ဘရိုက်တန်အသင်းကတော့ ဒီနေ့ မနက်ခင်းမှာပဲ ဘောလုံး ဝါသနာအိုးတို့အားလုံးကို Surprise ရော Coca Cola ပါ ရောပြီး တိုက်လိုက်ပါပြီ။ ဘာလို့လဲဆိုတော့ သူတို့အသင်းနဲ့ ဘာသတင်းမှကို မထွက်လိုက်တဲ့ နာမည်ကျော် ကစားသမားတစ်ဦးကို ခေါ်ယူဖို့ ရုတ်တရက်ကြီး သဘောတူညီမှု ရသွားခဲ့တာကြောင့်ပါ။ ဘရိုက်တန်ဆီ ရောက်လာတော့မယ့် ကစားသမားကတော့ အန်ဆူ ဖာတီပဲ ဖြစ်ပါတယ်။
Photo Credit : Football365
လာမာစီယာ အကယ်ဒမီထွက် ဘာစီလိုနာအသင်းရဲ့ ရတနာလေး အန်ဆူ ဖာတီဟာ ဘာစီလိုနာရဲ့ legendary player ကြီး လီယွန်နယ် မက်ဆီ ဝတ်ဆင်ခဲ့တဲ့ ကျောနံပါတ် (၁၀)ကိုပါ ဆက်ခံထားရတဲ့ ကစားသမားတစ်ဦးပါ။ အသက် (၂၀)အရွယ်သာ ရှိသေးပြီး အသက်ငယ်ငယ်လေးနဲ့ကို အတော်လေး hype ခဲ့ရသူလည်း ဖြစ်ပါတယ်။ ဒါပေမယ့် လက်ရှိမှာတော့ ဒီကစားသမားလေးက ဘာစီလိုနာမှာ နေရာရဖို့ မလွယ်ကူတော့ရာကနေ အသင်းအပြောင်းအလဲ လုပ်ဆောင်ဖို့ အကြောင်းဖန်လာခဲ့ရပါတယ်။
Photo Credit : Twitter
ဖာတီလို talented player လေးကို လိုချင်တဲ့ ကလပ်အသင်းတွေ များစွာ ရှိနေကြပြီး မနေ့ကပဲ ချယ်လ်ဆီး စပါးအသင်းတွေက ဖာတီကို အငှား ကမ်းလှမ်းမှုတွေ အပြိုင်လုပ်ဆောင်ဖို့ ပြင်ဆင်နေပြီဆိုတဲ့ သတင်းတွေ ထွက်ပေါ်လာခဲ့ပါတယ်။ ဒီလန်ဒန် နှစ်သင်းထဲမှာ စပါးအသင်းကတောင် ဖာတီကို အငှားနဲ့ ခေါ်နိုင်ဖို့ ပိုပြီး အလားအလာကောင်းခဲ့ပါသေးတယ်။ ဒါပေမယ့် ဒီလို အခြေအနေကနေ ရုတ်တရက်ကြီး ဖာတီက ဘရိုက်တန်နဲ့ပါ သတင်းထွက်လာရာ နောက်ဆုံး here we go အဆင့်ထိ အံ့အားသင့်စဖွယ် ဖြစ်သွားခဲ့ရပါတယ်။
Photo Credit : Fabrizio Romano
ဘရိုက်တန်က ဖာတီကို ဘာစီလိုနာအသင်းကနေ တစ်ရာသီ အငှားစာချုပ်နဲ့ ခေါ်ယူဖို့ သဘောတူညီမှု ရရှိခဲ့တာ ဖြစ်သလို ဖာတီကိုယ်တိုင်ကလည်း ဘရိုက်တန် နည်းပြ ဒီဇာဘီနဲ့ ပူးပေါင်းချင်တာကြောင့် ကမ်းလှမ်းမှုကို ခေါင်းညိတ်ခဲ့ပါတယ်။ အချိန်တိုလေးအတွင်းမှာပဲ ဖာတီလို လူငယ် ကြယ်ပွင့်လေး တစ်ဦးကို အသင်းကြီးတွေ လက်ထဲကနေ မသိမသာလေး ဝင်လုနိုင်ခဲ့တဲ့ ဘရိုက်တန်ရဲ့ ကြိုးပမ်းမှုဟာလည်း လုံးဝကို အထင်ကြီးစရာပါ။ အခုတော့ ဖာတီက လာလီဂါထက် ပြိုင်ဆိုင်မှု ပိုမို ပြင်းထန်တဲ့ ပရီးမီးယားလိဂ်မှာ သူရဲ့ကစားသမားဘဝကို တစ်ရာသီ ဖြတ်သန်းသွားရတော့မှာဖြစ်ပြီး လုံးဝ မရင်းနှီးဖူးသေးတဲ့ နယ်မြေသစ်မှာ ဘာတွေ လုပ်ပြသွားနိုင်မလဲဆိုတာတော့ စောင့်ကြည့်ရပါမယ်။
Featured Photo : Marca
