တစ်နေ့တာလုံး အလုပ်များတဲ့ ကွီးတို့ကတော့ နေ့ဘက်မှာ အလုပ်လုပ်ပြီး ညဘက်ကျမှ အနားယူ အပန်းဖြေလေ့ရှိကြပါတယ်။ ရုပ်ရှင်လေး ကြည့်ရင်း အနားယူတာကလည်း နည်းလမ်းကောင်းတစ်ခုပဲဖြစ်ပါတယ်။ ဒါပေမဲ့ အခုဖော်ပြပေးမယ့် ဇာတ်ကား များကို ည ဘက်မှာ မကြည့်မိဖို့တော့ လိုပါတယ်။ ညဘက် ကြည့်မိလို့ ကြောက်လန့်ပြီး အိပ်မပျော်တော့ရင် တာဝန်မယူဘူးနော်။
(၁) Night Swim
မိသားစု တစ်စုက အိမ်အသစ်ဆီသို့ ပြောင်းရွေ့လာကြတဲ့ ဇာတ်လမ်းမျိုးကို သရဲကားတော်တော်များများကို တွေ့ဖူးကြပါလိမ့်မယ်။ ဒီတစ်ခါမှာလည်း ဒီလိုဇာတ်လမ်းလေးပါပဲ။ ဒါပေမဲ့ ဒီအိမ်ကြီးထဲမှာ ရေကူးကန် တစ်ကန် ရှိနေတာကတော့ ထူးခြားချက်ပါပဲ။ ဒီအိမ်ကြီးရဲ့ ရေကူးကန်ထဲမှာ အရင်က ဘာတွေ ဖြစ်ပျက်ခဲ့သလဲ။ အခုအသစ်ပြောင်းလဲတဲ့ မိသားစုတွေကို ဘယ်လိုမျိုး နှောင့်ယှက်မလဲဆိုတာ ရင်တထိတ်ထိတ်နဲ့ ကြည့်ချင်တယ်ဆိုရင်တော့ Night Swim ဆိုတဲ့ ဇာတ်ကားလေးကို ကြည့်ရှုနိုင်ပါတယ်။
Source: Universal Pictures
(၂) Lisa Frankenstein
ခပ်ချောချော ဆယ်ကျော်သက် ကောင်မလေးတစ်ယောက်မှာ ခရက်ရှ် ရှိနေတာကတော့ အထူးအဆန်းမဟုတ်ပါဘူး။ ထူးဆန်းတာကတော့ သူ့ရဲ့ ခရက်ရှ်က အလောင်းကောင် ဖြစ်နေတယ်ဆိုတာပါပဲ။ တစ်ရက်မှာတော့ မိုးကြိုးမုန်တိုင်းကြီး ကျပြီး ထိုအလောင်းကောင်က အသက် ပြန်ဝင်လာပါတော့တယ်။ အသက်ဝင်လာတဲ့ ဖုတ်ကောင်ကြီးက ထိုကောင်မလေးဆီ အပြေးသွားပါတော့တယ်။ ဒီလိုနဲ့ပဲ သူတို့နှစ်ယောက်ကြားထဲက ရင်ခုန်ကြည်နူးစရာ အချစ်ဇာတ်လမ်းလေးက စတင်လာခဲ့ပြီး ကောင်ကလေးရဲ့ ပျောက်ဆုံးနေတဲ့ ခန္ဓာကိုယ် အစိတ်အပိုင်းအချို့ကိုလည်း အတူတူ ရှာဖွေဖို့အတွက် ခရီးစခဲ့ကြပါတော့တယ်။
Source: Focus Features
(၃) Immaculate
