အဝလွန်တယ်ဆိုတာဟာ မှားယွင်းတဲ့ နေထိုင်မှု ပုံစံတွေနဲ့ အစားအသောက် အလွန်အကျွံ စားသုံးခြင်းကြောင့် ဖြစ်လာတဲ့ နောက်ဆက်တွဲ ပြဿနာတစ်ခုပါပဲ။ အစားအသောက် စားတဲ့အခါမှာ လိုတာထက်ပိုပြီး အလွန်အကျွံ စားသုံးခြင်းက ကိုယ်အလေးချိန်တက်စေပြီး အဝလွန်ခြင်းကို ဦးတည်နေတာပါ။ ” ဆာလောင်မှုကို လျစ်လျူရှု့ဖို့က အမြဲတမ်း မလုပ်မဖြစ်ဘူး ” လို့ နာမည်ကျော်ကြား လူကြိုက်များတဲ့ Diet Programs တွေက ပြောထားပါတယ်။ သေချာပါတယ် ဆာလောင်မှုကို ကျွန်တော်တို့ အချိန်ဘယ်လောက်ကြာကြာ လျစ်လျူရှုနိုင်မှာလဲ။ တစ်လ သို့မဟုတ် နှစ်လ လား။ အချိန်ကာလတစ်ခု ကြာလာတာနဲ့အမျှ စားသင့်တဲ့ အစာပမဏကို မစားပေးဘူးဆိုရင် ကျန်းမာရေးကို ဆိုးဆိုးရွားရွားထိခိုက်လာစေနိုင်တယ်ဆိုတာလည်း သတိပြုသင့်ပါတယ်။ အကယ်၍ ကွီးတို့က ကိုယ်အလေးချိန် လျော့ချချင်သူတစ်ယောက် ဒါမှမဟုတ် မကြာခဏ စားသောက်နေမိတဲ့ အကျင့်ကို ထိန်းချုပ်ချင်သူတစ်ယောက်ဆိုရင် အခုပြောပြမယ့် ကွီးတို့ကို အချိန်ကြာကြာ ဗိုက်ပြည့် နေစေပြီး အစားအသောက် အလွန်အကျွံ စားချင်တဲ့ စိတ်ကိုလျော့ချပေးနိုင်မယ့် အကောင်းဆုံး အစားအစာ တွေ အကြောင်း သိထားသင့်ပါတယ်။
(၁) ပဲမဲ
Photo : The Spruce Eats
Black Beans လို့ခေါ်တဲ့ ပဲမဲ ခွက်တစ်ဝက်ဟာ အမျှင်ဓာတ် ၆ ဂရမ် ၊ ပရိုတင်းဓာတ် ၆ ဂရမ်နဲ့ အာဟာရဓာတ်ကြွယ်ဝတဲ့ ကာဗိုဟိုက်ဒရိတ် ၁၇ ဂရမ်တို့ကို ထောက်ပံ့ပေးတာကြောင့် အချိန်ကြာမြင့်စွာ ဗိုက်ပြည့် နေစေဖို့ ကူညီပေးပါတယ်။ ပဲမဲ ကို ဟင်းချိုအဖြစ် စားသုံးနိုင်သလို ပဲပေါင်း ၊ ပဲနှပ် ဟင်းလျာတွေအဖြစ်လည်း အရသာရှိရှိ ဖွယ်ဖွယ်ရာရာ ချက်ပြုတ်စားနိုင်ပါတယ်။
(၂) ပဲစိမ်း
Photo : Make Your Meals
ပဲစိမ်းဟာ Black Beans တွေနဲ့ အာဟာရဓာတ် ပါဝင်မှု တူညီပါတယ်။ ပဲစိမ်းတွေမှာ ပရိုတင်းဓာတ်ပါဝင်မှု မြင့်မားတာကြောင့် ကိုယ်အလေးချိန်လျော့ချနေသူတွေနဲ့ သားသတ်လွတ်စားသူတွေအတွက် အထူးသင့်လျော်ပါတယ်။ ပဲစိမ်း ခွက်တစ်ဝက်စာမှာ အမျှင်ဓာတ် ၅ ဂရမ် ၊ ပရိုတင်း ၈ ဂရမ်နဲ့ ကာဗိုဟိုက်ဒရိတ် ၁၂ ဂရမ် ပါဝင်ပါတယ်။
(၃) ကြက်သား
Photo : www.self.com
