လူအများစုဟာ ဘဝတစ်လျှောက် အချိန်အများကြီးကို အလုပ်လုပ်ရင်း ကုန်ဆုံးကြရပါတယ်။ ဒါကြောင့် ကိုယ့်အလုပ်အကိုင်မှာ ဝင်ငွေရရှိဖို့တင်မကဘဲ ပိုပြီးအဓိပ္ပာယ်ရှိတာ၊ ကိုယ်ပိုင်တိုးတက်မှုနဲ့ ပျော်ရွှင်မှုရရှိတာကိုလည်း လိုချင်လာကြပါတယ်။ ဒါပေမယ့် အလုပ်ပြောင်းတာ၊ ရာထူးတိုးဖို့ ကြိုးစားတာလိုမျိုး အပြောင်းအလဲကြီးတွေကို တစ်ခါတည်းလုပ်ဖို့ မလွယ်ကူပါဘူး။ အဲဒီအစား အလေ့အကျင့်သေးသေးလေးတွေကို ပုံမှန်ကျင့်သုံးတာက ရေရှည်မှာ ပိုထိရောက်နိုင်ပါတယ်။
၁။ ကိုယ့်ကိုယ်ကိုယ် ပိုပြီးနားလည်အောင် ဆန်းစစ်ပါ
ကိုယ့်ရဲ့အားသာချက်၊ စိတ်ဝင်စားမှု၊ တန်ဖိုးထားတဲ့အရာနဲ့ ကိုယ်မသိသေးတဲ့ အားနည်းချက်တွေကို သိထားတာက အလုပ်အကိုင်ရွေးချယ်ရာမှာ အရေးကြီးပါတယ်။ ကိုယ့်အကြောင်း သိပြီးသားလို့ ထင်ရပေမယ့် ကိုယ်ရည်ကိုယ်သွေးနဲ့ အရည်အချင်းဆိုင်ရာ ဆန်းစစ်မှုတွေကို လုပ်ကြည့်ရင် အမြင်အသစ်တွေ ရလာနိုင်ပါတယ်။
Myers-Briggs၊ DISC၊ Character Strengths၊ Values Assessment နဲ့ Strong Interest Assessment တို့လို ဆန်းစစ်မှုတွေက ကိုယ့်ရဲ့ အားသာချက်နဲ့ လှုံ့ဆော်ပေးတဲ့အရာတွေကို ရှာဖွေရာမှာ အထောက်အကူဖြစ်နိုင်ပါတယ်။
၂။ အခွင့်အလမ်းတစ်ခုတည်းကိုပဲ မစွဲလမ်းပါနဲ့
အလုပ်အကိုင်မှာ အကန့်အသတ်ရှိတဲ့ စိတ်နေစိတ်ထားနဲ့ ရှိနေမယ်ဆိုရင် ရာထူးတိုးတာ၊ ကုမ္ပဏီတစ်ခုမှာ အလုပ်ရတာလိုမျိုး ရည်မှန်းချက်တစ်ခုတည်းကိုပဲ အာရုံစိုက်မိနိုင်ပါတယ်။ အဲဒီအခါ ကိုယ့်ရှေ့မှာရှိနေတဲ့ အခြားအခွင့်အလမ်းတွေကို မမြင်မိတော့ပါဘူး။
ဒါကြောင့် စိတ်ကိုဖွင့်ထားပြီး မမျှော်လင့်ထားတဲ့ လမ်းကြောင်းတွေကိုလည်း စဉ်းစားကြည့်ပါ။ အခွင့်အလမ်းတွေဟာ ကိုယ်ရှာနေတဲ့နေရာမှာပဲ ရှိတာမဟုတ်ပါဘူး။ ကိုယ်မစဉ်းစားဖူးတဲ့ နယ်ပယ်အသစ်၊ အလုပ်ပုံစံအသစ် ဒါမှမဟုတ် ပရောဂျက်အသစ်ကနေလည်း တိုးတက်မှု ရလာနိုင်ပါတယ်။
