အသက်ကြီးလာရင် ကိုယ်ခန္ဓာဖွဲ့စည်းပုံပါ ပျက်လာတာ မဟုတ်ပါဘူး။ မှတ်ဉာဏ်နဲ့ ဦးနှောက်စွမ်းဆောင်ရည်တွေလည်း ကျဆင်းလာတတ်ပါတယ်။ ကျန်းမာရေးလေ့ကျင့်ခန်းတွေနဲ့ လူနေမှုပုံစံမှန်ကန်ခြင်းဟာ အသက်ကြီးလာချိန်မှာ နုပျိုကျန်းမာစေတဲ့ အလေ့အထကောင်းတွေ ဖြစ်ပါတယ်။
အားကစားလေ့ကျင့်ခန်းတွေ အများကြီး ရှိပေမယ့် သက်ကြီးရွယ်အိုတစ်ယောက်အတွက် ကိုယ်လက်လေ့ကျင့်ခန်းဟာ Limit ရှိပါတယ်။ အသက်ကြီးလာလို့ ကြွက်သားတွေ တင်းရင်းနေစေပြီး ဦးနှောက်ကျန်းမာရေး ကောင်းစေတဲ့ လေ့ကျင့်ခန်းတွေနဲ့ ပတ်သက်ပြီး ကျွမ်းကျင်သူတွေ အကြံပြုထားတဲ့ လေ့ကျင့်ခန်းနှစ်ခုက အေရိုးဗစ်လေ့ကျင့်ခန်းနဲ့ ထိုက်ကျိလိုမျိုး Strength Training များ ဖြစ်ပါတယ်။
(၁) အေရိုးဗစ်လေ့ကျင့်ခန်း
Photo: Telegraph
နှလုံးကျန်းမာရေးအတွက် ကောင်းမွန်တဲ့ တက်ကြွလှုပ်ရှားအားကစားပုံစံပါ။ အေရိုးဗစ်လေ့ကျင့်ခန်းတွေဟာ Cardio လေ့ကျင့်ခန်းထဲမှာ ပါပြီး တစ်ကိုယ်လုံး လှုပ်ရှားရတာ ဖြစ်လို့ လူကို ဖျတ်လတ်ပေါ့ပါးစေပါတယ်။ မှတ်ဉာဏ်နဲ့ စိတ်ပိုင်းဆိုင်ရာ စွမ်းရည်ပိုင်းအတွက် ကောင်းမွန်သလို အယ်လ်ဇိုင်းမားလို ဝေဒနာတွေကိုလည်း မဖြစ်အောင် ကာကွယ်ပေးနိုင်တယ်လို့ ဆိုပါတယ်။
လမ်းလျှောက်တာ နဲ့ ရေကူးတာလိုမျိုး ပုံမှန်လေ့ကျင့်ခန်းတွေဟာ ဦးနှောက်ထိခိုက်မှုကနေ ကာကွယ်ပေးနိုင်ပါတယ်။ အသက်ကြီးသူတွေမှာ ဖြစ်တတ်တဲ့ သတိမေ့လျော့ခြင်းတွေကို အေရိုးဗစ်ကစားခြင်းနဲ့ ဟန့်တားပေးနိုင်ပါတယ်။ တကယ်လို့ စက်ဘီးစီးတာ ဝါသနာပါရင်လည်း ကိုယ်ခံအားကောင်းမွန်စေသလို လူလည်း ပိုပြီး နုပျိုကျန်းမာစေပါတယ်။
(၂) Strength Training
Photo: Freepik
ဒီအားကစားကတော့ အေရိုးဗစ်တွေထက်စာရင် အသက်ကြီးပိုင်းတွေအတွက် နည်းနည်းလေး ခက်ပါလိမ့်မယ်။ တရုတ်ရိုးရာ ထိုက်ကျိ လိုမျိုး ကိုယ်ခန္ဓာညွှတ်ပြောင်းမှုနည်းစနစ်တွေ သုံးရတာ ဖြစ်လို့ YouTube က ဖြစ်ဖြစ် သင်တန်းဆရာတစ်ယောက်အကူအညီနဲ့ ဖြစ်ဖြစ် လုပ်ကြည့်ဖို့ လိုပါတယ်။ အဓိက အချက်က Strength Training ကစားမယ်ဆိုရင် ညင်ညင်သာသာနဲ့ ဖြည်းဖြည်းချင်း ရွေ့လျားရမှာပါ။ နောက်ပြီး အာရုံစူးစိုက်မှုလည်း အများကြီး လိုသလို အသက်ကိုလည်း နက်နက်ရှိုင်းရှိုင်း ရှုပေးဖို့ လိုပါတယ်။
တစ်ချို့ Strength Training တွေမှာ Squat ထိုင်တာ Plank ထောက်တာလိုမျိုး ကြွက်သားတွေ အားကောင်းအောင် တည်ဆောက်ရတာမျိုးလည်း ပါတတ်ပါတယ်။ ဒီလေ့ကျင့်ခန်းတွေ လုပ်ပေးခြင်းအားဖြင့် အရိုးအဆစ် ပျော့ပြောင်းပြီး စိတ်လည်း ပြေလျော့လာစေပါတယ်။ ဦးနှောက်စူးစိုက်မှု အားကောင်းလာပြီး သတိပိုကောင်းလာစေမှာ ဖြစ်ပါတယ်။
