အသက်ကြီးတဲ့ အမျိုးသမီးတွေနဲ့ ချိန်းတွေ့တာက အမျိုးသားတွေရဲ့ စိတ်ကူးယဉ်အိပ်မက်တစ်ခု ဖြစ်ပါတယ်။

ဒါပေမဲ့ တကယ့်လက်တွေ့မှာတော့ အသက် ၁၀ နှစ်လောက်ကွာတဲ့ အမျိုးသမီးတွေနဲ့ အတူနေရတဲ့အခါ အမျိုးသား ထက်ဝက်နီးပါးလောက်ဟာ အရမ်းကို စိုးရိမ်ပူပန်နေတတ်ကြတယ်လို့ Ziphealth ရဲ့ စစ်တမ်းအသစ်က ဖော်ပြထားပါတယ်။

အထူးသဖြင့် အသက် ၁၈ နှစ်ကနေ ၂၉ နှစ်ကြား လူငယ်တွေမှာ အဲဒီလိုစိုးရိမ်စိတ်က ၆၃ ရာခိုင်နှုန်းအထိ ရှိနေပြီး သူတို့ထဲက ၇၇ ရာခိုင်နှုန်းက အဲဒီလျှို့ဝှက်ချက်ကို ဘယ်သူ့ကိုမှ ဖွင့်မပြောရဲကြပါဘူး။

ဘာကြောင့် အဲဒီလောက်တောင် ကြောက်နေကြတာလဲဆိုရင် အဓိက အကြောင်းရင်းကတော့ အတွေ့အကြုံမရှိတဲ့သူလို့ အထင်ခံရမှာကို စိုးရိမ်နေကြလို့ပဲ ဖြစ်ပါတယ်။

စစ်တမ်းဖြေဆိုသူတွေရဲ့ ၃၁ ရာခိုင်နှုန်းက အဲဒီအချက်ကို အကြောက်ဆုံးဖြစ်ပြီး တချို့ကလည်း ဦးဆောင်ရမှာကို ကြောက်တာ၊ အချိန်ကြာကြာ မစွမ်းဆောင်နိုင်မှာကို ပူပန်တာတွေ ရှိနေကြပါတယ်။

အဲဒီလို ကိုယ့်ရဲ့စွမ်းဆောင်ရည်အပေါ် အကဲဖြတ်ပြီး အလွန်အမင်း စိုးရိမ်နေတာကြောင့် စိတ်အာရုံပျံ့လွင့်ပြီး တကယ့်သာယာမှုကို မခံစားရဘဲ ဖြစ်သွားတတ်တယ်လို့ ကျွမ်းကျင်သူတွေက သတိပေးထားပါတယ်။

ဒါပေမဲ့ စိတ်ဝင်စားစရာကောင်းတာက အဲဒီလို စိုးရိမ်နေတာတွေဟာ တကယ့်လက်တွေ့က အမျိုးသမီးကြောင့်မဟုတ်ဘဲ ကိုယ့်စိတ်ကူးထဲကနေ ကိုယ့်ကိုယ်ကိုယ် အကဲဖြတ်နေလို့သာ ဖြစ်တယ်လို့ Cosara ရဲ့ ကျန်းမာရေးပညာရှင် ဒေါက်တာ Kaye Smith က ထောက်ပြထားပါတယ်။

တကယ်တမ်းမှာ အတွေ့အကြုံရင့် အမျိုးသမီးတွေ လိုလားတာက အပြစ်အနာအဆာကင်းတဲ့ စွမ်းဆောင်ရည်မျိုး မဟုတ်ပါဘူး။ သူတို့နဲ့ အတူရှိနေပေးမှုနဲ့ အတုအယောင်မပါတဲ့ စိတ်ဝင်တစားရှိမှုကိုသာ အဓိက လိုချင်ကြတာ ဖြစ်ပါတယ်။

တကယ်တော့ London Metropolitan University ရဲ့ လေ့လာမှုတစ်ခုအရ အသက်ကြီးတဲ့ အမျိုးသမီးတွေနဲ့ တွဲတဲ့ လူငယ်တွေဟာ တခြားသူတွေထက် လိင်ပိုင်းဆိုင်ရာ စိုးရိမ်ပူပန်မှု ပိုနည်းတယ်လို့ ဆိုပါတယ်။

ဒါကြောင့် လိင်ပိုင်းဆိုင်ရာ ကျွမ်းကျင်သူ Marie Morice က Metro ကနေတဆင့် အမျိုးသားတွေကို အကြံပေးထားတာကတော့ အမျိုးသမီးကို သဘောကျအောင် လုပ်ဖို့ အရမ်းစိုးရိမ်နေမယ့်အစား သူမ ဘာကိုနှစ်သက်သလဲဆိုတာကို ရိုးရိုးရှင်းရှင်း မေးကြည့်ဖို့ပဲ ဖြစ်ပါတယ်။

အသက်ကြီးတဲ့ အမျိုးသမီးတွေဟာ ပြိုင်ပွဲက အကဲဖြတ်ဒိုင်တွေ မဟုတ်တဲ့အတွက် ကိုယ့်ကိုယ်ကိုယ် ဖိအားပေးနေတာတွေကို ရပ်တန့်လိုက်ဖို့ လိုအပ်ပါတယ်။

Ref: vice