ခန္ဓာကိုယ်ရှိ ကြွက်သားများ၊ အရိုးအစိတ်အပိုင်းများသည် နေ့စဥ် အသုံးပြုနေရတာဖြစ်ပြီး တစ်ခုနှင့်တစ်ခုသည် အမြဲတမ်း ချိတ်ဆက်ကာ အလုပ်လုပ်ဆောင်နေကြရတာဖြစ်ပါတယ်။ ကွီးတို့ရဲ့ အဓိက ကြွက်သားတွေဖြစ်တဲ့ ခန္ဓာကိုယ် အလယ်ပိုင်းကြွက်သားများနှင့် ပေါင်ကြွက်သားများကို သန်မာလာအောင် ပြုလုပ်မယ်ဆိုရင်တော့ ဒူးနာ သက်သာ သွားဖို့အတွက် ကူညီပေးနိုင်ပါတယ်။
အသက်အရွယ်ကြောင့် ဒူးနာရင်ပဲဖြစ်ဖြစ်၊ ကိုယ့်ရဲ့ ခန္ဓာကိုယ် အလေးချိန်ကြောင့် ဒူးနာလာရင်ပဲဖြစ်ဖြစ် အကြောင်းအမျိုးမျိုးကြောင့် ဒူးနာလာတဲ့အခါ အခုဖော်ပြပေးမယ့် လေ့ကျင့်ခန်းများကို ပြုလုပ်မယ်ဆိုရင် ဒူးနာ သက်သာ လာမှာပဲဖြစ်ပါတယ်။
လေ့ကျင့်ခန်း (၁)
အဆင့် (၁) ခန္ဓာကိုယ်ကို ဘေးတစ်ဖက်ခြမ်းစောင်းကာ လှဲလျောင်းနေပါ။ တံတောင်တစ်ဖက်ကို ကွေးထားပြီး လက်မောင်းပေါ်တွင် ခေါင်းချထားလိုက်ပါ။
အဆင့် (၂) အောက်ကို ခြေထောက်ကို အနည်းငယ် ကွေးထားပြီး အပေါ်က ခြေထောက်ကို ဆန့်တန်းထားပါ။
အဆင့် (၃) ထို့နောက် အပေါ်က ခြေထောက်ကို အပေါ်သို့ ဖြည်းဖြည်းချင်းစီ ကြွလိုက်ပါ။ စက္ကန့် အနည်းငယ်ကြာအောင် အပေါ် မြှောက်ထားပါ။ ထို့နောက် မူလအနေအထားအတိုင်း ပြန်နေပါ။
မိမိလုပ်နိုင်တဲ့ အကြိမ်အရေအတွက် ပြည့်သည်အထိ ပြုလုပ်ပါ။
အားလုံး ပြီးသွားတဲ့အခါမှာတော့ အခြားတစ်ဖက်သို့ ရွေ့ကာ နောက်ထပ် ဆက်လုပ်ပေးရပါမယ်။
လေ့ကျင့်ခန်း (၂)
အဆင့် (၁) ကြမ်းပြင်ပေါ်တွင် ခြေထောက်နှစ်ဖက်က ဆန့်တန်းကာ လှဲလျောင်းနေပါ။ လက်နှစ်ဖက်က ဗိုက်ပေါ်မှာ တင်ထားနိုင်သလို၊ ကြမ်းပြင်ပေါ်မှာ ချထားလို့လည်း ရပါတယ်။
အဆင့် (၂) ညာခြေကို ဆန့်တန်းကာ အပေါ်သို့ မြှောက်ပါ။ အပေါ်သို့ မြှောက်ထားလျက်သားဖြင့် စက္ကန့် အနည်းငယ်ကြာအောင် တောင့်ထားပါ။
အဆင့် (၃) ထို့နောက် မူလအနေအထားအတိုင်း ပြန်နေပါ။ မိမိလုပ်နိုင်တဲ့ အကြိမ်အရေအတွက်အထိ ပြုလုပ်ပါ။ ကျန်တစ်ဖက်ကိုလည်း ထိုနည်းအတိုင်း ပြုလုပ်ရပါမယ်။
လေ့ကျင့်ခန်း (၃)
ဒီလေ့ကျင့်ခန်းကတော့ စောစောက လေ့ကျင့်ခန်းနဲ့ အတူတူပါပဲ။
အဆင့် (၁) ကြမ်းပြင်ပေါ်တွင် ခြေထောက်နှစ်ဖက် ဆန့်တန်းကာ လှဲလျောင်းနေပါ။ ထို့နောက် လက်နှစ်ဖက်က ညာဘက် ပေါင်ရင်းကို ကိုင်ထားပြီး ခြေထောက်ကို အပေါ်သို့ မြှောက်ပါ။ စက္ကန့် အနည်းငယ်ကြာအောင် မြှောက်ထားပါ။
အဆင့် (၂) ထို့နောက် ခြေထောက်ကို မူလအနေအထားအတိုင်း ပြန်ချပါ။
မိမိလုပ်နိုင်တဲ့ အကြိမ်အရေအတွက် ပြည့်သည်အထိ ပြုလုပ်ပါ။ ကျန်တစ်ဖက်ကိုလည်း ထိုနည်းအတိုင်း ပြုလုပ်ရပါမယ်။
လေ့ကျင့်ခန်း (၄)
အဆင့် (၁) ခြေထောက်နှစ်ဖက်ကို ပုခုံးအကျယ်အတိုင်း ချဲထားပြီး မတ်တပ်ရပ်နေပါ။
အဆင့် (၂) ညာဒူးကို အနောက်သို့ ကွေးကာ ခြေဖဝါးနဲ့ တင်ပါးနဲ့ ထိကပ်သွားအောင် ပြုလုပ်ပါ။ ထိုအနေအထားအတိုင်း စက္ကန့် အနည်းငယ်ကြာအောင် ပြုလုပ်ပါ။
အဆင့် (၃) ထို့နောက် မူလအနေအထားအတိုင်း ပြန်နေပါ။
မိမိလုပ်နိုင်တဲ့ အကြိမ်အရေအတွက် ပြည့်သည်အထိ ပြုလုပ်ပါ။
ကျန်တစ်ဖက်ကိုလည်း ထိုနည်းအတိုင်း ပြုလုပ်ရပါမယ်။
Source: Hss.edu
Featured Image: Freepik