Cecilia ဆိုတဲ့ သီလရှင်တစ်ပါးသည် အီတလီနိုင်ငံရှိ ဘုရားကျောင်းသို့ သွားရောက်ဝတ်ပြုဖို့အတွက် ဖိတ်ခေါ်ခံလိုက်ရပါတယ်။ ဒါပေမဲ့ ထိုနေရာမှာ ပုန်းကွယ်နေတဲ့ လျှို့ဝှက်ချက်တွေ၊ ကြောက်စရာကောင်းတဲ့ အရာတွေ ရှိနေတယ်ဆိုတာကိုတော့ သူ(မ)တစ်ယောက် မသိသေးပါဘူး။ ဒီလိုနဲ့ပဲ မသင်္ကာစရာကောင်းတာတွေကို တစ်ခုပြီး တစ်ခု ကြုံတွေ့ရခဲ့တဲ့နောက်မှာတော့ သူ(မ) ဘယ်လို တုန့်ပြန်မလဲဆိုတာ သိချင်တယ်ဆိုရင်တော့ ဒီဇာတ်ကားလေးကို ကြည့်ရှုနိုင်ပါတယ်။ မတ်လမှာ ထွက်ရှိမယ့် ဇာတ်ကားလေးဆိုတော့ ကွီးတို့ အခုချက်ချင်း ကြည့်လို့မရသေးပါဘူး။
Source: NEON
(၄) Abigail
လူတစ်ယောက်က လူမိုက်တစ်အုပ်စုကို ငှားရမ်းကာ ဘဲလေးအကသမားတစ်ယောက်ကို ပြန်ပေးဆွဲခိုင်းပါတယ်။ ထိုလူမိုက်အုပ်စု မသိသေးတာကတော့ သူတို့ ပြန်ပေးဆွဲလိုက်တဲ့ ကောင်မလေးရဲ့ လက်ထဲမှာ သူတို့ သေရမယ်ဆိုတာပါပဲ။ သူတို့ကို မက်လုံးပေးထားတာကတော့ ထိုကောင်မလေးရဲ့ အဖေက သူဌေးကြီးတစ်ယောက်ဖြစ်ပြီး သူ့ဆီကနေ ဒေါ်လာ သန်း ၅၀ တောင်းဖို့ပဲ ဖြစ်ပါတယ်။ ဒါပေမဲ့ အိမ်ကြီးတစ်လုံးထဲမှာ ကောင်မလေးနဲ့ သူတို့တွေပဲ ပိတ်မိပြီး ကျန်နေခဲ့တယ်ဆိုတာကို သိလိုက်တဲ့အချိန်မှာတော့ အချိန်နှောင်းသွားခဲ့ပါပြီ။
Source: Universal Trailer
(၅) Tarot
သူငယ်ချင်းအဖွဲ့ တစ်ဖွဲ့သည် ညဘက်မှာ လူစုကြပြီး ပျော်ပျော်ပါးပါး ဝိုင်းဖွဲ့ စားသောက်ကာ ပျော်ပါးနေကြပါတယ်။ ဒီလိုနဲ့ ဂိုထောင်ထဲမှာ တားရော ကတ်အဟောင်းများကို ထည့်သိမ်းထားတဲ့ ဘူးတစ်ဘူးကို တွေ့ခဲ့ပြီး ကတ်ဂိမ်း ဆော့ကစားဖို့ အကြောင်းဖန်လာပါတော့တယ်။ ဂိမ်းဆော့နေရင်းနဲ့ သူတို့အဖွဲ့ထဲက တစ်ယောက်က စည်းမျဥ်းချိုးဖောက်ပြီး ဆော့မိတဲ့အခါမှာတော့ မကောင်းဆိုးဝါးက ထွက်လာပါတော့တယ်။ ဒီလိုနဲ့ပဲ သူတို့ သူငယ်ချင်း တစ်ဖွဲ့ ကံဆိုးမိုးမှောင်ကျပြီး သေခြင်းတရားနဲ့ ရင်ဆိုင်ကြုံတွေ့ရပါတော့တယ်။
Source: Sony Pictures Entertainment
အခုဖော်ပြပေးမယ့် ဇာတ်ကားများကတော့ သည်းထိတ်ရင်ဖို ဇာတ်ကား ကြိုက်နှစ်သက်တဲ့ ကွီးတို့ နှစ်သက်မယ့် ဇာတ်ကားများပဲဖြစ်ပါတယ်။
ဒါပေမဲ့ အသည်းငယ်တဲ့ ကွီးတို့ကတော့ အခုဖော်ပြသွားတဲ့ ဇာတ်ကား များကို ည ဘက်မှာ ယောင်ပြီး မကြည့်မိဖို့တော့ လိုတယ်ဗျို့။
Source: Imdb
Featured Image:
