ကြွက်သားတက်အောင် လုပ်ဖို့ဆိုတာ ဝိတ်ချတာထက်ကို ပိုပြီးခက်ခဲပါတယ်။ ခန္ဓာကိုယ်ကို ကြံ့ခိုင်သန်မာပြီး ကြွက်သားထုတက်လာဖို့ဆိုရင် လေ့ကျင့်ခန်းကို တစိုက်မတ်မတ်လုပ်ဆောင်ဖို့ လိုသလို နေ့စဉ် စားသုံးနေတဲ့ အစာအာဟာရကိုလည်း သေချာ ဂရုစိုက်ဖို့ လိုပါမယ်။ အကယ်၍ သင်ဟာ ကြွက်သားတည်ဆောက်ခြင်း ပန်းတိုင်ဆီကို လျှောက်လှမ်းနေသူတစ်ယောက်ဆိုရင်တော့ ပိုမိုလျှင်မြန်ထိရောက်စွာ ကြွက်သားထုတက်လာစေဖို့ သိထားသင့်တဲ့ လျှို့ဝှက်ချက်လေးတွေကို ပြောပြပေးချင်ပါတယ်။
(၁) Target ထားပြီးကစားပါ
Photo : Men’s Health
ကြွက်သားတည်ဆောက်ရေးအတွက် လေ့ကျင့်ခန်းလုပ်တဲ့အခါ ဘော်ဒီအစိတ်အပိုင်း တစ်ခုစီကို ပစ်မှတ်ထားပြီး လေ့ကျင့်သင့်ပါတယ်။ ဥပမာအားဖြင့် ဝမ်းဗိုက်ကြွက်သား ၊ ရင်ဘတ် ၊ လက်မောင်းနဲ့ အောက်ပိုင်းကြွက်သားများ စသည်ဖြင့် ကြွက်သားအစိတ် အပိုင်းတစ်ခုစီကို သေချာ Target ထားပြီးကစားတာက ကြွက်သားတက်ဖို့ ပိုမိုထိရောက်မှု ရှိစေပါတယ်။
(၂) မတူညီတဲ့ ကစားနည်းတွေ ပြောင်းဆော့ပါ
Photo : Man of Many
နေ့တိုင်းမှာ တူညီတဲ့လေ့ကျင့်ခန်းတွေကိုပဲ ဆော့နေမယ်ဆိုရင် ကြွက်သားတည်ဆောက်မှုအပိုင်းမှာ တိုးတက်ပြောင်းလဲလာမှု နှေးကွေးစေနိုင်သလို ကြွက်သားတည်ဆောက်ခြင်း အပေါ် လည်း စိတ်အားထက်သန်မှုလျော့နည်းလာပြီး ငြီးငွေ့လာနိုင်ပါတယ်။ ဒါကြောင့် ကစားနည်းတွေကို အမြဲပုံမှန်သတ်မှတ်မထားပဲ ကြွက်သားအုပ်စုအလိုက် ဆော့ရမယ့် ကစားနည်းတွေကို ပြောင်းလဲကစားပေးတာ ၊ ဝိတ်တိုးမတာ စသည်ဖြင့် လုပ်ဆောင်ပေးဖို့ လိုပါတယ်။
(၃) အသက်ရှုပါ
Photo : AskMen
ဝိတ်ကစားနေချိန်မှာ အသက်ရှုဖို့ကိုလည်း မေ့မထားဖို့ အကြံပြုချင်ပါတယ်။ ဝိတ်ကစားစဉ်အသက်ရှုပေးတာဟာ သွေးပေါင်ချိန်ကို မှန်ကန်စေပြီး ကြွက်သားတွေနဲ့ နှလုံးကို အောက်ဆီဂျင်ပိုမိုရရှိစေကာ စွမ်းအားအပြည့်နဲ့ လေ့ကျင့်ခန်းလုပ်ရာမှာ ပိုမိုထိရောက်မှုရှိစေမှာဖြစ်ပါတယ်။ စိတ်ကိုလည်း တည်ငြိမ်စေတဲ့အတွက် မတော်တဆထိခိုက်ဒဏ်ရာရမှုတွေကိုလည်း လျော့ချပေးနိုင်ပါတယ်။ ဒါကြောင့်လည်း Heavyweight တွေ ကစားတဲ့အခါမှာ အသက်ပြင်းပြင်း ရှုတာမျိုးတွေ လုပ်ကြတာပါ။
(၄) ခန္ဓာကိုယ်ကို တုန့်ပြန်မှုကို အမြဲသတိပြုပါ
Photo : Steel Supplements
ကြွက်သားတက်ဖို့ ကစားကြတဲ့အခါ ကြွက်သားတက်ခြင်းအပေါ်ကိုပဲ အာရုံစိုက်ပြီး ခန္ဓာကိုယ်ကို တုန့်ပြန်မှုတွေကို သတိမပြုမိတာမျိုး ဖြစ်တက်ပါတယ်။ တကယ်တော့ ကြွက်သားတည်ဆောက်မှုအပိုင်းမှာ ကြွက်သားထုတက်ဖို့နဲ့အတူ ကိုယ့်ခန္ဓာကိုယ်ရဲ့ တုန့်ပြန်လာမှုတွေကိုလည်း အမြဲသတိချပ်နေရမှာပါ။
ကိုယ့် ခန္ဓာကိုယ်က နားဖို့လိုနေလား ၊ ကြွက်သား တင်းမာမှုတစ်ခုခု ခံစားနေရလား ၊ ခန္ဓာကိုယ်က မတက်နိုင်တဲ့ ဝိတ်အလေးချိန်တွေနဲ့ ကစားနေမိလား စသည်ဖြင့်ပေါ့။ ခန္ဓာကိုယ်ကို တုန့်ပြန်မှုတွေကို သတိထားမယ်ဆိုရင် မလိုလားအပ်တဲ့ ဒဏ်ရာပြဿနာတွေလျော့နည်းပြီး ကျန်းကျန်းမာမာနဲ့ ကြွက်သားထုတက်အောင် ကစားနိုင်မှာပဲ ဖြစ်ပါတယ်။
Featured Photo : Men’s Health
