သွေးပူလေ့ကျင့်ခန်းများသည် မည်သည့်အားကစားမဆို မပြုလုပ်ခင်မှာ မဖြစ်မနေပြုလုပ်သင့်တဲ့ လေ့ကျင့်ခန်းအမျိုးအစားတစ်ခုပဲဖြစ်ပါတယ်။ ကွီး တို့အနေနဲ့ ရေမကူး ခင်မှာလည်း သွေးပူလေ့ကျင့်ခန်း များကို မဖြစ်မနေပြုလုပ်ပေးဖို့လိုအပ်ပါတယ်။

ရေကူးတဲ့အခါကျပြန်တော့ သွေးပူလေ့ကျင့်ခန်းတစ်ခုတည်းနဲ့ မလုံလောက်တော့ပါဘူး။ အကြောလျော့လေ့ကျင့်ခန်းများလည်း လိုအပ်လာပါတယ်။ သွေးပူလေ့ကျင့်ခန်းကတော့ ခန္ဓာကိုယ် အပူချိန်ကို တဖြည်းဖြည်းချင်းစီ မြင့်တက်လာအောင် ကူညီပေးပြီး အကြောလျော့လေ့ကျင့်ခန်းကျပြနတော့ ကြွက်သားများ ထိခိုက်ဒဏ်ရာရမှုများမှ ကြိုတင်ကာကွယ်ပေးပါတယ်။

အကြောလျော့ လေ့ကျင့်ခန်းတစ်ခုပြုလုပ်တဲ့အခါမှာလည်း အနေအထားတစ်ခုတည်းကို ၁၀ စက္ကန့်နှင့် စက္ကန့် ၃၀ အကြားသာ ပြုလုပ်ပေးရမှာဖြစ်ပါတယ်။ ထိုသတ်မှတ်ချိန်အထက် ခပ်ကြာကြာပြုလုပ်မိတဲ့အခါ ဖိအားအများကြီးသွားပေးမိသလိုဖြစ်သွားနိုင်ပါတယ်။

ကွီး တို့အနေနဲ့ ရေမကူး ခင်မှာ အခုဖော်ပြပေးမယ့် သွေးပူလေ့ကျင့်ခန်း များနှင့် အကြောလျော့လေ့ကျင့်ခန်းများကို ပြုလုပ်ပေးတဲ့အခါ ခန္ဓာကိုယ်ကြွက်သားများအတွက် အထူးကောင်းမွန်စေပါတယ်။

လေ့ကျင့်ခန်း (၁)

အဆင့် (၁) လေ့ကျင့်ခန်း ပြုလုပ်ဖို့ရန်အတွက် ခန္ဓာကိုယ်ကို အသင့်အနေအထားပြင်ပါ။ ခြေထောက်နှစ်ဖက်ကို အနည်းငယ် ချဲထားလိုက်ပါ။

အဆင့် (၂) ဘယ်လက်ကို နာရီလက်တံအတိုင်း အရှေ့သို့ ဝိုက်လိုက်ပါ။ စက္ကန့် ၃၀ ခန့် ပြုလုပ်ပေးရပါမယ်။

လေ့ကျင့်ခန်း (၂)

အဆင့် (၁) ဒုတိယလေ့ကျင့်ခန်းအတွက်လည်း ခန္ဓာကိုယ်ကို စောစောကလိုပဲ အသင့်ပြင်ထားပါ။

အဆင့် (၂) ဘယ်လက်ကို နာရီလက်တံပြောင်းပြန်အတိုင်း အနောက်သို့ ယိုင်ရပါမယ်။ စက္ကန့် ၃၀ ပြုလုပ်ပါ။

လေ့ကျင့်ခန်း (၃)

