မကြာခဏဆိုသလို ခါးနာတတ် ခြင်းသည် ကွီး တို့ နေ့စဉ်ပြုလုပ်နေတဲ့ အလေ့အထကြောင့် ခါးနာရတာဖြစ်ပြီး လေ့ကျင့်ခန်း အချို့ ပြုလုပ်ကာ ခါးနာသက်သာအောင် ပြုလုပ်နိုင်ပါတယ်။ ခါးနာစေတဲ့ တရားခံတွေဖြစ်တဲ့ အလေ့အကျင့်ဆိုးတချို့ကို ရှောင်ကြဉ်နိုင်ဖို့ရန်အတွက် အရင်ဦးဆုံး လေ့လာကြည့်လိုက်ရအောင်။
ခါးနာတတ်ခြင်းသည် အလေးအပင်ပစ္စည်းများကို ရုတ်တရက်ဆိုသလို မလိုက်ခြင်းကြောင့်ပဲဖြစ်ဖြစ် (သို့) ထိုင်တဲ့အခါ ခန္ဓာကိုယ်အနေအထား မမှန်ခြင်း (သို့) အိပ်စက်တဲ့အခါ ကုတင်က သက်သောင့်သက်သာမရှိတဲ့အတွက်ကြောင့် အချိန်တဖြည်းဖြည်းကြာလာတဲ့အခါ ခါးနာသွားခြင်းပဲဖြစ်ပါတယ်။ အချို့သော အရိုးပွရောဂါ ခံစားနေရသူများသည်လည်း ခါးနာခြင်းကို ခံစားရနိုင်ပါတယ်။
ဒါ့အပြင် ခါးလှည့်ခြင်း၊ အကြောဆန့်တာများခြင်း၊ တစ်စုံတစ်ရာကို တွန်းခြင်း၊ ဆွဲယူခြင်း၊ အချိန်ကြာကြာ ထိုင်ခြင်း (သို့) ထခြင်း၊ ကားမောင်းတဲ့အချိန်နှင့် ကွန်ပျူတာ ကြည့်တဲ့အချိန်များတွင် လည်ပင်းကို အရှေ့ကိုင်းကာ ထိုင်ခြင်း၊ သက်တမ်းကုန်ဆုံးပြီးသား မွေ့ရာများကို အသုံးပြုခြင်း စတဲ့ အချက်များကြောင့်လည်း ခါးနာဝေဒနာ ခံစားရတတ်ပါတယ်။
အထက်ဖော်ပြပါအချက်များကြောင့် ခါးနာတတ် တဲ့ ကွီး တို့အတွက် ပုံမှန် ပြုလုပ်သင့်တဲ့ လေ့ကျင့်ခန်း များရှိပါတယ်။
လေ့ကျင့်ခန်း (၁)
Source: Gethealthyu
ဒီလေ့ကျင့်ခန်းသည် ခန္ဓာကိုယ်ကျောရိုးကို တဖြည်းဖြည်း သန်မာလာစေကာ ခါးနာခြင်းကို သက်သာစေတဲ့ လေ့ကျင့်ခန်းပဲဖြစ်ပါတယ်။
အဆင့် (၁) အရင်ဦးဆုံး ကြမ်းပြင်ပေါ်မှာ လက်နှစ်ဖက်သည် ဦးခေါင်းနားတွင် ဆန့်တန်းလျက်သာဖြင့် လှဲလျောင်းနေရပါမယ်။
အဆင့် (၂) အသက်ရှူသွင်းကာ ခန္ဓာကိုယ်အပေါ်ပိုင်း ကြွလိုက်ပါ။ ထို့နောက် အသကရှူထုတ်ပြီးနောက် အင်္ဂလိပ်အက္ခရာ “C” ပုံစံအတိုင်း ပြုလုပ်ပါ။
အဆင့် (၃) စက္ကန့် အနည်းငယ်ကာတဲ့အခါ လက်နှစ်ဖက်က ခြေထောက်ကို ထိကပ်အောင် ပြုလုပ်လိုက်ပါ။
အဆင့် (၃) အသက်ပြန်လည်ရှူသွင်းကာ လက်နှစ်ဖက်ကို ခြေထောက်နဲ့ ခွာလိုက်ပြီး “C” ပုံသဏ္ဍာန် ပြုလုပ်လိုက်ပါ။
အဆင့် (၄) အသက်ရှူထုတ်ပြီးနောက်မှာတော့ ကြမ်းပြင်ပေါ်မှာ ပြန်လည်လှဲလျောင်းလိုက်ပါ။
သတိထားရမယ့်အချက်တစ်ခုက ခန္ဓာကိုယ်အပေါ်ပိုင်းကို ကြွလိုက်တဲ့အချိန်မှာ ခြေထောက်နှစ်ဖက်သည် ကြမ်းပြင်နဲ့ ထိကပ်နေဖို့လိုပါလိမ့်မယ်။
ခါးနာတတ် တဲ့ ကွီး တို့အနေနဲ့ ဒီ လေ့ကျင့်ခန်းကို ၆ ကြိမ်မှ ၈ ကြိမ်အထိ ပြုလုပ်ပေးရမှာဖြစ်ပါတယ်။
လေ့ကျင့်ခန်း (၂)
Source: Hit Academy
ဒီလေ့ကျင့်ခန်းကတော့ ခန္ဓာကိုယ်ကို အနေအထားမှန်အောင် ကူညီပေးပြီး ဝမ်းဗိုက်ကြွက်သားနှင့် ခါးအောက်ပိုင်းကိုလည်း သန်မာလာစေပါတယ်။
