အမ်ဘာပေ ဟာ ပြင်သစ်နဲ့အတူ နိုင်ငံတကာပွဲကစားဖို့ တာဝန်နဲ့ ရောက်ရှိနေချိန်အတွင်း ပေါ့ဂ်ဘာကို ၎င်းရဲ့ မပျော်မရွှင်ဖြစ်နေမှုကို ထုတ်ဖော်ပြသခဲ့ပြီးနောက် ပီအက်စ်ဂျီ အသင်းကို စွန့်ခွာနိုင်ကြောင်း ကြီးမားတဲ့ သဲလွန်စပေးခဲ့ပါတယ်။
Photo: L’Equipe
အမ်ဘာပေရဲ့ အနာဂတ်ဟာ တစ်ရာသီလုံး ပြင်းထန်တဲ့ ကောလာဟလတွေရဲ့ပစ်မှတ်ဖြစ်နေခဲ့တာဖြစ်ပြီး ပြီးခဲ့တဲ့နွေရာသီမှာ ရီးရဲလ်မက်ဒရစ်က ပြင်သစ်တိုက်စစ်မှူးအတွက် ကြီးမားတဲ့ကမ်းလှမ်းမှုတွေ ဆက်တိုက်ပြုလုပ်ခဲ့ပေမယ့်လည်း မအောင်မြင်ခဲ့တာဖြစ်ပါတယ်။ ရီးရဲလ်မက်ဒရစ်ဟာ အမ်ဘာပေအတွက် ပေါင် ၁၈၉ သန်းလောက်အထိ ကမ်းလှမ်းခဲ့တယ်လို့ သတင်းတွေက ဖော်ပြခဲ့ပြီး ပီအက်စ်ဂျီအသင်းက အသက် ၂၃ နှစ်အရွယ်တိုက်စစ်မှူးကို ဆက်လက်ထိန်းသိမ်းထားချင်တာကြောင့် ငြင်းပယ်ခဲ့တာ ဖြစ်ပါတယ်။
မိုနာကိုကြယ်ပွင့်ဟောင်းဟာ ယခုရာသီကုန်မှာ အသင်းနဲ့ စာချုပ်သက်တမ်းကုန်ဆုံးတော့မှာဖြစ်ပြီး ဇန်နဝါရီလကတည်းက ပြည်ပကလပ်အသင်းတွေနဲ့ တရားဝင် အကြိုသဘောတူစာချုပ် ချုပ်ဆိုဖို့ ဆွေးနွေးခွင့် ရရှိခဲ့တာဖြစ်ပါတယ်။ ပီအက်စ်ဂျီအသင်းဟာ ကြယ်ပွင့်တိုက်စစ်မှူးကို အသင်းမှာ ဆက်လက်ထိန်းသိမ်းထားနိုင်ဖို့ ကြိုးပမ်းတဲ့အနေနဲ့ ဘောလုံးသမိုင်းမှာ လစာအမြင့်မားဆုံးကစားသမားဖြစ်လာမယ့် အခွင့်အရေးကို ကမ်းလှမ်းခဲ့တယ်လို့ သိပါတယ်။
Photo: Marca
အမ်ဘာပေဟာ ၎င်းရဲ့အနာဂတ်နဲ့ပတ်သက်ပြီး နောက်ဆုံး ဆုံးဖြတ်ချက်ကို မကြေညာသေးပေမယ့်လည်း လက်ရှိမှာတော့ နိုင်ငံတကာပွဲကစားဖို့ တာဝန်နဲ့ လက်ရွေးစင်အသင်းကို ရောက်ရှိနေချိန်မှာ ပေါ့ဂ်ဘာနဲ့ တွေ့ဆုံခဲ့ပြီးနောက် ပီအက်စ်ဂျီကထွက်ခွာနိုင်တယ်ဆိုတာကို ကြီးမားတဲ့ သဲလွန်စပေးလိုက်ပြီဖြစ်ပါတယ်။ ပြင်သစ်အသင်း စခန်းသွင်းနေရာကနေ ထွက်ပေါ်လာတဲ့ ဗီဒီယိုထဲမှာ ပေါ့ဂ်ဘာက ကလဲယာဖောင်တိန်မှာရှိတဲ့ ပြင်သစ်အသင်းရဲ့လေ့ကျင့်ရေးစခန်းမှာ အမ်ဘာပေကို နှုတ်ဆက်ခဲ့တာကို မြင်တွေ့ခဲ့ရပါတယ်။
မန်ချက်စတာယူနိုက်တက်ကွင်းလယ်ကြယ်ပွင့်က ၎င်းရဲ့လက်ရွေးစင်အသင်းဖော်ကို ပီအက်စ်ဂျီမှာ ဘယ်လိုခံစားနေရလဲလို့ မေးမြန်းခဲ့ရာမှာ အမ်ဘာပေက “ကျွန်တော် အရမ်းကို စိတ်ကုန်နေပြီ”လို့ ပြန်ပြောခဲ့တာဖြစ်ပါတယ်။ အမ်ဘာပေဟာ ရီးရဲလ်မက်ဒရစ်အသင်းကို ရှုံးနိမ့်ခဲ့တဲ့ ချန်ပီယံလိဂ် ၁၆သင်းရှုံးထွက်အဆင့် ၂ ကျော့စလုံးမှာ ဂိုးသွင်းယူပေးခဲ့သူဖြစ်ပေမယ့် အသင်းဖော်တွေရဲ့ သာမန်ခြေစွမ်းအောက်ရောက်နေတဲ့ စွမ်းဆောင်ရည်ကြောင့် ၃-၂ နဲ့ ရှုံးနိမ့်ပြီး ချန်ပီယံလိဂ်ပြိုင်ပွဲကနေ ထွက်ခွာခဲ့ရတာဖြစ်ပါတယ်။
Photo: Sportbible