ဒီလေ့ကျင့်ခန်းကတော့ ဘယ်ရော ညာရော အစုံလိုက် ပြုလုပ်ရမှာဖြစ်ပါတယ်။

အဆင့် (၁) ကိုလည်း စောစောက လေ့ကျင့်ခန်းများအတိုင်း ပြုလုပ်လိုက်ပါ။

အဆင့် (၂) လက်နှစ်ဖက်စလုံးကို နာရီလက်တံအတိုင်း အရှေ့သို့ ဝိုက်ရမှာဖြစ်ပါတယ်။ စုစုပေါင်း ၃၀ စက္ကန့်ခန့် ပြုလုပ်ပါ။

လေ့ကျင့်ခန်း (၄)

ဒီလေ့ကျင့်ခန်းကျတော့ ဘယ်ညာ အစုံလိုက်ကို အနောက်သို့ ဝိုက်ရမှာဖြစ်ပါတယ်။ စုစုပေါင်း စက္ကန့် ၃၀ ပြုလုပ်ပေးလိုက်ပါ။

လေ့ကျင့်ခန်း (၅)

အဆင့် (၁) ခြေထောက်နှစ်ဖက်ကို အနည်းငယ် ချဲထားပါ။

အဆင့် (၂) လက်နှစ်ဖက်ကို အပေါ်မြှောက်ကာ ဦးခေါင်းတည့်တည့်တွင် စုဆုံလိုက်ပါ။ စုစုပေါင်း စက္ကန့် ၃၀ ပြုလုပ်ရပါမယ်။

လေ့ကျင့်ခန်း (၆)

အဆင့် (၁) ခြေထောက်နှစ်ဖက်ကို အနည်းငယ် ချဲထားပါ။

အဆင့် (၂) ညာလက်က အရှေ့သို့ မြှောက်တဲ့ အချိန်မှာ ဘယ်လက်က အနောက်သို့ မြှောက်လိုက်ပါ။ ဘယ် ညာ တစ်လှည့်စီကို ထိုနည်းအတိုင်း စက္ကန့် ၃၀ ပြည့်တဲ့အထိ ပြုလုပ်ရပါမယ်။

လေ့ကျင့်ခန်း (၇)

ဒီလေ့ကျင့်ခန်းက လေ့ကျင့်ခန်း (၅) နဲ့ ဆင်တူပါတယ်။

အဆင့် (၁) အရင်ဦးဆုံး လေ့ကျင့်ခန်း ပြုလုပ်ဖို့ရန်အတွက် ခြေထောက်နှစ်ဖက်ကို ပုခုံးအကျယ်အတိုင်း ချဲထားပါ။

အဆင့် (၂) လေ့ကျင့်ခန်း (၅) နဲ့ မတူတာကတော့ ဒီလေ့ကျင့်ခန်းမှာ လက်နှစ်ဖက်က ဖြောင့်နိုင်သမျှ ဖြောင့်အောင် ဆန့်တန်းထားရမှာဖြစ်ပါတယ်။ စုစုပေါင်း စက္ကန့် ၃၀ ပြုလုပ်ပေးရပါမယ်။

လေ့ကျင့်ခန်း (၈)

အဆင့် (၁) ခြေထောက်နှစ်ဖက်ကို အနည်းငယ် ချဲထားကာ ဒူးကွေးထားပါ။

အဆင့် (၂) ခန္ဓာကိုယ် အပေါ်ပိုင်းက ခြေထောက်နဲ့ ထိကပ်ဖို့ရန်အတွက် အရှေ့သို့ ကိုင်းချလိုက်ပါ။

အဆင့် (၃) ခြေထောက်နဲ့ လက် ထိလုဆဲဆဲအနေအထားတွင် ဒူးကို ကွေးမထားတော့ဘဲ ဒူးဆန့်ပစ်ရပါမယ်။

မူလအနေအထားအတိုင်း မတ်တပ်ပြန်ရပ်ပါ။

ဒီလေ့ကျင့်ခန်းကိုလည်း စက္ကန့် ၃၀ ပြုလုပ်ရပါမယ်။

လေ့ကျင့်ခန်း (၉) နှင့် လေ့ကျင့်ခန်း (၁၀)

