ဘာကြောင့် အလေးမ သင့်တာလဲ

Strength Training လို့ ခေါ်ကြတဲ့ သက်လုံနဲ့ကြံ့ခိုင်မှု အားကောင်းရေး လေ့ကျင့်ခန်းတွေကို လူငယ်လူရွယ်တိုင်း ကစားသင့်တယ်လို့ သုတေသနတွေက ထောက်ခံထားပါတယ်။ ဩစတြေးလျအမျိုးသားကာယလှုပ်ရှားမှု လမ်းညွှန်ချက်တွေထဲမှာ အရွယ်ရောက်သူတိုင်း အနည်းဆုံး တစ်ပတ်ကို နှစ်ရက် Strength Training ကစားပေးဖို့ တိုက်တွန်းထားပါတယ်။

Photo: Men’s Journal

ဘာကြောင့် ကြွက်သားတွေလေ့ကျင့်ပေးဖို့ လိုတာလဲဆိုရင် ဒီအားကစားလှုပ်ရှားမှုက ကောင်းကျိုးတွေအများကြီးပေးလို့ပဲ ဖြစ်ပါတယ်။ ပုံမှန် ကိုယ်လက်လှုပ်ရှားမှု လုပ်ခြင်းဟာ ကြွက်သားဆုံးရှုံးမှုတွေ လျော့ပါးစေပါတယ်။ အသက်ကြီးလာတဲ့အထိ ကြွက်သားစိုင်များ ကြံ့ခိုင်နေပြီး ကျစ်လျစ်တောင့်တင်းတဲ့ ကိုယ်ကာယကို ထိန်းထားနိုင်ပါတယ်။

လူဟာ အသက် ၃၀ ကျော်လာတဲ့နောက် အရိုးသိပ်သည်းဆဟာ တစ်နှစ်ချင်းတစ်နှစ်ချင်း ကျကျလာပါတယ်။ အားကစားလုပ်ခြင်းဟာ အရိုးတွေ ကျန်းမာကြံ့ခိုင်စေတယ်လို့ ဆေးဖက်ကျွမ်းကျင်သူတွေက လက်ခံထားပါတယ်။ အလေးမအားကစားလုပ်ခြင်းဟာ ဇီဝကမ္မဖြစ်စဉ်ကို မြှင့်တင်ပေးနိင်ပြီး ကိုယ်ခန္ဓာအတွက် အန္တရာယ်ရှိတဲ့ အဆီတွေလည်း လျှော့ချပေးနိုင်ပါတယ်။

နောက်တစ်ချက်က အင်ဆူလင် Level ထိန်းညှိပေးနိုင်ပြီး ယောင်ယမ်းမှုတွေ နည်းပါးစေပါတယ်။ အဆင့်နှစ် ဆီးချိုသွေးချိုနဲ့ နှလုံးရောဂါလိုမျိုး ရောဂါဆိုးကြီးတွေ အဖြစ်နည်းအောင် ထိန်းပေးနိုင်ပါတယ်။ ဒီတော့ အသက်ကြီးလို့ ရောဂါဆိုးကြီးတွေ မဝင်ချင်သူတွေအတွက် ငယ်ငယ်အရွယ်ကောင်းကတည်းက ဝိတ်ကစားပေးသင့်ပါတယ်။

Weight Training ကစားခြင်းဟာ ရုပ်ရည်ပါ ပြောင်းလဲစေနိုင်ပါတယ်။ အဆီများပြီး ဝဖိုင့်ဖိုင့်နဲ့ ကြည့်မကောင်းသူတွေဟာ အားကစားလုပ်ပြီး နှစ်အနည်းငယ်အကြာမှာ ကိုယ်ခန္ဓာပုံစံအချိုးကျပြီး ကြည့်လို့ကောင်းစေပါတယ်။ လက်ပြင်ကုန်းတဲ့သူတွေဟာ မတ်မတ်ဆန့်ဆန့်နဲ့ သွားလာလှုပ်ရှားတိုင်း စမတ်ကျလာပါတယ်။

Photo: WatchFit

ညဘက်တွေမှာ အိပ်လို့ကောင်းတာကြောင့် စိတ်ကြည်လူလန်းပြီး တစ်နေ့တာကို အားအင်အပြည့်နဲ့ ဖြတ်သန်းနိုင်မှာပါ။ ပုံမှန်ဝိတ်ကစားသူဟာ အဖျားအနာနည်းပြီး ကျန်းမာပါတယ်။ ကိုယ်လုံးကိုယ်ထည် တောင့်တင်းသန်မာပြီး ရုပ်ပိုင်းဆိုင်ရာ ကြံ့ခိုင်မှုကြောင့် ကိုယ့်ကိုယ်ကိုယ် ယုံကြည်မှုမြင့်မားလာမှာပါ။

အသက်ကြီးလာချိန်မှာလည်း အရွယ်တင်ပြီး လူငယ်လူလတ်ပိုင်းလို ပေါ့ပါး ဖျတ်လတ်နေမှာ ဖြစ်ပါတယ်။ ဒါကြောင့် တစ်ပတ်မှာ အနည်းဆုံး ၃ ရက်လောက်တော့ Gym သွားပြီး Weight Training ကစားပေးဖို့ တိုက်တွန်းလိုက်ပါတယ်။