သင် စားသုံးလိုက်တဲ့အစားအစာများသည် သင့်ခန္ဓာကိုယ်ကို ဖော်ပြပေးနိုင်ပါတယ်။ အသီးအရွက်နှင့် အသားဓာတ်များ မျှတစွာ စားသုံးသူသည် ကျန်းမာသောခန္ဓာကိုယ်ကို ပိုင်ဆိုင်နိုင်ပြီး အဆီ၊ အဆိမ့်နှင့် အချို စားသူများကတော့ အဝလွန်ခြင်း၊ သွေးတိုးရောဂါ၊ ဆီးချိုရောဂါတို့ကို ခံစားရနိုင်ပါတယ်။
ကိုယ်လက်လှုပ်ရှားမှုမရှိခြင်း၊ ကျန်းမာရေးနှင့် ညီညွှတ်စာ မစားသုံးခြင်းတို့သည် အဝလွန်ခြင်းရဲ့အဓိကတရားခံများပဲဖြစ်ပါတယ်။ မိမိခန္ဓာကိုယ်မှာ အဆီနည်းနည်းတက်လာပြီလို့ သတိထားမိလိုက်တာနဲ့တပြိုင်နက် အဝလွန်ရောဂါ မခံစားရအောင် စတင်၍ ကိုယ်လက်လှုပ်ရှားအားကစား ပြုလုပ်သင့်ပါပြီ။
သင့်အနေနဲ့ အလုပ်အရမ်းများတယ် အချိန်မပေးနိုင်ဘူးဆိုရင်တောင်မှ တစ်ရက်လျှင် ၁၅ မိနစ်စာပဲ အချိန်ဖယ်ထားပါ။ ၁၅ မိနစ်တည်းနဲ့ ပြုလုပ်လို့ရမယ့် လေ့ကျင့်ခန်းအချို့ကို ဝေမျှပေးလိုက်ပါတယ်။
လေ့ကျင့်ခန်းမစခင်မှာ သွေးပူလေ့ကျင့်ခန်းကို တစ်မိနစ်ခန့်ပြုလုပ်ပေးပါ။
လေ့ကျင့်ခန်း (၁)
ခြေထောက်ကို ပုခုံးအကျယ်ထက် ပိုကျယ်အောင် ကားထားပြီး ထိုင်ချလိုက်ပါ။ ပြန်ထတဲ့အချိန်မှာ ခုန်လိုက်ပါ။ ထိုင်၊ ထ၊ ခုန် ကို စက္ကန့် ၃၀ ပြုလုပ်ပေးရပါမယ်။
လေ့ကျင့်ခန်း (၂)
ဒီလေ့ကျင့်ခန်းသည်လည်း စောစောက ထိုင်ထ လေ့ကျင့်ခန်းနဲ့ ဆင်တူပါတယ်။ ခြေထောက်နှစ်ဖက်ကို စောစောကအတိုင်း ချဲထားပါ။ ထိုင်ပါ။ ပြန်ထတဲ့အချိန်မှာ ညာလက်ကို ဘယ်ဘက်ထောင့်သို့ လက်သီး လှမ်းထိုးလိုက်ပါ။ ပြန်ထိုင်ပါ။ ဘယ်လက်ကို ညာဘက်ထောင့်သို့ လက်သီး လှမ်းထိုးလိုက်ပါ။ စက္ကန့် ၃၀ ပြုလုပ်ပေးရပါမယ်။ လက်ထဲတွင် ဘာမှမကိုင်ဘဲ အလွတ်ထိုးလို့လည်းရသလို အလေးတုံး (သို့) ရေဘူးကိုင်၍လည်း ထိုးနိုင်ပါတယ်။
လေ့ကျင့်ခန်း (၃)
အရင်ဦးဆုံး ခြေထောက်နှစ်ဖက် ကပ်ထားပါ။ လက်နှစ်ဖက်ကို ခန္ဓာကိုယ်ဘေးဘက်တွင် ကပ်ထားပါ။ ထို့နောက် ခြေထောက်နှစ်ဖက်ကို ကားတဲ့အချိန်မှာ လက်နှစ်ဖက်ကို အပေါ်မြှောက်ကာ ထိကပ်လိုက်ပါ။ မူလအနေအထားအတိုင်း ပြန်နေပါ။ ဒီလေ့ကျင့်ခန်းကိုလည်း စက္ကန့် ၃၀ ပြုလုပ်ရပါမယ်။
လေ့ကျင့်ခန်း (၄)
အရင်ဦးဆုံး ခြေထောက်နှစ်ဖက်ကို ပုခုံးအကျယ်အတိုင်း ချဲထားပါ။ လက်နှစ်ဖက်ကို နောက်စေ့တွင် ကပ်ထားပါ။ ထို့နောက် ညာဒူးမြှောက်ကာ ဘယ်တံတောင်ဖြင့် ထိကပ်ပေးလိုက်ပါ။ တစ်ဖန် ဘယ်ဒူးမြှောက်ကာ ညာတံတောင်ဖြင့် ထိကပ်ပေးလိုက်ပါ။ ဘယ်ညာတစ်လှည့်စီကို စက္ကန့် ၃၀ ပြုလုပ်ရပါမယ်။
လေ့ကျင့်ခန်း (၅)
ဒီလေ့ကျင့်ခန်းကတော့ အဆင့် (၄) ဆင့်ရှိပါမယ်။ အရင်ဦးဆုံး လက်နှစ်ဖက်ကို ပုခုံးအောက်တွင် ထောက်ထားပါ။
အဆင့် (၁) ဘယ်လက်ကို ညာပုခုံးဖြင့် ထိပါ။ လက်ပြန်ချပါ။
အဆင့် (၂) ညာလက်ကို ဘယ်ပုခုံးဖြင့် ထိကပ်ပါ။ လက်ပြန်ချပါ။
အဆင့် (၃) ညာဒူးကွေးပါ။
အဆင့် (၄) ဘယ်ဒူးကွေးပါ။
ထိုအဆင့်အတိုင်း စက္ကန့် ၃၀ ပြုလုပ်ရပါမယ်။
လေ့ကျင့်ခန်း (၆)
မိမိရပ်နေတဲ့နေရာကနေ ခြေလှမ်း ၆ လှမ်းခန့် ရှေ့သို့ခုန်လိုက်ပါ။ ထို့နောက် မူလနေရာသို့ ခပ်မြန်မြန်ပြန်ဆုတ်လိုက်ပါ။ စက္ကန့် ၃၀ ပြုလုပ်ရပါမယ်။
လေ့ကျင့်ခန်း (၁)ကနေ (၆) အထိပြီးသွားပါက တစ်မိနစ်နားပါ။ ထိုအစီအစဉ်အတိုင်း နောက်တစ်ကြိမ်ထပ်လုပ်ပါ။ တစ်မိနစ်နားပါ။ တတိယအကြိမ်ထပ်လုပ်ပါ။ တစ်မိနစ်ခန့် နားပြီးပါက အကြောလျော့လေ့ကျင့်ခန်းဖြင့် အဆုံးသတ်လိုက်ပါ။
Source: Flabfix.com
