ကျန်းမာကြံ့ခိုင်ပြီး ဝိတ်ကျစေဖို့အကောင်းဆုံးလေ့ကျင့်ခန်းတစ်ခုကတော့ အပြေးလေ့ကျင့်ခန်းပဲ ဖြစ်ပါတယ်။ မည်သည့် အားကစားကိရိယာပစ္စည်းမှ မလိုပဲ အချိန်နေရာ မရွေး / အသက်အရွယ်မရွေး ပြုလုပ်နိုင်မယ့် လေ့ကျင့်ခန်းပဲ ဖြစ်ပါတယ်။ ခန္ဓာကိုယ်အတွက် ကောင်းကျိုးတွေများစွာရှိစေတဲ့ အပြေးလေ့ကျင့်ခန်းကို ကွီးတို့စတင်ပြုလုပ်တော့မယ်ဆိုရင် သိထားရမယ့်အချက်လေးတွေရှိပါတယ်။ ဒါကတော့ အပြေးလေ့ကျင့်ခန်းပြုလုပ်နေစဉ်မှာ ကွီးတို့ကို ထိခိုက်ဒဏ်ရာရမှုနည်းစေဖို့ သတိထားသင့်တဲ့ အချက်တွေပဲ ဖြစ်ပါတယ်။
(၁) သွေးပူလေ့ကျင့်ခန်းလုပ်ပါ
Photo : YouWorkForThem
အပြေးလေ့ကျင့်ခန်းမစတင်ခင်မှာ အကြော့လျော့တာ သွေးပူလေ့ကျင့်ခန်းလုပ်တာတွေကို မဖြစ်မနေလုပ်ပေးဖို့ လိုပါတယ်။ ဒါပေမယ့် သတိထားရမှာတစ်ခုက သွေးပူလေ့ကျင့်ခန်းနဲ့ အကြောလျော့ခြင်းကို အပြင်းအထန်မလုပ်မိစေဖို့ပါပဲ။ အလွန်အကျွံ အကြောလျော့ဟာ ကြွက်သားနဲ့ အရွက်တွေကို ထိခိုက်နာကျင်စေတာကြောင့် ပြေးတဲ့အချိန်မှာ အခက်အခဲဖြစ်နိုင်ပါတယ်။ အကောင်းဆုံးကတော့ ၃ မိနစ်မှ ၅ မိနစ်အထိ ညင်သာစွာ လမ်းလျှောက်တာ ၊ သွေးပူလေ့ကျင့်ခန်းလုပ်တာ မျိုးပြုလုပ်ပေးရင်ပဲ လုံလောက်ပါတယ်။
(၂) ဖြေးဖြေးနဲ့ မှန်မှန်သွားပါ
Photo : Business Insider
အပြေးလေ့ကျင့်ခန်းစလုပ်တဲ့အခါ အရင်ဆုံး သင့်ခန္ဓာကိုယ်ကို ကျင့်သားရစေဖို့ ဖြေးဖြေးနဲ့ ပုံမှန်လေးပဲ စတင်သင့်ပါတယ်။ စပြေးတဲ့ရက်ထဲက မိုင်တွေအများကြီးပြေးတာ ၊ လေ့ကျင့်ခန်း အလွန်အကျွံ လုပ်တာတွေဟာ သင့်ခန္ဓာကိုယ်ကို ပန်းသွားစေပြီး ခြေထောက်နာကျင်မှုဒဏ်ရာများ ၊ ဒူးဒဏ်ရာများ နဲ့ တခြားသော ကြွက်သားထိခိုက် ဒဏ်ရာတွေရနိုင်ခြေများပါတယ်။ ဒါကြောင့် အပြေးလေ့ကျင့်ခန်း စလုပ်ချိန် ၁ ပတ်ကနေ ၃ ပတ်လောက်အထိကို ဖြေးဖြေးနဲ့ မှန်မှန်လေးပါ လုပ်သွားဖို့ အကြံပြုချင်ပါတယ်။
(၃) ကိုယ်ဟန်အနေအထားမှန်ပါစေ
Photo : Runtastic
အပြေးလေ့ကျင့်ခန််းလုပ်တဲ့အခါ ကိုယ်ဟန်အနေအထားမှန်ကန်ဖို့ အရမ်းကိုအရေးကြီးပါတယ်။ မှားယွင်းတဲ့ ကိုယ်ဟန်အနေအထားနဲ့ အပြေးလေ့ကျင့်ခန်းလုပ်မယ်ဆိုရင် နောက်ကျော၊ လည်ပင်းနဲ့ တင်ပါးဆုံကြွက်သားများ ထိခိုက်နာကျင်စေနိုင်ပါတယ်။ အကောင်းဆုံးကတော့ သင့်ရဲ့ ခန္ဓာကိုယ်အပေါ်ပိုင်းကိုဖြေလျော့ထားပြီး ခါးကို မတ်မတ်အနေအထားနဲ့ ခြေလှမ်း ခပ်စိပ်စိပ်ပြေးရမှာ ဖြစ်ပါတယ်။ ကိုယ်ဟန်အနေအထားမှန်ကန်ခြင်းက အပြေးလေ့ကျင့်ရာမှာ ပိုမြန်တဲ့ အရှိန်အဟုန်ကိုရစေပြီး ထိခိုက်ဒဏ်ရာရမှုကို နည်းစေမှာပါ။
(၄) ပုံမှန်အရှိန်နဲ့ပဲ ပြေးပါ
Photo : Men’s Health
အပြေးလေ့ကျင့်ခန်းလုပ်တယ်ဆိုတာ တာတိုအပြေးပြိုင်ပွဲ ဝင်ရောက်ယှဉ်ပြိုင်နေတာ မဟုတ်ဘူးဆိုတာကို နားလည်းထားဖို့လိုပါတယ်။ ဒါကြောင့် အလွန်မြန်တဲ့ ပြေးနှုန်းနဲ့ အရှိန်တင်ပြီး ပြေးဖို့မလိုအပ်ပါဘူး။ အပြေးလေ့ကျင့်ခန်းစလုပ်သူတွေအတွက်တော့ ပုံမှန်အရှိန်လေးနဲ့ ကိုယ့်ရဲ့ပြေးနှုန်းကို တိုးတက်မှုရှိလာအောင် လေ့ကျင့်ပေးရမှာ ဖြစ်ပါတယ်။ အလွန်မြန်ဆန်တဲ့ အရှိန်နဲ့ အပြေးလေ့ကျင့်ခန်း လုပ်တာဟာ ကြွက်သား ထိခိုက်နာကျင်မှုများ ၊ ပြင်ပ ထိခိုက်ဒဏ်ရာများ ရနိုင်ခြေအများဆုံးဖြစ်ပါတယ်။
Featured Photo : Insider