၃။ လိုအပ်တဲ့အချိန်မှသာ မဟုတ်ဘဲ အမြဲတမ်း ကွန်ရက်ဖွဲ့ထားပါ
Networking ဆိုတာ တစ်ခုခုလိုအပ်လာမှ လူတွေကို ဆက်သွယ်တာမျိုး မဟုတ်ပါဘူး။ စိတ်ဝင်စားမှု၊ ရိုးသားမှုနဲ့ အပြန်အလှန်ကူညီလိုစိတ်ပေါ်မှာ အခြေခံတဲ့ ရေရှည်အလေ့အကျင့်တစ်ခုပါ။
တစ်ပတ်ကို ၁ နာရီကနေ ၂ နာရီလောက် အချိန်ပေးပြီး သူငယ်ချင်းဟောင်းတွေ၊ လုပ်ဖော်ကိုင်ဖက်တွေနဲ့ ပြန်ဆက်သွယ်ပါ။ LinkedIn၊ Facebook Groups၊ Slack နဲ့ Instagram တို့ကနေ ကိုယ့်နယ်ပယ်နဲ့သက်ဆိုင်တဲ့ အသိုင်းအဝိုင်းတွေထဲ ဝင်ရောက်နိုင်ပါတယ်။ အခုကတည်းက တည်ဆောက်ထားတဲ့ အဆက်အသွယ်တွေက အနာဂတ်မှာ အလုပ်အကိုင်အခွင့်အလမ်းတွေ ဖြစ်လာနိုင်ပါတယ်။
၄။ နှစ်စဉ် ကိုယ်ဝါသနာပါတဲ့ ပရောဂျက်တစ်ခု လုပ်ပါ
အလုပ်အကိုင်တိုးတက်ဖို့ လက်ရှိအလုပ်ကနေ ချက်ချင်းထွက်စရာ မလိုပါဘူး။ ကိုယ်ဝါသနာပါတဲ့ ပရောဂျက်တစ်ခုကို နှစ်စဉ်လုပ်ဆောင်ခြင်းကလည်း အရည်အချင်းအသစ်တွေ တိုးလာစေပါတယ်။
လူအများရှေ့မှာ စကားပြောတာ၊ စေတနာ့ဝန်ထမ်းလုပ်တာ၊ လူမှုအကျိုးပြုလုပ်ငန်းမှာ ပါဝင်တာ၊ ကိုယ်ပိုင်ထုတ်ကုန်တစ်ခု ဖန်တီးတာတို့ကို စမ်းကြည့်နိုင်ပါတယ်။ ဒီလိုပရောဂျက်တွေက ကိုယ့်စိတ်ဝင်စားမှုကို လက်တွေ့အသုံးချနိုင်စေပြီး အလုပ်ခွင်မှာလည်း ကိုယ့်ရဲ့တန်ဖိုးကို ပိုမိုပြသနိုင်စေပါတယ်။
၅။ လက်ရှိကိုယ့်ရဲ့ ပုံရိပ်အတွက် Vision Board ဖန်တီးပါ
လူအများစုက အနာဂတ်အိပ်မက်တွေအတွက် Vision Board ဖန်တီးတတ်ကြပါတယ်။ ဒါပေမယ့် လက်ရှိကိုယ့်ရဲ့တန်ဖိုး၊ ရည်ရွယ်ချက်၊ အားသာချက်နဲ့ ကိုယ်စားပြုချင်တဲ့ပုံရိပ်တွေကို ဖော်ပြထားတဲ့ Vision Board တစ်ခုလည်း ဖန်တီးသင့်ပါတယ်။
