ကျစ်လစ်သန်မာ တောင့်တင်းတဲ့ ကြွက်သားတွေ ရဖို့ Workout တွေ ကြိုးစားပန်းစားလုပ်နေတဲ့ ကွီးတို့ရှိပါသလား။ တောင့်တင်းသန်မာတဲ့ ကြွက်သားတွေရှိခြင်းက ကြံ့ခိုင်စေသည်သာမက ကိုယ်ခန္ဓာကိုလည်း အဆီကင်းပြီး ကြည့်ကောင်းစေပါတယ်။ ကြွက်သားတွေ တည်ဆောက်ဖို့အတွက် ထိရောက်တဲ့ လေ့ကျင့်ခန်းတွေ ပြုလုပ်ဖို့က အရေးကြီးသလို ကွီးတို့စားသုံးနေတဲ့ အစားအစာတွေကလည်း အရေးပါတဲ့ အခန်းကဏ္ဍ မှာရှိနေပါတယ်။ ဒီနေ့မှာတော့ ကြွက်သားတွေ ရှယ်ကိတ်ဖို့ အထောက်အကူပြုစေမယ့် ကွီးတို့စားသုံးပေးသင့်တဲ့ အစားအစာ အချို့ကို ဝေမျှပေးချင်ပါတယ်။

ကြက်ဥ

Photo : Health Pert

ကျွန်တော်တို့ လွယ်လွယ်ကူကူ နေ့စဉ်စားသုံးမှုထဲမှာ ထည့်သွင်းနိုင်တဲ့ ကြက်ဥက ကြွက်သားတွေ ကြီးထွားဖွံ့ဖြိုးဖို့ ကူညီပေးနိုင်တယ်ဆိုတာ သိပါသလား။ ဟုတ်ပါတယ်။ ကြက်ဥမှာ အရည်အသွေးမြင့် ပရိုတင်း၊ ကျန်းမာသောအဆီများနှင့် ဗီတာမင် B နှင့် Choline ကဲ့သို့သော အာဟာရဓာတ်များ ပါဝင်ပါတယ်။ ပရိုတင်းများကို အမိုင်နိုအက်ဆစ်များဖြင့် ဖွဲ့စည်းထားပါတယ်။ ဥများမှာ အမိုင်နိုအက်ဆစ် Leucine အမြောက်အမြားပါဝင်ပြီး ကြွက်သားများ ကျစ်လစ်သန်မာစေဖို့ အထောက်အကူပြုပါတယ်။ ဒါ့အပြင် ကြက်ဥမှာ ပါဝင်တဲ့ ဗီတာမင် B ကလည်း ခန္ဓာကိုယ် စွမ်းအားကို ဖြည့်တင်းနိုင်သည်သာမက ခန္ဓာကိုယ်ရဲ့ လုပ်ငန်းဆောင်တာ အမျိုးမျိုးအတွက် အရေးပါပါတယ်။

ကြက်ရင်အုံ

Photo : The New York Times

ကြက်ရင်အုံမှာလည်း ပရိုတင်းဓာတ်များစွာ ပါဝင်ပါတယ်။ ကြက်ရင်အုံသား ၃ အောင်စ (၈၅ ဂရမ်) စားသုံးတိုင်း အရည်အသွေးမြင့် ပရိုတင်း ၂၆.၇ ဂရမ် ခန့် ကျွန်တော်တို့ ခန္ဓာကိုယ်က ရရှိပါတယ်။ ဒါ့အပြင် ကြက်ရင်အုံမှာ ဗီတာမင် ဘီ၊ နီယာစင်နဲ့ B6 တို့ပါဝင်ပါတယ်။ ဒီဗီတာမင်တွေက အကောင်းဆုံးကြွက်သားများ ရရှိစေဖို့ လေ့ကျင့်ခန်းများ ပြုလုပ်ရာမှာ ခန္ဓာကိုယ်အတွက် အကောင်းဆုံး ပံ့ပိုးပေးနိုင်ပါတယ်။

