အပြေးလေ့ကျင့်ခန်း က ခန္ဓာကိုယ် ကျန်းမာကြံ့ခိုင်ရေးအတွက် အကျိုးပြုသည်သာမက ကယ်လိုရီတွေ လောင်ကျွမ်းစေပြီး ခန္ဓာကိုယ်ပုံသဏ္ဍန်ကို ထိန်းသိမ်းရန် အကောင်းဆုံး နည်းလမ်းများထဲက တစ်ခုပါ။ ဒါ့အပြင် ရိုးရှင်းပြီး လွယ်ကူတဲ့ ကိုယ်လက်လှုပ်ရှားမှု တစ်ခုဖြစ်တဲ့ အပြေးလေ့ကျင့်ခန်းကနေ ရုပ်ပိုင်းဆိုင်ရာနဲ့ စိတ်ပိုင်းဆိုင်ရာ ကြီးမားတဲ့ အကျိူးကျေးဇူးတွေ ဆောင်ကျဉ်းပေးနိုင်တယ်လို့ ကမ္ဘာ့တစ်ဝှမ်းရှိ ထင်ရှားသော တက္ကသိုလ်များမှာ ပြုလုပ်တဲ့ လေ့လာမှုများအရ သိရပါတယ်။ ဒါ့ပေမဲ့ တစ်ခါတစ်လေမှာ မတော်တဆ ထိခိုက်ဒဏ်ရာရခြင်း၊ ရေဓာတ်ခမ်းခြောက်ခြင်းစတဲ့ သတိမထားမိတဲ့ အခြေအနေလေးတွေ ရှိနိုင်ပါတယ်။ ဒါကြောင့် ဒီဆောင်းပါးလေးမှာ အပြေးလေ့ကျင့်ခန်း လုပ်တဲ့ ကွီးတို့အမြဲ သတိပြု လိုက်နာသင့်တဲ့ အချက် (၃) ချက်ကို ဖော်ပြပေးသွားပါမယ်။

(၁) ရေဓာတ်ခမ်းခြောက်ခြင်းကို သတိပြုပါ

Photo : MyFit-Strategry

ကွီးတို့ရေ အပြေးလေ့ကျင့်ခန်း ကလည်း ကိုယ်လက်လှုပ်ရှားမှုများတဲ့ လေ့ကျင့်ခန်း ဖြစ်တာကြောင့် ကွီးတို့ ခန္ဓာကိုယ်မှာ ရေဓာတ်ဆုံးရှုံးနိုင်တာကို သတိပြု ရပါမယ်။ ကွီးတို့ရဲ့ ချွေးမှတစ်ဆင့် အရည်များနှင့် Electrolytes များ ဆုံးရှုံးနေသောကြောင့် လေ့ကျင့်ခန်းလုပ် နေစဉ်တွင်မှာလည်း ရေဓာတ်ပြန်လည်ဖြည့်တင်းရန် လိုအပ်တယ်လို့ ဆိုထားပါတယ်။ ကွီးတို့အနေနဲ့ တစ်နာရီထက် ပိုကြာအောင် လေ့ကျင့်ခန်းလုပ်ရင် ဒါမှမဟုတ် နေပူရင် ခါတိုင်းထက် ရေပိုသောက်ဖို့ လိုပါတယ်။ ဒါ့အပြင် လေ့ကျင့်ခန်းလုပ်ပြီးချိန်တွင်လည်း ခန္ဓာကိုယ်အတွက် ရေဓာတ်ကို ထိန်းထားသင့်ပါတယ်။ ဤအချိန်သည် ခန္ဓာကိုယ်မှ အရည်များကို အထိရောက်ဆုံး စုပ်ယူနိုင်တဲ့ အချိန်ဖြစ်ပါတယ်။ ဒီအချက်က အပြေးလေ့ကျင့်ခန်း အတွက်သာမက အခြားဘယ်လေ့ကျင့်ခန်းမဆို ပြုလုပ်တဲ့ နေရာမှာ သတိပြုသင့်တဲ့ အချက်ဖြစ်ပါတယ်။