ဒီလိုလုပ်ခြင်းက ကိုယ်ဘယ်လိုလူမျိုးဖြစ်ချင်လဲ၊ အလုပ်အကိုင်မှာ ဘာကိုအရေးကြီးတယ်လို့ ယူဆလဲဆိုတာ ပိုရှင်းလာစေပါတယ်။ အင်တာဗျူးတွေမှာ ကိုယ့်ကိုယ်ကိုယ် ယုံကြည်မှုရှိရှိ မိတ်ဆက်ပြောဆိုဖို့လည်း အထောက်အကူဖြစ်ပါတယ်။
၆။ သေးငယ်တဲ့ စွန့်စားမှုတွေ လုပ်ကြည့်ပါ
တစ်နေရာတည်းမှာ ရပ်နေမယ်ဆိုရင် တိုးတက်မှုရလာမှာ မဟုတ်ပါဘူး။ ကြီးမားတဲ့ ဆုံးဖြတ်ချက်တွေ မလုပ်နိုင်သေးရင်တောင် သေးငယ်တဲ့ စွန့်စားမှုတွေကနေ စတင်နိုင်ပါတယ်။
ဥပမာ ကျွမ်းကျင်မှုအသစ်တစ်ခု သင်ယူဖို့ အချိန်ပေးတာ၊ ကိုယ်လေးစားတဲ့ ခေါင်းဆောင်တစ်ယောက်ကို ဆက်သွယ်ပြီး စကားပြောဖို့ ဖိတ်ခေါ်တာ၊ ကိုယ့်မန်နေဂျာကို အကြံဉာဏ်အသစ်တင်ပြတာတို့ ဖြစ်ပါတယ်။ ဒီလိုလှုပ်ရှားမှုတွေက ကိုယ့်ရဲ့ယုံကြည်မှုကို တိုးစေပြီး မမြင်ရသေးတဲ့ အခွင့်အလမ်းတွေကို ဖန်တီးပေးနိုင်ပါတယ်။
၇။ တစ်ပတ်ကို တစ်နာရီ လှုံ့ဆော်မှုရဖို့ အချိန်ပေးပါ
အလုပ်ကိုပဲ အမြဲတမ်းလုပ်နေဖို့ မဖြစ်နိုင်ပါဘူး။ ဖန်တီးဖို့၊ စာဖတ်ဖို့၊ သင်တန်းတက်ဖို့၊ အလုပ်ရုံဆွေးနွေးပွဲတွေ ပါဝင်ဖို့နဲ့ အတွေ့အကြုံရှိသူတွေရဲ့ အကြံဉာဏ်တွေ နားထောင်ဖို့ အချိန်လိုပါတယ်။
ဒါကြောင့် တစ်ပတ်ကို တစ်နာရီလောက် ကိုယ့်အလုပ်အကိုင်နဲ့ ပတ်သက်တဲ့ လေ့လာမှုတွေ၊ စိတ်ကူးစိတ်သန်းတွေ ရရှိဖို့ သီးသန့်အချိန်ပေးပါ။ တစ်နှစ်ဆိုရင် စုစုပေါင်း ၅၂ နာရီလောက် ရလာမှာဖြစ်လို့ သေးငယ်တဲ့အလေ့အကျင့်တစ်ခုကနေ အပြောင်းအလဲကြီးတစ်ခု ဖြစ်လာနိုင်ပါတယ်။
အလုပ်အကိုင်တိုးတက်မှုဟာ ကိုယ့်အတွင်းစိတ်ကနေ စတင်ပါတယ်။ စိတ်နေစိတ်ထား၊ စူးစမ်းလိုစိတ်၊ ရည်မှန်းချက်နဲ့ ဇွဲလုံ့လတွေက ကိုယ့်ရဲ့အလုပ်အကိုင်လမ်းကြောင်းကို ပြောင်းလဲပေးနိုင်ပါတယ်။ အထက်ပါအလေ့အကျင့်တွေထဲက ကိုယ့်အတွက်သင့်တော်တဲ့ အနည်းဆုံးနှစ်ခုကို ရွေးပြီး ၃ လကနေ ၆ လအထိ ပုံမှန်ကျင့်သုံးကြည့်ပါ။ အခက်အခဲတွေ ကြုံလာရင်လည်း မရပ်ဘဲ ဆက်လက်ကြိုးစားပါ။
Ref : lifegoalsmag
