စွန့်စားခန်းခရီးတွေ ထွက်ရတာ စိတ်ဝင်စားကြတဲ့ ကွီးတို့အတွက် အကောင်းဆုံးဝါသနာတစ်ခုက ခရီးရှည်လမ်းကြမ်းလျှောက် Hiking ထွက်ခြင်း ဖြစ်မှာပါ။ အခုလို အေးတဲ့ ရာသီဥတုမျိုးက Outdoor Activities လေးတွေ လုပ်လို့ အကောင်းဆုံးရာသီပါ။ ဒီရာသီမျိုးမှာ သူငယ်ချင်းတွေနဲ့ ထွက်ပြီး တောစခန်းထွက်တာ ၊ Hiking လျှောက်တာတွေ လုပ်လို့ ကောင်းပါတယ်။ တစ်ခုသတိထားရမှာကတော့ အေးတဲ့ ရာသီမျိုးဟာ ကြွက်တက်နိုင်ခြေ များပါတယ်။
ကြွက်သားတွေဟာ ရာသီဥတုအေးလာချိန်မှာ အပူထုတ်မှု မြန်မြန်ဆုံးရှုံးလာပြီး ကြွက်သားစိုင် တင်းလာ/ကျုံ့လာနိုင်ပါတယ်။ ကြွက်သားအပြင် အဆစ်အမြစ်တွေပါ တင်းလာရာကနေ ဒီဒဏ်ကြောင့် ကြွက်တာတွေ နာကျင်တင်းခဲပြီး အလုပ်လုပ်ရ ခက်လာတတ်ပါတယ်။ ဒါကိုပဲ ကြွက်တက်တယ်လို့ ခေါ်တာ ဖြစ်ပါတယ်။ ကြွက်တက်တာဟာ အလွန်ပဲ နာကျင်ပြီး ခံရခက်တဲ့ ဝေဒနာဖြစ်လို့ Hiking ထွက်တုန်း ကြွက်မတက်အောင် ရှောင်ကြဉ်သင့်တာလေးတွေ ပြောပြပါရစေ။
(၁) သွေးပူလေ့ကျင့်ခန်း သေချာလုပ်ပါ
Photo: Unsplash
ဆောင်းတွင်း အားကစားလုပ်မယ်ဆိုရင် ကြွက်မတက်ဖို့ အရင်ဆုံး Warm Up လို့ ခေါ်တဲ့ သွေးပူလေ့ကျင့်ခန်းကို သေချာလုပ်ဖို့ လိုပါတယ်။ ရာသီဥတုပူနွေးတဲ့အချိန်မျိုးမှာဆို Warm Up မလုပ်ဘဲ အားကစားလုပ်လို့ ရနိုင်ပေမယ့် ဆောင်းရာသီလို အေးတဲ့ရာသီမျိုးမှာ အားကစားလုပ်မယ်ဆိုရင် အရင်ဆုံး သွေးပူလေ့ကျင့်ခန်းအတွက် မဖြစ်မနေ အချိန်ပေးဖို့ မမေ့သင့်ပါဘူး။
(၂) ရေဓါတ်ကောင်းကောင်း ဖြည့်ပါ
Photo: Unsplash
အားကစားလုပ်နေစဉ်မှာ ရေဓါတ်ပြည့်ဝဖို့ဟာ အလွန်ပဲ အရေးကြီးပါတယ်။ အေးတဲ့ရာသီဥတုမှာ ရေသောက်ဖို့က ပိုလို့တောင် အရေးကြီးပါတယ်။ ရေဓါတ်ချို့တဲ့ချိန်မှာ ကြွက်တက်မှုနဲ့ ကြွက်သားနာကျင်မှု ပိုဖြစ်တတ်လို့ပါပဲ။ ဒါကြောင့် အေးလို့ ရေမသောက်ချင်ဘူးဆိုရင်တောင် အားကစားမလုပ်ခင် ၊ လုပ်နေစဉ်နဲ့ လုပ်ပြီးချိန်မှာ ရေများများ သောက်ဖို့ ပြောချင်ပါတယ်။
(၃) Heat Pack ဆောင်သွားပါ
Photo: Unsplash
နောက်ဆုံးအချက်အနေနဲ့ ပြောချင်တာက သိပ်အေးလှတဲ့ ရာသီမျိုးမှာ ခရီးရှည် လမ်းလျှောက်သူတွေဟာ Heat Pack တို့ Hand Warmers တို့လိုမျိုးဆောင်သွားဖို့ အကြံပြုချင်ပါတယ်။ ခန္ဓာကိုယ်တစ်ကိုယ်လုံး နွေးစေမယ့် အဝတ်အစားတွေ ဝတ်သွားဖို့လည်း မမေ့သင့်ပါဘူး။ အနွေးဓါတ်ပြည့်နေတဲ့ ကိုယ်ခန္ဓာဟာ အပူဓါတ်ကြောင့် သွေးစီးဆင်းမှု ပိုကောင်းလာပြီး ကြွက်သားတွေတင်းတာ ၊ နာတာတွေ သက်သာစေနိုင်ပါတယ်။
Featured Photo: Unsplash
