့ အိပ်ခန်းထဲမှာ ပြတင်းပေါက်ရှိတယ်ဆိုရင် လိုက်ကာကို ပိတ်ပြီး မအိပ်ပဲ၊ အနည်းငယ်ဖွင့်ပြီး အိပ်စက်ကြည့်ပါ။ ဒီနည်းလမ်းဖြင့် ကွီးတို့ရဲ့ အခန်းထဲသို့ နေရာင်ခြည်နဲ့ သဘာဝအလင်းရောင်များ ဝင်ရောင်လာပြီး သဘာဝကျကျ နိုးထစေရန် ကူညီပေးပါလိမ့်မယ်။ အချို့သောသူများအတွက် ဒီနည်းလမ်းက ထိရောက်သော ဗျူဟာတစ်ခု ဖြစ်ပါတယ်။

လေ့ကျင့်ခန်းများ ပြုလုပ်ပါ

Photo : The Irish Times

တစ်နေ့တာလုံးမှာ ခန္ဓာကိုယ်က လှုပ်ရှားမှုနည်းတဲ့အခါ ကောင်းကောင်း အိပ်မပျော်တာမျိုး ဖြစ်တတ်ပါတယ်။ အလုံးစုံသော ကျန်းမာရေးနဲ့ ကောင်းမွန်သော အိပ်စက်ခြင်းကို ရရှိနိုင်ဖို့ တစ်နေ့ကို နာရီဝက်ခန့် လေ့ကျင့်ခန်းတွေ ပုံမှန်ပြုလုပ်သင့်ပါတယ်။ လေ့ကျင့်ခန်းပုံမှန်လုပ်ခြင်းဖြင့် ညဘက်မှာ တော်တော်နဲ့ အိပ်မပျော်ခြင်းကိုလည်း လျှော့ချနိုင်ပါတယ်။ အချိန်မှန် ကောင်းမွန်စွာ အိပ်စက်အနားယူခြင်းက မနက်ပိုင်းမှာ စော‌စောထဖို့ ကူညီပေးပါလိမ့်မယ်။

ညအိပ်ရာဝင်ခါနီး အစားစားခြင်းကို ရှောင်ပါ

Photo : VICE

ညအိပ်ရာဝင်ခါနီး အစားစာတာက အစာမကြေခြင်း၊ ရင်ပူခြင်းတို့ကို ဖြစ်စေပြီး ကွီးတို့ရဲ့ အိပ်စက်မှုစက်ဝန်းကို ထိခိုက်စေပါတယ်။ အချို့သော စားစရာများနဲ့ သောက်စရာများက ကွီးတို့ကို အိပ်မပျော်စေဘဲ လန်းဆန်းနေစေပါတယ်။ အိပ်စက်ခြင်းကို အနှောင့်အယှက်ဖြစ်စေခြင်းက မနက်ပိုင်းမှာ စောစောထနိုင်ဖို့လည်း ပိုပြီး ခက်ခဲသွားနိုင်ပါတယ်။

ကွီးတို့ရေ ဒီနည်းလမ်းလေးတွေက မနက်စောစော မထနိုင်တဲ့ သူများအတွက် သဘာဝအတိုင်း လန်းဆန်းစွာ နိုးထနိုင်ဖို့ ကူညီပေးပါလိမ့်မယ်။ ရေရှည်ကျန်းမာရေးအတွက်လည်း အကျိုးပြုတဲ့ နည်းလမ်းလေးတွေ ဖြစ်တာကြောင့် ပုံမှန်လိုက်နာသင့်ပါတယ်။

Source : Herzing Universe

Featured Photo : Verywell Mind