ရက်ပေါင်း ၃၀ ဆိုတဲ့ တစ်လတာအချိန်ကာလအတွင်းမှာ ဝိတ်သိသိသာသာကျဖို့ဆိုတာ ဖြစ်နိုင်ပါ့မလား။ သံသယမများပါနဲ့။ အခုပြောပြမယ့် စားသောက်နေထိုင်မှုပုံစံတွေကို သေချာဂရုတစိုက် လိုက်နာမယ်ဆိုရင် တစ်လတာအချိန်အတွင်းမှာ ကျန်းကျန်းမာမာနဲ့ ကိုယ်အလေးချိန်ကို သိသာထင်ရှားစွာလျော့ကျသွားတဲ့ ရလဒ်မျိုးသင်မြင်တွေ့ရမှာပါ။
(၁) ကာဘိုဟိုက်ဒရိတ်ရှောင်ပါ
Photo : MedicineNet
ရက်ပေါင်း ၃၀ အတွင်းဝိတ်ကျချင်တယ်ဆိုရင် ကာဘိုဟိုက်ဒရိတ်စားသုံးမှုကို ဖြတ်တောက်ထားဖို့လိုပါတယ်။ လေ့ကျင့်ခန်းလုပ်ပြီးချိန်အနည်းဆုံး တစ်နာရီခွဲအတွင်း ကစီဓာတ်မြင့်မားတဲ့အစားအစာတွေ စားခြင်းကိုလုံးဝမပြုလုပ်ရပါဘူး။ ဥပမာ ပေါင်မုန့် ၊ ထမင်း ၊ Cereal ၊ အာလူး ၊ ပါစတာ ၊ နဲ့ ဆီကြော်စာ စတဲ့အစားအစာတွေကို ရှောင်ကြဉ်ပါ။
(၂) ကယ်လိုရီလျော့စားပါ
Photo : HealthifyMe
ကယ်လိုရီက ခန္ဓာကိုယ်အတွက် မရှိမဖြစ်လိုအပ်တယ်ဆိုပေမယ့် တစ်နေ့တာလိုအပ်တဲ့ ကယ်လိုရီပမာဏထက်ပိုစားမိရင် ကိုယ်အလေးချိန်အဆမတန် တက်လာနိုင်ပါတယ်။ ဝိတ်ချနေစဉ်ကာလအတွင်းမှာ အစားစားတဲ့အခါ ကယ်လိုရီပါဝင်မှုနှုန်းကိုသေချာတွက်ချက်ပြီး နေ့စဉ်လိုအပ်တဲ့ ကယ်လိုရီပမာဏထက် ပိုမစားမိအောင် သတိပြုသင့်ပါတယ်။ ကယ်လိုရီတွက်ချက်တဲ့ ဇယားတွေ ၊ အက်ပလီကေးရှင်းတွေကို အသုံးပြုပြီး ကယ်လိုရီစားသုံးမှုနှုန်းကို ကန့်သတ်လျော့ချနိုင်ပါတယ်။
(၃) အမျှင်ဓာတ်ကြွယ်ဝတဲ့ အစားအစာတွေ များများစားပါ
Photo : Sharon Palmer
အဆီတွေကိုတိုက်ဖျက်ပြီး ကယ်လိုရီလောင်ကျွမ်းဖို့ အကောင်းဆုံးနည်းလမ်းတွေထဲက တစ်ခုက အမျှင်ဓာတ်ပါ။ လေ့လာမှုများအရ အမျှင်ဓာတ်ကြွယ်ဝတဲ့အစားအစာတွေဟာ ခန္ဓာကိုယ်အဆီတွေကို လျော့ပါးစေပြီး အာဟာရဓာတ်ကို အတော်လေးဖြည့်တင်းပေးပါတယ်။ ဒါကြောင့် ပန်းသီး ၊ ဘလက်ဘယ်ရီ၊ ရက်စ်ဘယ်ရီ ၊ ဘလူးဘယ်ရီ အစရှိတဲ့ ဘယ်ရီသီးများ ၊ Oatmeal ၊ ပဲနက်၊ ပဲနီလေး၊ ကုလားပဲ အစရှိတဲ့ ပဲအမျိုးမျိုး ၊ အစေ့အဆံများနှင့် အခွံမာသီးများ ဗာဒံစေ့၊ သစ်ကြားသီး၊ chia ၊ flax seeds စတဲ့ အမျှင်ဓာတ်ကြွယ်ဝတဲ့ အစားအစာတွေ များများစားပေးသင့်ပါတယ်။