အဆင့် (၁) အရင်ဦးဆုံး ကြမ်းပြင်ပေါ်မှာ လေးဖက်ထောက်နေပါ။ လက်နှစ်ဖက်က ပုခုံးအောက်မှာ ထောက်ထားရပါမယ်။
အဆင့် (၂) ထို့နောက် ညာလက်ကို အရှေ့သို့ ဆန့်တန်းလိုက်ပါ။ တစ်ချိန်တည်းမှာပဲ ဘယ်ခြေထောက်ကို အနောက်သို့ ဆန့်တန်းလိုက်ပါ။
အဆင့် (၃) ခြေထောက်နှင့် လက် ပြန်ချပြီး မူလအနေအထားအတိုင်း ပြန်နေပါ။
အဆင့် (၄) ဘယ်လက်ကို အရှေ့သို့ ဆန့်တန်းတဲ့ အချိန်မှာ ညာခြေထောက်ကို အနောက်သို့ ဆန့်တန်းလိုက်ပါ။
အဆင့် (၅) မူလအနေအထားအတိုင်း ပြန်နေပါ။
ဘယ် ညာ တစ်လှည့်စီကို တစ်ကြိမ်လို့ သတ်မှတ်ပါ။ စုစုပေါင်း ၈ ကြိမ်မှ ၁၀ ကြိမ် ပြုလုပ်ပေးရမှာဖြစ်ပါတယ်။
လေ့ကျင့်ခန်း (၃)
Source: Menshealth
ဒီလေ့ကျင့်ခန်းကတော့ ခန္ဓာကိုယ်တစ်ခုလုံးရှိ ကြွက်သားများကို သန်မာလာအောင် ကူညီပေးပြီး ခါးနာခြင်းကိုလည်း သက်သာပျောက်ကင်းစေပါတယ်။
အဆင့် (၁) ကြမ်းပြင်ပေါ်တွင် တံတောင်နှစ်ဖက် ထောက်ထားကာ ခန္ဓာကိုယ်ကို တဖြောင့်တည်းဖြစ်အောင် ပြုလုပ်ပါ။
ထိုအနေအထားအတိုင်း စက္ကန့် ၃၀ ပြုလုပ်ပါ။ တဖြည်းဖြည်း ကျွမ်းကျင်လာပါက စက္ကန့် ၆၀ အထိ တိုးကာ ထပ်မံပြုလုပ်ပေးလိုက်ပါ။
လေ့ကျင့်ခန်း (၄)
Source: Gethealthyu
ဒီလေ့ကျင့်ခန်းကတော့ ခန္ဓာကိုယ်နောက်ကျောကြွက်သားများကို သန်မာလာစေပြီး ခါးနာခြင်းဝေဒနာကိုလည်း သက်သာပျောက်ကင်းစေပါတယ်။
အဆင့် (၁) ကြမ်းပြင်ပေါ်တွင် ဝမ်းလျားမှောက်နေပါ။ လက်နှစ်ဖက်က အရှေ့သို့ ဆန့်တန်းထားပါ။ ခြေထောက်နှစ်ဖက်ကိုလည်း အနောက်သို့ ဆန့်တန်းထားပါ။
အဆင့် (၂) လက်နှစ်ဖက်နှင့် ခြေထောက်နှစ်ဖက်ကို အပေါ်သို့ ကြွပေးလိုက်ပါ။ ရေကူးနေတဲ့ ပုံစံအတိုင်း ဖြစ်နေရပါမယ်။
အဆင့် (၃) မူလအနေအထားအတိုင်း ပြန်နေပါ။
ဒီလေ့ကျင့်ခန်းကိုလည်း စစချင်းပြုလုပ်တဲ့ရက်နေ့မှာ စက္ကန့် ၃၀ ပြုလုပ်ပေးရမှာဖြစ်ပြီး တဖြည်းဖြည်းကျွမ်းကျင်လာပါက စက္ကန့် ၆၀ အထိ တိုးကာ ပြုလုပ်ပေးလိုက်ပါ။
လေ့ကျင့်ခန်း (၅)
Source: Yogafred
အဆင့် (၁) အရင်ဦးဆုံး ဒူးနှစ်ဖက် ကွေးထားကာ ဒူးအပေါ်မှာ ခါးမတ်မတ်ထားပြီး ထိုင်နေပါ။ ထို့နောက် ခန္ဓာကိုယ်ကို တဖြည်းဖြည်းချင်းစီ အရှေ့သို့ ကိုင်းချလိုက်ပါ။ လက်နှစ်ဖက်က ကြမ်းပြင်နဲ့ ထိကပ်နေအောင် ပြုလုပ်ပေးလိုက်ပါ။
ထိုအနေအထားအတိုင်း စက္ကန့် ၃၀ ပြုလုပ်ပေးရပါမယ်။ တဖြည်းဖြည်းနဲ့ လေ့ကျင့်ခန်း ပြုလုပ်တဲ့အချိန်များလာပြီး ကျွမ်းကျင်လာတယ်ဆိုရင်တော့ စက္ကန့် ၆၀ အထိ တိုးကာ ပြုလုပ်ပေးရမှာဖြစ်ပါတယ်။
အထက်ဖော်ပြပါလေ့ကျင့်ခန်းများးသည် ခါးနာတတ် တဲ့ ကွီး တို့ကို ခါးနာသက်သာအောင် ကူညီပေးမယ့် လေ့ကျင့်ခန်း များပဲဖြစ်ပါတယ်။ နေ့စဉ်ပုံမှန်ပြုလုပ်ပေးသွားပါက ခါးနာခြင်းဝေဒနာ သက်သာပျောက်ကင်းသွားပါလိမ့်မယ်။
Source: Gethealthyu.com
Featured Image: Medical News Today
