Workout ကစားတဲ့အခါ စွမ်းအားအပြည့်နဲ့ အားသွန်ခွန်စိုက် ကစားနိုင်ဖို့ လေ့ကျင့်ခန်း မလုပ်ခင်မှာ စားပေးရတဲ့ အစားအစာတွေရှိသလို လေ့ကျင့်ခန်းလုပ်ပြီးချိန်မှာ ခန္ဓာကိုယ်နဲ့ ကြွက်သားတွေကိုပြန်ပြီး recover ဖြစ်စေဖို့ စားသင့်တဲ့ အစားအစာတွေလည်း ရှိပါတယ်။ အစာအာ ဟာရက ကြံ့ခိုင်မှုစနစ်အတွက် အရေးပါတဲ့ အခန်းကဏ္ဍတစ်ခုကနေ ပါဝင်နေတယ်ဆိုတာကိုတော့ မေ့ထားလို့မရပါဘူး။
Gym ကစားသူတွေအနေနဲ့ အားကစားလုပ်ပြီးချိန်မှာ ခန္ဓာကိုယ်က ဆုံးရှုံးသွားတဲ့ ကာဗွန်ဟိုက်ဒရိတ်ဓါတ်တွေကို ပြန်လည်ဖြည့်တင်းပေးဖို့လိုပြီး ပျက်စီးသွားတဲ့ ကြွက်သားဆဲလ်တွေ ပြန်သန်စွမ်းကောင်းမွန်လာဖို့ နဲ့ ကြွက်သားထုတက်လာဖို့ အာဟာရပြည့် အစားအစာတွေက အဓိက ကူညီပေးပါလိမ့်မယ်။ ဒါကြောင့် ဒီတစ်ခေါက်မှာတော့ အာဟာရဗေဒ ပညာရှင်တွေပြောတဲ့ Workout ကစားပြီးတိုင်း စားသင့်တဲ့ အစားအစာ ၄ မျိုးကိုပြောပြပေးချင်ပါတယ်။
(၁) ငါး
Photo : Natural News
Muscle ကစားနေသူတွေအတွက် ပရိုတင်းဓာတ်က မရှိမဖြစ်လိုအပ်တဲ့ အာဟာရဓာတ်တစ်ခုဖြစ်ပါတယ်။ ပြင်းထန်တဲ့ လေ့ကျင့်ခန်းတွေလုပ်ပြီးချိန်မှာ ပျက်စီးသွားတဲ့ ကြွက်သားဆဲလ်တွေကို ပြန်လည်တည်ဆောက်ဖို့နဲ့ ကြွက်သားကြီးထွားမှုကို မြှင့်တင်နိုင်ဖို့ ပရိုတင်းဓာတ်က များစွာ အရေးပါပါတယ်။ ဆာဒင်း၊ ဆော်လမွန်နဲ့ ထရောက်ငါးတွေမှာ ပရိုတင်းဓာတ်ကြွယ်ဝစွာပါဝင်တဲ့အပြင် ကြွက်သားရောင်ရမ်းမှုကိုလျော့ချပေးပြီး ကြွက်သားကြီးထွားစေတဲ့ Omega-3 fats လည်းပါဝင်တာကြောင့် လေ့ကျင့်ခန်းလုပ်ပြီးချိန်မှာ စားပေးသင့်တဲ့အစားအစာတစ်ခုပဲ ဖြစ်ပါတယ်။
(၂) ကြက်ဥ
Photo : Alpha Mom
