လေးညှင်းဆီ ကို သဘာဝအကိုက်အခဲ ပျောက်ဆေးအဖြစ် အသုံးပြုကြပြီး အထူးသဖြင့် သွားကိုက်သွားနာ ပြဿနာတွေကို ကုစားနိုင်တဲ့ သဘာဝဆေးအဖြစ် လူသိများပါတယ်။ တကယ်တော့ လေးညှင်းဆီဟာ ဝက်ခြံ ပြဿနာတွေကို ကုသနိုင်တဲ့ သဘာဝပစ္စည်းတစ်ခုလည်း ဖြစ်ပါတယ်။ လေးညှင်းဆီ မှာ ဘက်တီးရီးယားပိုးမွှားတွေကို သေစေနိုင်တဲ့ ဂုဏ်သတ္တိတွေ ပါဝင်ပြီး အရေပြားပေါ်က အညစ်အကြေးတွေကို ဖယ်ရှားသန့်စင်ပေးတာကြောင့် ဝက်ခြံကြောင့်ဖြစ်ပေါ်လာတဲ့ ရောင်ရမ်းမှုနဲ့ နာကျင်ကိုက်ခဲမှုဝေဒနာတွေကိုလည်း သက်သာစေပါတယ်။ ဒီဆောင်းပါးလေးမှာတော့ ဝက်ခြံ ပြဿနာတွေ အတွက် လေးညှင်းဆီ ကို အသုံးပြုနိုင်မယ့် နည်းလမ်းအဆင့်ဆင့်ကို ပြောပြပေးချင်ပါတယ်။
နည်းလမ်း (၁)
Photo : Healthline
နည်းလမ်း (၁) အတွက် လိုအပ်တဲ့ ပစ္စည်းတွေကတော့ လေးညှင်းဆီ ၂ စက် ၊ အဆီမပါတဲ့ အစိုဓာတ်ထိန်းခရမ်င် ၊ အဆီမပါတဲ့ မျက်နှာသန့်စင်ဆေး တို့ပဲ ဖြစ်ပါတယ်။
အသုံးပြုနည်းအဆင့်ဆင့်
လေးညှင်းဆီကို ကွီးတို့ရဲ့ မျက်နှာပေါ်က ဝက်ခြံဖြစ်ပေါ်နေတဲ့ နေရာတွေမှာ အစက်ချလိုက်ပါ။ ပြီးရင် ၁၀ မိနစ်လောက် ထားလိုက်ပါ။ အချိန်ပြည့်သွားတဲ့အခါ မျက်နှာကို Oil-Free Facial Cleanser နဲ့ ဆေးကြောသန့်စင်ပြီး ရေခြောက်အောင်သုတ်ကာ အဆီမပါတဲ့ အစိုဓာတ်ထိန်းခရမ်င် လိမ်းပေးရမှာဖြစ်ပါတယ်။ တစ်ပတ်ကို ၂ – ၅ ကြိမ်ခန့် ပြုလုပ်ရုံနဲ့ ဝက်ခြံတွေ သက်သာသွားစေမှာ ဖြစ်ပါတယ်။
နည်းလမ်း (၂)
Photo : HealthifyMe
နည်းလမ်း (၂) အတွက် လိုအပ်တဲ့ ပစ္စည်းတွေကတော့ လေးညှင်းဆီ ၃ – ၄ စက် ၊ အုန်းဆီ စားပွဲတင်ဇွန်း ၁ ဇွန်းနဲ့ ရေနွေး တို့ပဲ ဖြစ်ပါတယ်။
အသုံးပြုနည်းအဆင့်ဆင့်
အရင်ဆုံး ချွေးပေါက်တွေ ပွင့်စေဖို့ မျက်နှာကို ရေနွေးငွေ့နဲ့ ၅ မိနစ်လောက် ပေါင်းခံပေးပါ။ ပြီးတဲ့ အခါ ပန်းကန်တစ်ခုထဲမှာ လေးညှင်းဆီနဲ့ အုန်းဆီတို့ကို ရောထည့်ပြီး သမအောင်မွှေပေးပါ။ ရလာတဲ့အဆီကို မျက်နှာပေါ်အနှံ့သေချာလိမ်းပြီး စက်ဝိုင်းပုံသဏ္ဌာန် နှိပ်နယ်ပေးရပါမယ်။ ဝက်ခြံထွက်တဲ့နေရာတွေကို အဓိကသေချာလေး နှိပ်ပေးပြီး ၁၀ မိနစ်လောက်ထားလိုက်ပါ။ အချိန်ပြည့်ရင်တော့ Oil-Free Facial Cleanser နဲ့ မျက်နှာသစ်လိုက်လို့ရပါပြီ။ တစ်ရက်ကို တစ်ကြိမ်ခန့် ပြုလုပ်ပေးနိုင်ပါတယ်။
နည်းလမ်း (၃)
Photo : Medical News Today
နည်းလမ်း (၃) အတွက် လိုအပ်တဲ့ ပစ္စည်းတွေကတော့ လေးညှင်းဆီ ၃ – ၄ စက် ၊ သံလွင်ဆီစားပွဲတင်ဇွန်း ၁ ဇွန်းနဲ့ ရေနွေး တို့ပဲ ဖြစ်ပါတယ်။ ၁၀၀ ရာခိုင်နှုန်း သံလွင်ဆီစစ်စစ်ကို အသုံးပြုဖို့ အကြံပြုချင်ပါတယ်။ သံလွင်ဆီဟာ အသားအရေကို အာဟာရဓာတ်ဖြည့်တင်းပေးပြီး ဝက်ခြံပြဿနာနဲ့ ဝက်ခြံအမာရွတ်တွေကို ပျောက်ကင်းစေကာ ကွီးတို့ရဲ့အသားအရေကို စိုပြေဝင်းမွတ်စေမှာ ဖြစ်ပါတယ်။
အသုံးပြုနည်းအဆင့်ဆင့်
ဒီနည်းလမ်းလေးက နည်းလမ်း ၂ နဲ့ ဆင်တူပါတယ်။ အရင်ဆုံး မျက်နှာပေါ်က ချွေးပေါက်တွေ ပွင့်စေဖို့ မျက်နှာကို ရေနွေးငွေ့နဲ့ ၅ မိနစ်လောက် ပေါင်းခံပေးပါ။ ပြီးတဲ့အခါ ပန်းကန်တစ်ခုထဲမှာ လေးညှင်းဆီနဲ့ သံလွင်ဆီတို့ကို ရောထည့်သမအောင်မွှေပေးပြီး မျက်နှာပေါ်မှာ စက်ဝိုင်းပုံစံ ညင်သာစွာ နှိပ်နယ်လိမ်းပေးရပါမယ်။ ဝက်ခြံထွက်တဲ့နေရာတွေကို အဓိကထားသေချာလေး နှိပ်ပေးဖို့လိုပါတယ်။ ပြီးတဲ့အခါ ၁၀ မိနစ်လောက်ထားလိုက်ပါ။ အချိန်ပြည့်ရင်တော့ Oil-Free Facial Cleanser နဲ့ မျက်နှာသစ်လိုက်လို့ရပါပြီ။ ဒီနည်းလမ်းလေးအတိုင်း တစ်ရက်ကို တစ်ကြိမ်ပြုလုပ်နိုင်ပါတယ်။
Featured Photo : MensXP
