အနာခံမှ အသာစံရမယ်ဆိုတဲ့ စကားလိုပဲ ကျစ်လျစ်ပြီး အဆီပိုကင်းတဲ့ ခန္ဓာကိုယ် အချိုးအစားမျိုး ပိုင်ဆိုင်ချင်တယ်ဆိုရင်တော့ လေ့ကျင့်ခန်း မှန်မှန် ပြုလုပ်ဖို့ လိုအပ်ပါတယ်။ လေ့ကျင့်ခန်း ပြုလုပ်တဲ့အခါမှာလည်း ပထမရက်အတွက်ဆိုရင် လက်မောင်း ကြွက်သားများအတွက်၊ ဒုတိယရက်မှာဆိုရင် ရင်အုပ်ကြွက်သားများအတွက်၊ တတိယရက်မှာဆိုရင် ဝမ်းဗိုက်ကြွက်သားများအတွက်၊ စတုတ္ထရက်မှာဆိုရင် ခြေသလုံး ကြွက်သားများအတွက် စသည်ဖြင့် သူ့ရက်အလိုက် ဆော့ကစား ပေးသင့်ပါတယ်။ တချို့ကတော့ ခန္ဓာကိုယ် အပေါ်ပိုင်း ကြွက်သားများအတွက် အားတက်သရော ဆော့ကစားလေ့ရှိပေမယ့် အောက်ပိုင်း ထိုင်တဲ့ ရက် တွေဆိုရင်တော့ သိပ် မဆော့ချင်ကြပါဘူး။ ဘာ့ကြောင့်လဲဆိုတော့ အောက်ပိုင်းထိုင်ပြီးတဲ့အခါ တွားသွားရလောက်တဲ့အထိကို ခြေထောက်တွေက နာကျင်ပြီး မလှုပ်နိုင်လို့ပါ။

အောက်ပိုင်း ထိုင်တဲ့ ရက် မှာ ဒီလိုမျိုး နာကျင်နေရခြင်းက အကြောင်းအရင်း အမျိုးမျိုး ရှိနိုင်ပါတယ်။ ကွီးတို့က အခုမှ ပထမဦးဆုံး ဆော့ကစားတဲ့ Beginner သမားမို့လို့လည်း ဖြစ်နိုင်သလို ကွီးတို့က သွေးပူ လေ့ကျင့်ခန်းတွေ၊ အကြောလျော့ လေ့ကျင့်ခန်းတွေကို မလုပ်လို့လည်း ဖြစ်နိုင်ပါတယ်။ အဲ့ဒါကြောင့်မို့လို့ အောက်ပိုင်း ထိုင်ပြီးတဲ့အခါ နာကျင်နေရခြင်းဖြစ်ပါတယ်။

နာကျင်မှုကို ပြေလျော့ချင်တယ်ဆိုရင်တော့ အခုဖော်ပြပေးမယ့် နည်းလမ်းများကို အသုံးပြုနိုင်ပါတယ်။

(၁) သွေးပူ လေ့ကျင့်ခန်း ပြုလုပ်ပါ

ဘယ် Workout Plan ပဲ ရွေးရွေး အဓိကကတော့ သွေးပူ လေ့ကျင့်ခန်းကို မမေ့မလျော့ ပြုလုပ်ရမှာဖြစ်ပါတယ်။ ကိုယ် လုပ်မယ့် လေ့ကျင့်ခန်းအားလုံး မစခင်မှာ သွေးပူ လေ့ကျင့်ခန်းကို ၅ မိနစ်ခန့် ဆော့ကစားပေးရမှာဖြစ်ပါတယ်။ သွေးပူ လေ့ကျင့်ခန်းများကို (၅) မိနစ်ခန့် ဆော့ကစားပြီးမှ ကိုယ် ဆက်လုပ်ရမယ့် လေ့ကျင့်ခန်းများကို ဆက်လက် ဆော့ကစားပေးနိုင်ပါပြီ။

