ကျန်းမာကြံ့ခိုင်တဲ့ လူနေမှုဘဝပုံစံကို တည်ဆောက်ချင်သူအမျိုးသားတို့အနေနဲ့ ပုံမှန်လေ့ကျင့်ခန်း လုပ်ဖို့လိုပါတယ်။ လေ့ကျင့်ခန်းပုံမှန်လုပ်ခြင်းက ကျန်းမာကြံ့ခိုင်စေပြီး နာတာရှည်ရောဂါဝေဒနာတွေ ကင်းဝေးစေပါလိမ့်မယ်။ လေ့ကျင့်ခန်းလုပ်ဖို့ အားကစားရုံပုံမှန်သွားနိုင်မှ မဟုတ်ပါဘူး။ အိမ်မှာတင်လွယ်လွယ်ကူကူနဲ့ မည်သည့် ကိရိယာမှမလိုပဲ လေ့ကျင့်ခန်းလုပ်နိုင်ပါတယ်။ ဒီတစ်ခေါက်တော့ အမျိုးသားတို့အတွက် အကောင်းဆုံးအိမ်တွင်းလေ့ကျင့်ခန်းတွေကို တင်ဆက်ပေးလိုက်ပါတယ်။
(၁) Side Plank
Photo : Vecteezy
ဒီလေ့ကျင့်ခန်းက ဝမ်းဗိုက်ကြွက်သားများ ပိုမိုသန်မာလာအောင်ကူညီပေးနိုင်ပါတယ်။ ခန္ဓာကိုယ်ကို ဘေးဖက်သို့စောင်းပြီး ခြေထောက်နှစ်ချောင်းကို ယှဉ်လျက်အနေအထားနဲ့ လက်တစ်ဖက်ကိုကြမ်းပြင်မှာထောက်ထားပါ။ ကျန်လက်တစ်ဖက်ကို အပေါ်သို့ ၉၀ ဒီဂရီဖြောင့်ဖြောင့်တန်းတန်း ထောင်မတ်ထားပါ။ ထိုပုံစံအတိုင်း ခန္ဓာကိုယ်ကို စက္ကန့်အနည်းငယ်ကြာဟန်ချက်ထိန်းထားပြီး နောက်တစ်ဖက်သို့ပြောင်းကာ အထက်ပါပုံစံအတိုင်း ပြုလုပ်ပေးရမှာဖြစ်ပါတယ်။
(၂) Squats
Photo : Healthline
Squats လေ့ကျင့်ခန်းက အားလုံးနဲ့ရင်းနှီးပြီးသားဖြစ်မှာပါ။ ခန္ဓာကိုယ်အောက်ပိုင်းကြွက်သားများကို သန်မာစေပြီး ကိုယ်လုံးကိုယ်ပေါက် ပိုလှအောင် ကူညီပေးနိုင်ပါတယ်။ Squats လေ့ကျင့်ခန်းကိုပုံစံအမျိုးမျိုး လုပ်ဆောင်နိုင်ပါတယ်။ ဒီထဲကမှ အလွယ်ကူဆုံးနဲ့အရိုးရှင်းဆုံးနည်းကတော့ တင်ပါးကိုနောက်ကျောနဲ့ တည့်တည့်မတ်မတ်အနေအထားပုံစံယူပြီး လက်နှစ်ဖက်ကို ရှေ့သို့ဆန့်ထုတ်ပါ။ ထို့နောက်ဒူးကို ဖြေးဖြေးချင်းကွေးပြီး ထိုင်ချပြီး ခန္ဓာကိုယ်ကိုထိန်းထားပါ။ ထို့နောက်မူလပုံစံအတိုင်း ပြန်သွားရမှာဖြစ်ပါတယ်။
(၃) Russian Twist
Photo : Muscles.se
ဝမ်းဗိုက်တစ်ခုလုံးအတွက် ထိရောက်တဲ့ လေ့ကျင့်ခန်းဖြစ်ပါတယ်။ ပြုလုပ်နည်းကတော့ ခန္ဓာကိုယ်ကို ၄၅ ဒီဂရီလောက် နောက်ပြန်မှီပြီး ထိုင်ပါ။ ထို့နောက် ဒူးကွေးကာ ခြေထောက်ကို ကြမ်းပြင်မှ အနည်းငယ်ကြွထားပေးရပါမယ်။ ပြီးရင်ဝမ်းဗိုက်ကြွက်သားကိုအသုံးပြုကာ လက်နှစ်ဖက်ကို ဘယ်တစ်ချက် ညာတစ်ချက် တစ်လှည့်စီလှည့်သွားပေးရမှာဖြစ်ပါတယ်။ Kettlebell ၊ Dumbbells တွေနဲ့ကစားနိုင်သလို ကိရိယာလွတ်ကစားလို့လည်းရပါတယ်။
(၄) High Knees
Photo : Cambridge Club
ပေါင်အတွင်းပိုင်းနှင့် တင်ပဆုံအပြင်ဘက်ရှိ ကြွက်သားများကိုသန်မာစေပြီး ဗိုက်အဆီတွေကျစေမယ့် အထိရောက်ဆုံး လေ့ကျင့်ခန်းတစ်ခုဖြစ်ပါတယ်။ ခန္ဓာကိုယ် တည့်တည့်မတ်မတ်ရပ်တဲ့အနေအထား ပုံစံယူပါ။ ထို့နောက် ဘယ်ဘက်ဒူးကို တက်နိုင်သလောက်မြင့်မြင့်တင်ပြီး ဝမ်းဗိုက်ကြွက်သားတွေကို ထိတဲ့အထိ မြင့်ပေးရပါမယ်။ ပြီးရင် ညာဘက်ဒူးကိုလည်း ထို့နည်းအတိုင်းလုပ်ပေးရမှာပါ။
Featured Photo : Men’s Health