ဈေးသက်သာပြီး အာဟာရဓာတ်များစွာနဲ့ ပရိုတင်း ပါဝင်မှုမြင့်မားတဲ့ ကြက်ဥကတော့ အားကစားလုပ်သူတိုင်း နှစ်သက်တဲ့ အစားအစာတစ်ခုပဲ ဖြစ်ပါတယ်။ အများစုက ကြက်ဥစားတဲ့အခါ အနှစ်ကို ဖယ်ပြီး အကာကိုပဲစားကြတာများပါတယ်။ လေ့လာမှုတွေအရတော့ ကြက်ဥအနှစ်မှာ ပရိုတင်းဓာတ် ၊ ဗီတာမင်နဲ့ သတ္တုဓာတ်တွေ များစွာပါဝင်တယ်လို့ သုတေသီတွေကဆိုပါတယ်။ ကြက်ဥအကာပဲ စားတဲ့သူတွေနဲ့ ကြက်ဥတစ်လုံး လုံးစားတဲ့သူတွေမှာ ပရိုတင်းဓာတ် ရရှိတဲ့ပမာဏက တူညီပေမယ့် အနှစ်ရောအကာပါ ကြက်ဥတစ်လုံး လုံးစားတာက ကြွက်သားကြီးထွားသန်မာမှုကို ဖြစ်စေတာကြောင့် Workout ကစားပြီးချိန်မှာ ကြက်ဥစားပေးဖို့ အကြံပြုချင်ပါတယ်။
(၃) နို့ထွက်ပစ္စည်းများ
Photo : New Food magazine
နွားနို့ ၊ ဒိန်ချဉ်နဲ့ ဒိန်ခဲ ကဲ့သို့ နို့ထွက်ပစ္စည်းတွေဟာ Workout ကစားပြီးချိန်မှာ ခန္ဓာကိုယ်နဲ့ ကြွက်သားတွေအတွက် လောင်စာအဖြစ်နာမည်ကြီးတဲ့ အစားအစာတွေဖြစ်ပါတယ်။ နို့နဲ့ နို့ထွက်ပစ္စည်းတွေမှာ ကာဗိုဟိုက်ဒရိတ်နဲ့ ပရိုတင်းဓာတ်အများအပြားပါရှိတာကြောင့် ကြွက်သားပြန် လည်တည်ဆောက်ဖို့နဲ့ ကြွက်သားကြီးထွားသန်မာဖို့ သိသိသာသာ အကျိုးပြုတယ်လို့ လေ့လာမှုတချို့က ဖော်ပြထားပါတယ်။ လေ့ကျင့်ခန်း လုပ်နေစဉ်အတွင်းမှာလည်း စွမ်းဆောင်ရည်ကို မြှင့်တင်ပေးနိုင်တာကြောင့် အားကစားလုပ်သူတွေ သေချာပေါက်စားပေးသင့်တဲ့ အစားအစာတစ်ခုပဲ ဖြစ်ပါတယ်။
(၄) ကစီဓာတ်ပါတဲ့ အသီးအရွက်များ
Photo : Healthline
ကန်စွန်းဥ၊ ထောပတ်သီးနဲ့ အာလူးတို့လို ကျန်းမာရေးနဲ့ညီညွတ်တဲ့ ကစီဓာတ်ပါတဲ့ အသီးအရွက်တွေက လေ့ကျင့်ခန်းလုပ်ပြီးနာက် ကြွက်သားတွေကနေ ဆုံးရှုံးသွားတဲ့ glycogen ဓာတ်ကိုပြန်လည် ဖြည့်တင်းပေးပြီး ကြွက်သားများပြန်လည်သန်စွမ်းကြံ့ခိုင်လာစေဖို့ အထောက် အကူပြုပါတယ်။ ကစီဓာတ်ကြွယ်ဝတဲ့ ဟင်းသီးဟင်းရွက်တွေကို ကြက်ဥ သို့မဟုတ် ကြက်သားကဲ့သို့ ပရိုတင်းအရင်းမြစ် အစားအစာတွေနဲ့ တွဲဖက်စားပေးမယ်ဆိုရင် ပိုပြီးကောင်းတယ်လို့ အာဟာရဆိုင်ရာ ကျွမ်းကျင်သူတွေက အကြံပြုထားပါတယ်။
Featured Photo : Bodybuilding.com
