ဂရမ်မီများဆုရှင် အက်ဒ်ရှီယန် COVID-19 ကူးစက်ခံရတယ်လို့ သိရပါတယ်။ ဒီသတင်းကို သူကိုယ်တိုင် Instagram ပေါ်မှာ ကြေညာခဲ့တာ ဖြစ်ပါတယ်။
အခုချိန်မှာ သူကိုယ်တိုင် Quarantine ဝင်နေရပြီး စီစဉ်ထားတဲ့ အင်တာဗျူးတွေနဲ့ သီဆိုဖျော်ဖြေမှုတွေကို အွန်လိုင်းကနေပဲ Virtual လုပ်ဆောင်သွားမယ်လို့လည်း Hollywood Reporter သတင်းက ဖော်ပြထားပါတယ်။
Photo: variety
“ကိုယ်လူတို့ရေ စိတ်မကောင်းစွာနဲ့ပဲ ကျွန်တော်တော့ COVID ဖြစ်သွားတယ်လို့ ပြောလိုက်ပါတယ်။ အခု ကျွန်တော် တစ်ယောက်တည်း ခွဲနေနေပါတယ်။ အစိုးရညွှန်ကြားချက်တွေအတိုင်းလည်း လိုက်နာနေပါတယ်။ ဆိုတော့။ ကျွန်တ်ေ ဘယ်သူနဲ့မှ လူချင်းတွေ့ဖို့ မဖြစ်နိုင်သေးပါဘူး။ အရင်က စီစဉ်ထားတဲ့ အင်တာဗျူးတွေ ၊ တင်ဆက်မှုတွေကို အိမ်ကနေပဲ လုပ်ရတော့မှာပါ။ ကျွန်တော့်ကြောင့် အဆင်မပြေဖြစ်သွားတဲ့ ဘယ်သူ့ကိုမဆို တောင်းပန်ပါတယ်။ အားလုံးပဲ ဘေးကင်းပါစေ” လို့ သူ့ရဲ့ Instagram မှာ ရေးထားပါတယ်။
အက်ဒ်ရှီယန် ကိုဗစ်ကူးစက်ခံရတဲ့သတင်းဟာ အောက်တိုဘာ ၂၉ ရက်နေ့ ထွက်မယ့် သူ့ရဲ့ စတုတ္ထမြောက် စတူဒီယိုအယ်လ်ဘမ်မထွက်ခင်ကလေးမှာ ကြားသိလားတာပါ။ တလောက Singles တွေအဖြစ် ထွက်ထားတဲ့ သူ့ရဲ့ Bad Habits ၊ Shivers သီချင်းတွေဟာ Billboard Hot 100 မှာ နံပါတ် ၂ နဲ့ နံပါတ် ၁၀ စွဲခဲ့ပါတယ်။ အက်ဒ်ရှီယန်ဟာ ပြီးခဲ့တဲ့လကပဲ သူ့ရဲ့ ၂၀၂၂ UK Stadium Tour ဖျော်ဖြေပွဲ ကျင်းပမယ့်ရက်တွေ ကြေညာခဲ့တာပါ။
လာမယ့် နိုဝင်ဘာ ၆ ရက် Saturday Night Live အစီအစဉ်မှာလည်း သူဟာ ဧည့်သည်ဂီတပညာရှင်အဖြစ် တက်ရောက်ဖို့ စီစဉ်ထားခဲ့တာပါ။ အက်ဒ်ရှီယန်ဟာ NBC ရဲ့ The Voice မှာ နည်းပြအဖြစ်လည်း လုပ်ဆောင်နေပါတယ်။
Featured Photo: CGTN