(၄) ကော်ဖီအစား Green Tea သောက်ပါ
Photo : Eat This, Not That
ကိုယ်အလေးချိန်လျှော့ချနေသူတွေအနေနဲ့ ကော်ဖီးအစား Green Tea ကိုသောက်သင့်ပါတယ်။ Green Tea ဟာ ဇီဝဖြစ်ပျက်မှုကိုထိန်းညှိပေးပြီး ဝမ်းဗိုက်မှာရှိတဲ့ အဆီတွေကိုချေဖျက်ပေးနိုင်တဲ့ ဒြပ်ပေါင်းများ ပါဝင်ပါတယ်။ ဒါကြောင့်ပဲ Green Tea ဟာ ကိုယ်အလေးချိန်ကို ထိန်းညှိပေးနိုင်တဲ့ အကောင်းဆုံးသောက်စရာအဖြစ် ဝိတ်ချနေသူတွေကြား နာမည်ကြီးတာပါ။
(၅) ဆားစားသုံးမှုလျော့ချပါ
Photo : Medical News Today
ကိုယ်အလေးချိန်မြန်မြန်ကျချင်တယ်ဆိုရင်တော့ ဆိုဒီယမ်စားသုံးမှုကို လျှော့ချပေးဖို့လိုပါတယ်။ အသင့်စားအစားအစာများ ၊ စည်သွတ်ဘူးများ ၊ အေးခဲထားသော အစားအစာများ ၊ ပြုပြင်ထားတဲ့ အသားတွေမှာ ဆိုဒီယမ်ပါဝင်မှုများပြီး ကိုယ်အလေးချိန်တက်စေရုံမက ကျန်းမာရေးကိုလည်းဆိုးဆိုးရွားရွားထိခိုက်စေနိုင်ပါတယ်။
(၆) လေ့ကျင့်ခန်းမလုပ်ခင် ဗာဒံစေ့စားပေးပါ
Photo : Treehugger
လေ့ကျင့်ခန်းမလုပ်ခင်မှာ ဗာဒံစေ့အနည်းငယ်စားပေးမယ်ဆိုရင် ရလဒ်ပိုမိုကောင်းမွန်စေနိုင်ပါတယ်။ ပရိုတင်းဓာတ် အရင်းအမြစ်တစ်ခုဖြစ်တဲ့ ဗာဒံစေ့ (almonds) မှာ အမိုင်နိုအက်ဆစ် L-arginine ဓာတ်ကြွယ်ဝစွာပါဝင်ပြီး ၎င်းက လေ့ကျင့်ခန်းလုပ်ချိန်မှာ ကယ်လိုရီပိုလောင်ကျွမ်းဖို့ ကူညီပေးနိုင်ပါတယ်။
(၇) လေ့ကျင့်ခန်းပုံမှန်ပြုလုပ်ပါ
Photo : Men’s Health
ကိုယ်အလေးချိန်လျော့ချဖို့အတွက်ဆို စားသောက်နေထိုင်မှုပုံစံတွေကို ဂရုစိုက်ဖို့လိုသလို ကိုယ်လက်လှုပ်ရှားလေ့ကျင့်ခန်းတွေကိုလည်း မှန်မှန်ပြုလုပ်သွားရမှာဖြစ်ပါတယ်။ လေ့ကျင့်ခန်းလုပ်ခြင်းဟာ အဆီပိုတွေကိုလောင်ကျွမ်းစေပြီ ကြွက်သားများကျစ်လစ်သန်မာလာအောင် ကူညီပေးနိုင်ပါတယ်။ အဓိကအားဖြင့် လေ့ကျင့်ခန်းကို တစ်စိုက်မတ်မတ် ပုံမှန်လေးလုပ်သွားမယ် အပေါ်က စားသောက်နေထိုင်မှုပုံစံတွေကိုလည်း လိုက်နာမယ်ဆိုရင် တစ်လအတွင်း သိသိသာသာ ကိုယ်အလေးချိန်လျော့ကျသွားမှာဖြစ်ပါတယ်။
Featured Photo : YouWorkForThem