ပုစွန်

Photo : Saefood

ပုစွန်တွေက ပရိုတင်းစစ်စစ်ပါဝင်ပြီး အကောင်းဆုံးသော ကြွက်သားကြီးထွားမှုအတွက် လိုအပ်သော အမိုင်နိုအက်ဆစ် Leucine ပမာဏမြင့်မားစွာပါရှိပါတယ်။ ပုစွန် ၃အောင်စ (၈၅ ဂရမ်) စားသုံးတိုင်း ပရိုတင်း ၁၉ ဂရမ်၊ အဆီ ၁.၄၄ ဂရမ်နှင့် ကာဗိုဟိုက်ဒရိတ် ၁ ဂရမ် တို့ ရရှိပါတယ်။ ကယ်လိုရီ အများကြီးမပါဝင်ဘဲ ကျန်းမာရေးနဲ့ ညီညွတ်တဲ့ အဆီနဲ့ ကာဗိုဟိုက်ဒရိတ်တွေက ကြွက်သား တည်ဆောက်ဖို့အတွက် အထောက်အကူ ပြုတာကြောင့် ကွီးတို့ အစားအစာထဲမှာ ပုစွန်အနည်းငယ် ထည့်သွင်းစားသုံးတာကလည်း နည်းလမ်းကောင်း တစ်ခုပါပဲ။

ပဲပိစပ်

Photo : foodrhythms

ပဲပိစပ်မှာ အထူးကောင်းမွန်သော ဗီတာမင် K၊ သံဓာတ်နှင့် ဖော့စဖရပ်စ် တို့ပါဝင်ပါတယ်။ သံဓာတ်က ကွီးတို့ရဲ့ သွေးနှင့် ကြွက်သားများအတွင်း အောက်ဆီဂျင်ကို သိုလှောင် သယ်ပို့ရန် အသုံးပြုပြီး သံဓာတ် ချို့တဲ့ပါက အဆိုပါ လုပ်ငန်းဆောင်တာများကို ထိခိုက်စေနိုင်ပါတယ်။ ချက်ပြုတ်ထားသော ပဲပိစပ် ခွက်တစ်ဝက်စာ (၈၆ ဂရမ်) တွင် ပရိုတင်း ၁၆ ဂရမ်၊ ကျန်းမာရေးနှင့်ညီညွတ်သော မပြည့်ဝဆီများ၊ ဗီတာမင်နှင့် သတ္တုဓာတ်များစွာ ပါဝင်ပါတယ်။

နို့

Photo : Martha Stweart

နို့မှာ အစာခြေမြန်သော ပရိုတင်း၊ ကာဗိုဟိုက်ဒရိတ်နှင့် အဆီတို့ ရောနှောပြီး ပါဝင်ပါတယ်။  နို့တွင်ပါဝင်သော အာဟာရဓာတ်များကြောင့် ကြွက်သားကြီးထွားမှုအတွက် အကျိုးပြုတယ်လို့ ဆိုပါတယ်။ ဒါ့အပြင် ကိုယ်အလေးချိန်တိုးတတ်ချင်တဲ့ သူတွေအတွက် လေ့ကျင့်ခန်းလည်း လုပ်ရင်း နွားနို့ ပုံမှန်သောက်ပေးရင် ကြွက်သားထုထည်ကို တိုးစေနိုင်တယ်လို့ လေ့လာမှုများက ဆိုထားပါတယ်။

ကွီးတို့ရဲ့ ကြွက်သားတွေ ရှယ်ကိတ်ဖို့ ဆိုရင် လေ့ကျင့်ခန်းတွေ ပုံမှန်လုပ်ပေးဖို့လိုသလို လိုအပ်တဲ့ အစားအစာတွေကိုလည်း ပုံမှန်စားပေးသင့်ပါတယ်။

Source : Healthline

Featured Photo : DMoose