(၂) Foam Rolling အတုံးလေးနဲ့ လှိမ့်ပေးပါ

နာကျင်နေတဲ့ ခန္ဓာကိုယ် အစိတ်အပိုင်းရဲ့ အောက်မှာ Foam Rolling အတုံးလေး ထားပြီး လှိမ့်ပေးလိုက်ခြင်းအားဖြင့် ကွီးတို့ရဲ့ နာကျင်ခြင်းတွေကို သက်သာ လျော့နည်းသွားစေပါတယ်။ Foam Rolling ဒလှိမ့်တုံးလေးများက နာကျင်နေတဲ့ ကြွက်သားများကို နာကျင်မှု လျော့နည်း သွားစေပြီး ကြွက်သားများကိုလည်း ပြန်လည် ပြုလုပ်ပေးပါတယ်။ သွေးလှည့်ပတ်မှုကိုလည်း ကောင်းမွန်စေပြီး ချိတ်ဆက် ကြွက်သားများရဲ့ အလုပ် လုပ်ဆောင်မှုကိုလည်း တိုးမြှင့်ပေးနိုင်ပါတယ်။

(၃) အကြောလျော့ လေ့ကျင့်ခန်း ပြုလုပ်ပါ

လေ့ကျင့်ခန်းများ အားလုံး ပြုလုပ်ပြီးပြီဆိုတာနဲ့ အကြောလျော့ လေ့ကျင့်ခန်းများသည် မဖြစ်မနေ ပြုလုပ်ပေးဖို့ လိုအပ်ပါတယ်။ အကြောလျော့ လေ့ကျင့်ခန်း ပြုလုပ်ပေးခြင်းကြောင့် လေ့ကျင့်ခန်း ပြုလုပ်စဥ်က နာကျင်နေတဲ့ အရာများကို သက်သာပျောက်ကင်းသွားအောင် ကူညီပေးနိုင်ပါတယ်။

(၄) နှိပ်နယ်ပေးပါ (သို့) အနှိပ်ခံပါ

ကွီးတို့က မခံမရပ်နိုင်အောင် နာကျင်နေတယ်ဆိုရင်တော့ ကိုယ့် ခြေထောက်လေးကို ခပ်ဖွဖွလေး နှိပ်နယ်ပေးနိုင်ပါတယ်။ ဒါမှမဟုတ်လည်း ကျွမ်းကျင် အနှိပ်သည်တွေထံမှာ သွားရောက် အနှိပ်ခံကာ နာကျင်မှုကို လျော့နည်း သက်သာအောင် ပြုလုပ်နိုင်ပါတယ်။

(၅) အကိုက်အခဲ ပျောက်ဆေးသောက်ပါ

ဒီအချက်ကတော့ ဘယ်လိုမှ မသက်သာတဲ့အဆုံးမှ ပြုလုပ်ရမှာဖြစ်ပါတယ်။ ကိုယ့် စိတ်နဲ့ ကိုယ့်ဘာသာကိုယ် သောက်လိုက်တာထက် ဆရာဝန်ရဲ့ ညွှန်ကြားချက်ရရှိမှ သောက်တာကတော့ အကောင်းဆုံးပါပဲ။ ဘာ့ကြောင့်လဲဆိုတော့ အကိုက်အခဲ​ ပျောက်ဆေးများက အစာအိမ်က ထိနိုင်တဲ့အတွက်ကြောင့် ကွီးတို့က အစာအိမ်သမားဆိုရင် ပိုပြီး သတိထားသင့်ပါတယ်။

(၆) အိပ်ရေး ဝဝ အိပ်စက်ပါ

ဒီအချက်ကတော့ အကောင်းဆုံးပါပဲ။ အောက်ပိုင်း ထိုင်ပြီးလို့ မခံမရပ်နိုင်အောင် နာကျင်နေတဲ့အခါ ခဏတဖြုတ်လေး အနားပေးပြီး တရေးလိုက် အိပ်စက် အနားယူလိုက်ပါ။ ညဘက်မှာလည်း အိပ်ရေးဝဝ အိပ်စက် အနားယူဖို့ လိုအပ်ပါတယ်။ ဒါမှသာလျှင် ကုန်ဆုံးသွားတဲ့ အားအင်များအတွက် ခွန်အား ပြန်လည် ပြည့်ဝမှာဖြစ်ပြီး နာကျင်နေတဲ့ ကြွက်သားများလည်း အနားရမှာဖြစ်ပါတယ်။

ဒါတွေ ဖတ်ပြီးသွားတာတောင်မှ အောက်ပိုင်းထိုင်နေဖို့ ကြောက်နေတုန်းလားဗျာ။

Source: Spryngme

Featured Image: Steelsupplements