ဒီလေ့ကျင့်ခန်း ပြုလုပ်ဖို့ရန်အတွက် ခုံတစ်ခုံ (သို့မဟုတ်) ပုံးတစ်ပုံ လိုအပ်ပါလိမ့်မယ်။

လေ့ကျင့်ခန်း (၉) အတွက် ဘယ်ခြေကို ဆန့်တန်းထားပြီး ညာခြေကို ခုံပေါ်မှာ တင်ထားပါ။ ထို့နောက် ညာဘက်က တဖြည်းဖြည်းချင်းစီ ခြေမကို လှမ်းဆွဲလိုက်ပါ။ ဘယ်လက်ကလည်း ညာလက်ပေါ်မှာ အလိုက်သင့်လေး တင်ထားလိုက်ပါ။

လေ့ကျင့်ခန်း (၁၀) ကျပြန်တော့ ခြေထောက်နှစ်ဖက်ကို ဘယ် ညာ ပြောင်းပေးရမှာဖြစ်ပါတယ်။ ညာခြေကို ဆန့်တန်းထားပြီး ဘယ်ခြေကို ခုံပေါ် တင်ထားပါ။ ဘယ်လက်က ဘယ်ခြေမကို လှမ်းဆွဲလိုက်ပါ။ စုစုပေါင်း စက္ကန့် ၃၀ ပြုလုပ်ရပါမယ်။

လေ့ကျင့်ခန်း (၁၁)

ခြေထောက်နှစ်ဖက်ကို အနည်းငယ် ချဲထားပြီး အသင့်အနေအထားပြင်ပါ။

ထို့နောက် ခန္ဓာကိုယ် အပေါ်ပိုင်းကို အရှေ့သို့ ကိုင်းချလိုက်ပါ။ တစ်ဖန် မတ်မတ်ပြန်ရပ်လိုက်ပါ။ ကွီး တို့အတွက် ရေမကူး ခင်မှာ ပြုလုပ်သင့်တဲ့ သွေးပူလေ့ကျင့်ခန်း တစ်ခုပဲဖြစ်ပါတယ်။

လေ့ကျင့်ခန်း (၁၂)

ခြေထောက်နှစ်ဖက်ကို အနည်းငယ် ကားထားပါ။

ခန္ဓာကိုယ်ဘယ်ဘက်အခြမ်းကို ဘယ်ဘက်သို့ ကိုင်းလိုက်ပါ။ မတ်မတ်ပြန်ရပ်ပါ။

တစ်ဖန် ခန္ဓာကိုယ် ညာဘက်အခြမ်းကို ညာဘက်သို့ ကိုင်းလိုက်ပါ။ မတ်မတ်ပြန်ရပ်ပါ။ ဘယ်ညာ တစ်လှည့်စီကို စက္ကန့် ၃၀ ပြုလုပ်ရပါမယ်။

လေ့ကျင့်ခန်း (၁၃)

ဒီလေ့ကျင့်ခန်းကတော့ အားလုံးရင်းနှီးပြီးသားဖြစ်တဲ့ ခါးလှည့်လေ့ကျင့်ခန်းပဲဖြစ်ပါတယ်။

ခြေထောက်နှစ်ဖက်ကို အနည်းငယ်ချဲထားပါ။ ထို့နောက် ခါးကို ဘယ် ညာ တစ်လှည့်စီ လှည့်ပေးရပါမယ်။ စက္ကန့် ၃၀ ပြုလုပ်ပါ။

အခုဖော်ပြသွားတဲ့ လေ့ကျင့်ခန်းများသည် ကွီး တို့ ရေမကူး ခင်မှာ မဖြစ်မနေပြုလုပ်သင့်တဲ့ သွေးပူလေ့ကျင့်ခန်း နှင့် အကြောလျော့လေ့ကျင့်ခန်းများပဲဖြစ်ပါတယ်။

Source: Proswimwear

Featured Image Source: Mensjournal