(၂) သွေးပူလေ့ကျင့်ခန်း သို့မဟုတ် အကြောဆန့်ဖို့ မမေ့ပါနဲ့

Photo : Times of India

လေ့ကျင့်ခန်းမလုပ်ခင်မှာ အရင်ဆုံး သွေးပူလေ့ကျင့်ခန်းလုပ်ဖို့ အမှန်တကယ်ပင် အရေးကြီးပါတယ်။ ဘယ်လေ့ကျင့်ခန်းမဆို မလုပ်ခင်မှာ သွေးပူလေ့ကျင့်ခန်း လုပ်ခြင်းကြောင့် လေ့ကျင့်ခန်း လုပ်နေစဉ်အတွင်း ကြွက်သားနာကျင်ခြင်းနဲ့ ဒဏ်ရာဖြစ်နိုင်ခြေ သိသိသာသာနည်းစေပါတယ်။ ကွီးတို့ရဲ့ လေ့ကျင့်ခန်း စွမ်းဆောင်ရည်ကိုလည်း ပိုကောင်းပြီး လေ့ကျင့်ခန်းများကိုလည်း ပိုမိုထိရောက်စေပါလိမ့်မယ်။ ထို့အတူ လေ့ကျင့်ခန်း မလုပ်ခင် အကြောဆန့်လေ့ကျင့်ခန်းများ လုပ်ခြင်းကလည်း ကြွက်သားတင်းမာမှုကို လျှော့ချပေးခြင်းဖြင့် ကြွက်သာ နာကျင်ခြင်းနဲ့ ဒဏ်ရာကို တားဆီးပေးပါတယ်။ ဒါကြောင့် ကွီးတို့အနေနဲ့ အပြေးလေ့ကျင့်ခန်း မလုပ်ခင် သွေးပူလေ့ကျင့်ခန်း သို့မဟုတ် အကြောဆန့်ခြင်းကို အချိန်အနည်းငယ်ယူပြီး ပြုလုပ်သင့်ပါတယ်။

(၃) ထိခိုက်ဒဏ်ရာ မဖြစ်စေရန် ကာကွယ်ပါ

Photo : Healthline

ကွီးတို့ရေ အပြေးလေ့ကျင့်ခန်းက ရိုးရှင်းလွယ်ကူတဲ့ လေ့ကျင့်ခန်း ဖြစ်ပေမဲ့လည်း တစ်ခါတစ်ရံမှာ အကြောင်းအမျိုးမျိုးကြောင့် ထိခိုက်ဒဏ်ရာ ရတာမျိုးဖြစ်တတ်ပါတယ်။ ဒါကြောင့် အပြေးလေ့ကျင့်ခန်းကို စတင်ပြီးလုပ်မဲ့သူတွေအနေနဲ့ စတင်ပြီး ပထမအပတ်မှာ ပြေးပြေးထန်ထန်ပြေးခြင်း၊ အကွာအဝေးများများ ပြေးခြင်းများကို မပြုလုပ်ပါနဲ့။ ဖြေးဖြေးမှန်မှန်နဲ့ ပုံမှန်ပြေးခြင်းက ခန္ဓာကိုယ်အတွက် ကောင်းပါတယ်။ အကယ်၍ ပြေးခြင်းကြောင့် ၂ ပတ်ကျော်ကြာ နာကျင်ကိုက်ခဲခြင်း သို့မဟုတ် ပြေးသောအခါတွင် ပွန်းပဲ့ခြင်း၊ ရောင်ရမ်းခြင်းတို့အပြင် ကြွက်သားများ နာကျင်ခြင်းတို့ရှိပါက ဆရာဝန်နဲ့ ပြသသင့်ပါတယ်။

အခုဖော်ပြပေးလိုက်တာက‌တော့ အပြေးလေ့ကျင့်ခန်း လုပ်တဲ့ ကွီးတို့အမြဲ သတိပြု လိုက်နာသင့်တဲ့ အချက် (၃) ချက်ပဲ ဖြစ်ပါတယ်။

Source : Your Well-Being

Featured Photo : Running Shoes