လေ့ကျင့်ခန်း စလုပ်တဲ့အချိန်မှာ အသိသာဆုံးက ကိုယ်လက်နာကျင်ကိုက်ခဲတဲ့ ဝေဒနာကို အလူးအလဲ ခံစားရတာပါပဲ။ ဒါဟာ ကွီးတို့တစ်ယောက်တည်းဖြစ်တာ မဟုတ်ပါဘူး။ ကိုယ်လက်လှုပ်ရှားမှုနဲ့ ကင်းကွာပြီး လေ့ကျင့်ခန်းအခုမှပြန်စလုပ်တဲ့ လူတိုင်း ဒီပြဿနာ ကြုံကြရပါတယ်။ လေ့ကျင့်ခန်းလုပ်ခြင်းကြောင့် ခံစားရတဲ့ နာကျင်ကိုက်ခဲမှုတွေဟာ အနည်း ဆုံး ၅ ရက်ကနေ တစ်ပတ်ခန့်လောက်ကြာတက်ပြီး နောက်ပိုင်းမှာတော့ ပုံမှန်အတိုင်း ပြန်ဖြစ်သွားပါတယ်။

အကယ်၍ ကွီးက အခုမှစပြီးလေ့ကျင့်ခန်းပြန်လုပ်လို့ နာကျင်ကိုက်ခဲမှု ဝေဒနာတွေခံစားနေရတယ်ဆိုရင်တော့ အခုပြောပြမယ့် နည်းလမ်းလေးတွေက အထိုက်အလျောက်သက်သာအောင် ကူညီပေးနိုင်ပါလိမ့်မယ်။

(၁) ရေများများသောက်ပါ

Photo : New Jersey Urology

လေ့ကျင့်ခန်းလုပ်နေစဉ်အတွင်းနဲ့ လေ့ကျင့်ခန်းလုပ်ပြီးနောက်မှာ ရေကိုတက်နိုင်သလောက် များများသောက်ပေးသင့်ပါတယ်။ ဘာလို့ဆို ရေဓာတ်ဟာ ရောင်ရမ်းနာကျင်ခြင်းကို သက်သာစေပြီး ကြွက်သားတွေမှာ လိုအပ်တဲ့အာဟာရဓာတ်တွေကို ပို့ဆောင်ပေးနေလို့ ဖြစ်ပါတယ်။ ဒါကြောင့် ရေဓာတ်ပြည့်ဝအောင် သောက်ပေးမယ်ဆိုရင် ကြွက်သားနာကျင်ကိုက်ခဲခြင်းကို သက်သာစေပြီး အချိန်တိုအတွင်း ကြွက်သားများပြန်လည် သန်စွမ်းကောင်းမွန်လာစေဖို့ ကူညီပေးနိုင်ပါတယ်။

(၂) လေ့ကျင့်ခန်းကို ပုံမှန်လေး ဆက်လုပ်နေပါ

Photo : Freepik

ကြွက်သားတွေနာကျင်ကိုက်ခဲနေလို့ အားကစားဆက်မလုပ်တော့ဘူးဆိုတာမျိုး လုံးဝမလုပ်ပါနဲ့။ လေ့ကျင့်ခန်းလုပ်လိုက် ရပ်လိုက်လုပ်တာက ပိုဆိုးစေ နိုင်ပါတယ်။ အပေါ်မှာပြောခဲ့သလိုပဲ လေ့ကျင့်ခန်းစလုပ်ပြီဆိုတာနဲ့ အနည်းဆုံး ၅ ရက်နေ တစ်ပတ်လောက်အထိက နာကျင်ကိုက်ခဲမှုဝေဒနာခံစားရတာ ထုံးစံဖြစ်ပါတယ်။ ဒါကြောင့် တစ်ရက် နှစ်ရက်လောက်ကစားပြီး ဆက်မဆော့တာမျိုးမလုပ်ပဲ ပုံမှန်လေး ဆက်ကစားသွားဖို့လိုပါတယ်။ အနည်းဆုံးတော့ လမ်းလျောက်တာ ၊ စက်ဘီးနင်းတာ ၊ ခပ်ရွရွပြေးတာ စတဲ့အသေးစားလှုပ်ရှားမှုလေးတွေနဲ့ ကြွက်သားတွေကို လေ့ကျင့်ပေးနေရမှာ ဖြစ်ပါတယ်။ ဒါမှလည်း ကြွက်သားနာကျင်ကိုက်ခဲမှုတွေအမြန်သက်သာပြီး နောက်ရက်တွေမှာ လေ့ကျင့်ခန်းလုပ်လို့ ပိုကောင်းစေမှာပါ။

(၃) Foam Roller အသုံးပြုပါ

Photo : Men’s Health

Foam Roller ဆိုတာကတော့ လေ့ကျင့်ခန်းလုပ်ပြီးချိန်မှာ ကြွက်သားတင်းမာမှုတွေကို သက်သာစေဖို့ အသုံးပြုတဲ့ပစ္စည်းတစ်ခုလို့ အလွယ်ပြောလို့ရပါတယ်။ ပုံမှန်အားဖြင့် လေ့ကျင့်ခန်းလုပ်ပြီးရင် အကြောလျော့ပေးရသလို Foam Roller ကလည်း အကြော့လျော့ရာမှာ အသုံးပြုတဲ့ အကူပစ္စည်းတစ်ခု ဖြစ်ပါတယ်။ လေ့ကျင့်ခန်းလုပ်ပြီးနောက် ခြေသလုံး ၊ ပေါင် ၊ လက်မောင်း ၊ ခါး ၊ ဝမ်းဗိုက် စတဲ့နေရာတွေကို Foam Roller နဲ့လှိမ့်ပေးရင် ကြွက်သားတင်းမာမှုကို ပြေလျော့စေမှာဖြစ်ပြီး နာကျင်ကိုက်ခဲတဲ့ဝေဒနာကို သက်သာစေနိုင်ပါတယ်။

(၄) ကောင်းကောင်းအနားယူပါ

Photo : Men’s Journal

လေ့ကျင့်ခန်းလုပ်ပြီးချိန်မှာ ကြွက်သားတွေကို ကောင်းကောင်းအနားပေးဖို့လည်းလိုပါတယ်။ ဒီအတွက် အကောင်းဆုံးကတော့ အိပ်ချိန်ပြည့်ပြည့်ဝဝအိပ်စက်ခြင်းဖြင့် အနားယူပေးဖို့ပါပဲ။ အိပ်စက်ခြင်ဟာ ခန္ဓာကိုယ်ကြွက်သားကြွက်သားများကို အနားရစေပြီး အားကစားလုပ်ခြင်းကြောင့် ဖြစ်ပေါ်လာတဲ့ ကြွက်သားပြိုကွဲမှုတွေကိုလည်း ပြန်လည်ကောင်းမွန်စေဖို့ ကူညီပေးနိုင်ပါတယ်။ ဒါကြောင့် လေ့ကျင့်ခန်းစလုပ်တဲ့ရက်တွေမှာ ကြွက်သားနာကျင်ကိုက်ခဲမှုကိုသက်သာစေပြီး ကြွက်သားများသန်မာလာစေဖို့ အိပ်ရေးဝဝအိပ်စက်ခြင်းဖြင့် အနားယူပေးဖိုလိုပါတယ်။

Featured Photo : Men’s Journal