ကြက်သားကတော့ အားကစားသမားတွေ ၊ Gym ကစားသူတွေအတွက် အသင့်လျော်ဆုံး အစားအစာ တစ်ခုဖြစ်ပါတယ်။ ကြက်သား ၄ အောင်စ အရွယ် တစ်တုံးမှာ ပရိုတင်းဓာတ် ၂၄ ဂရမ် ပါဝင်ပါတယ်။ အသားဓာတ် (ပရိုတင်း) က ဆာလောင်မွတ်သိပ်မှုကို လျော့ချပေးနိုင်တာကြောင့် ဝိတ်ချနေတဲ့သူတွေ စားသုံးပေးနိုင်ပါတယ်။
(၄) ဆယ်လ်မွန်ငါး
Photo : Medical News Today
ဆယ်လ်မွန်ငါးဟာ ကြက်သားနည်းတူ ပရိုတင်းဓာတ်ကြွယ်ဝတဲ့ အစားအစာ တစ်ခုဖြစ်ပေမယ့် မတူတဲ့အချက်တစ်ခုက Omega-3 Fatty Acids ဓာတ်အများအပြား ပါဝင်နေတာဖြစ်ပါတယ်။ ဆယ်လ်မွန်ငါး ၅ အောင်စခန့်မှာ ပရိုတင်း ၂၇ ဂရမ်နဲ့ ကျန်းမာတဲ့ အဆီ ၂၂ ဂရမ် ပါဝင်ပါတယ်။ အာဟာရဆိုင်ရာ ကျွမ်းကျင်သူတွေကတော့ တစ်ပတ်ကို ၂ ကြိမ်ကနေ ၃ ကြိမ်ခန့် ငါး စားသုံးဖို့ တိုက်တွန်းထားပါတယ်။
(၅) Oatmeal
Photo : Cooking Light
Oatmeal ဟာ ပရိုတင်းနဲ့ အမျှင်ဓာတ် နှစ်မျိုးစလုံး ကြွယ်ဝစွာပါရှိတဲ့ အံ့သြသင့်ဖွယ် အစေ့အဆန်တစ်မျိုး ဖြစ်ပါတယ်။ Oatmeal ကို လတ်ဆတ်တဲ့ ဘယ်ရီသီးတွေနဲ့ ရောစပ်ပြီး အာဟာရ ပြည့်ဝတဲ့ မနက်စာတစ်မျိုး အဖြစ် စားသုံးနိုင်ပါတယ်။ Whole-Grain Oatmeal တစ်ခွက်မှာ အမျှင်ဓာတ် ၄ ဂရမ် ၊ ပရိုတင်း ၅ ဂရမ်နဲ့ ကာဗိုဟိုက်ဒရိတ် ၄၂ ဂရမ် ပါဝင်ပြီး မနက်စာအဖြစ် စားသုံးပါက နေ့လည်အထိ အဆာခံနိုင်မှာပဲ ဖြစ်ပါတယ်။
(၆) ပဲပြား
Photo : Foodly
ပဲပြားဟာ အသားအစားထိုး အစားအစာ တစ်မျိုး ဖြစ်ပြီး ပြင်ဆင်ချက်ပြုတ်ရ လွယ်ကူသလို အရသာလည်း ရှိပါတယ်။ ပဲပိစပ်ကနေ ထုတ် လုပ်ထားတဲ့အတွက် ကယ်လိုရီနည်းပြီး ကျန်းမာရေးနဲ့ ညီညွတ်ပါတယ်။ ပဲပြား တစ်တုံးမှာ ပရိုတင်းဓာတ် ၉ ဂရမ် ပါဝင်နေပါတယ်။
(၇) မုယောစပါး
Photo : Epigrain
Barley လို့ခေါ်တဲ့ မုယောစပါးတွေက ကျန်းမာရေးအတွက် အလွန်ကောင်းမွန်တဲ့ အစားအစာ တစ်မျိုး ဖြစ်ပါတယ်။ မုယောစပါးကို အာဟာရပြည့်ဝတဲ့ မနက်စာအဖြစ် စားနိုင်သလို အသီးအရွက်ဟင်းချိုတွေထဲမှာ ထည့်ချက်ခြင်းဖြင့်လည်း ဟင်းချိုရဲ့အရသာကို ပိုမိုလေးနက်ကောင်းအောင် ဖန်တီးပေးပါတယ်။ မုယောစပါး ခွက်တစ်ဝက်မှာ အမျှင်ဓာတ် ၃ ဂရမ် ၊ ပရိုတင်း ၂ ဂရမ်နဲ့ အစာချေစနစ်ကိုနှေးစေတဲ့ ကာဗိုဟိုက်ဒရိတ် ၂ ဂရမ်တို့ ပါဝင်ပါတယ်။
Featured Photo : Eat This, Not That
