ရုံးအလုပ်များနဲ့ မအားမလပ်နိုင်အောင် အလုပ်များကြတဲ့ အမျိုးသားများအနေနဲ့ Gym ကို တကူးတကသွားပြီး Workout ပြုလုပ်ဖို့ဆိုတာကတော့ ခက်ခဲလှပါတယ်။ ဒါပေမဲ့ Workout ပြုလုပ်ဖို့ဆိုတာ Gym သွားမှ လုပ်လို့ရတာမဟုတ်ပါဘူး။ မိမိအိမ်မှာ မိနစ်အနည်းငယ်မျှ အချိန်ပေးလိုက်ရုံဖြင့် ခန္ဓာကိုယ်ရှိ အဆီပိုများကို ဖယ်ရှားပြီး မဝလာအောင် ခန္ဓာကိုယ် ထိန်းလို့ရပါသေးတယ်။
ဒီဆောင်းပါးလေးထဲမှာတော့ အလုပ်များလွန်းလှတဲ့ ယောကျာ်းများအတွက် မဝလာအောင် ခန္ဓာကိုယ် ထိန်းသိမ်းပေးမယ့် ၁၅ မိနစ်စာ လေ့ကျင့်ခန်းများကို ဖော်ပြပေးလိုက်ရပါတယ်။
အရင်ဦးဆုံး Workout မစခင်မှာ သွေးပူလေ့ကျင့်ခန်း ပြုလုပ်ပေးဖို့လိုပါတယ်။ သွေးပူလေ့ကျင့်ခန်းကို ၃ မိနစ်ခန့် ပြုလုပ်ပြီးမှ အခုဆက်ဖော်ပြပေးမယ့် လေ့ကျင့်ခန်းများ ဆက်လုပ်ပေးလိုက်ပါ။
လေ့ကျင့်ခန်း (၁)
Photo: Dribbble.com
အရင်ဦးဆုံး ခြေထောက်နှစ်ဖက်ကို အနည်းငယ် ချဲထားပါ။ ထို့နောက် ခြေထောက်ကားပြီး ခုန်လိုက်တဲ့အချိန်မှာ လက်နှစ်ဖက်ကို အပေါ်မြှောက်လိုက်ပါ။ ဒီလေ့ကျင့်ခန်းကို စုစုပေါင်း အကြိမ် ၂၀ ခန့် ပြုလုပ်ပေးရပါမယ်။
လေ့ကျင့်ခန်း (၂)
Photo: 123RF.com
အရင်ဦးဆုံး ပထမပုံအတိုင်း အသင့်ပြင်ထားပါ။ ခြေထောက်ကို ပုခုံးအကျယ်အတိုင်း ချဲထားပါ။ လက်နှစ်ဖက်ကို အရှေ့သို့ ဆန့်တန်းထားပါ။ ထို့နောက် တင်ပါးနောက်ပစ်ပြီး ထိုင်မယ့်ပုံသဏ္ဍာန် ပြုလုပ်လိုက်ပါ။ ပြီးရင် မတ်တပ်ပြန်ရပ်လိုက်ပါ။ စုစုပေါင်း အကြိမ်၂၀ ပြုလုပ်ရပါမယ်။
လေ့ကျင့်ခန်း (၃)
Photo: 24Life.com
အရင်ဦးဆုံး ခန္ဓာကိုယ်ကို မတ်မတ်ရပ်ကာ အသင့်အနေအထားပြင်ပါ။ ထို့နောက် ဘယ်ခြေကို အရှေ့သို့လှမ်းပြီး ညာဒူးကို ၉၀ ဒီဂရီကွေးညွှတ်လိုက်ပါ။ ထို့နောက် ညာဒူးကို အရှေ့သို့လှမ်းပြီး ဘယ်ဒူးကို ၉၀ ဒီဂရီကွေးညွှတ်လိုက်ပါ။ ဘယ်ညာကို တစ်ကြိမ်လို့ သတ်မှတ်ပြီး စုစုပေါင်း အကြိမ် ၂၀ ပြုလုပ်ရပါမယ်။
လေ့ကျင့်ခန်း (၄)
Photo: Wikye.com
ဒီလေ့ကျင့်ခန်းကတော့ ယောကျာ်းလေးများနဲ့ ရင်းနှီးပြီးသားလေ့ကျင့်ခန်းတစ်ခုဖြစ်တဲ့ ဒိုက်ထိုးလေ့ကျင့်ခန်းပဲဖြစ်ပါတယ်။ စုစုပေါင်း ၁၀ ကြိမ် ဒိုက်ထိုးရမှာဖြစ်ပါတယ်။
လေ့ကျင့်ခန်း (၅)
Photo: Pinterest.com
နောက်ထပ်လေ့ကျင့်ခန်းတစ်ခုကတော့ လက်ဝှေ့ထိုးခြင်းပဲဖြစ်ပါတယ်။ ဒီလေ့ကျင့်ခန်းက လက်မောင်းကြွက်သားများကို သန်မာစေပါတယ်။ အခုမှ စလုပ်မယ့်သူများအနေနဲ့ အလွတ်ထိုးသင့်ပြီး အနည်းငယ် ကျွမ်းကျင်သွားပါက ၅ ပေါင် အလေးတုံးနှစ်တုံးဖြင့် လက်ဝှေ့ထိုးနိုင်ပါတယ်။
လေ့ကျင့်ခန်း (၆)
Photo: Bodybuilding.com
တံတောင်ကို ပုံပါအတိုင်းထောက်ထားပြီး ခန္ဓာကိုယ်ကို တစ်ဖြောင့်တည်း ဆန့်တန်းထားပါ။ ထိုအနေအထားအတိုင်း တစ်မိနစ်ခန့် တောင့်ထားပါ။
လေ့ကျင့်ခန်း တစ်ခုချင်းစီကို သုံးခါ ပြုလုပ်ရမှာဖြစ်ပြီး လေ့ကျင့်ခန်းတစ်ခုပြီးသွားပါက တစ်မိနစ်ခန့် အနားယူနိုင်ပါတယ်။
ဒီလေ့ကျင့်ခန်းများကတော့ အလုပ်များသူတွေအတွက် ၁၅ မိနစ်ခန့် ပြုလုပ်နိုင်တဲ့ လေ့ကျင့်ခန်းများပဲဖြစ်ပါတယ်။
Source: Pinterest.com
