တစ်ကိုယ်လုံးက ကြွက်သားတွေကို ထိအောင်ကစားတဲ့ အားကစားတွေထဲမှာ အလွယ်ဆုံးက Pushup လို့ ခေါ်တဲ့ ဒိုက်ထိုးတာပါပဲ။ ဒိုက်ထိုးတာရဲ့ အားသာချက်က ဘာအားကစားပစ္စည်းမှ မလိုသလို တစ်လံသာသာလောက် ပြင်ညီနေရာတစ်ခုရှိရင်ကို လုပ်လို့ရတာပဲ ဖြစ်ပါတယ်။ သမိုင်းအထောက်အထားတွေအရ လေးရာစုနှစ်လောက်က ကွန်စတန်တိုင်းအင်ပါယာရှင်ဟာ သူ့ရဲ့တစ်နေ့တာ လုပ်လေ့ရှိတဲ့ အစီအစဉ်တွေထဲမှာ ဒိုက်ထိုးတာလည်း ပါတယ်လို့ ဆိုပါတယ်။

ဒီဘက်ခေတ်မှာ Pushup နည်းစနစ်ဟာ ကိုယ်လက်ကြံ့ခိုင်ရေးအစီအစဉ်တွေထဲမှာ မပါမဖြစ် ထည့်သွင်းလာရတဲ့ အားကစားတစ်ခုအဖြစ် ပါဝင်လာပြီ ဖြစ်ပါတယ်။ ဒီတော့ ဒိုက်ထိုးတာဟာ နေ့တိုင်း လုပ်သင့်သလား။ နေ့တိုင်း ဒိုက်ထိုးမယ်ဆိုရင် ဘယ်လို ဖြစ်လာမလဲ။

(၁) စိတ်ဖိစီးမှု နည်းစေတယ်

Photo: Freepik

ဒိုက်ထိုးတယ်ဆိုတာ လက်မောင်းနဲ့ ရင်အုပ်ကြွက်သားတွေပဲ တောင့်တင်းသန်မာစေတာ မဟုတ်ပါဘူး။ စိတ်ဖိစီးနေတာကိုလည်း လျော့ပါးစေတယ်လို့ ဆိုပါတယ်။ ဒိုက်ထိုးလိုက်တဲ့အခါ တစ်ကိုယ်လုံးမှာရှိတဲ့ ကြွက်သားတွေအကုန်လုံးကို သုံးပြီး လှုပ်ရှားခိုင်းလိုက်တာကြောင့် ခန္ဓာကိုယ်က ကိုယ်တွင်းစနစ်တွေဆီ အောက်ဆီဂျင်ပေးပို့ဖို့ နှလုံးခုန်နှုန်းကို မြှင့်လိုက်ပါတယ်။

အောက်ဆီဂျင်နဲ့အတူ စိတ်ပျော်ရွှင်မှုကို လှုံ့ဆော်ပေးတဲ့ Endorphins တွေ ထွက်လာတာပါ။ တစ်ခုရှိတာက မျှတသင့်တင့်တဲ့ အရေအတွက်ကပဲ ကိုယ်တွင်းမှာ ရှိတဲ့ Adrenaline နဲ့ Cortisol တို့လို စိတ်ဖိစီးမှုဟော်မုန်း Levels တွေ လျှော့ချပေးနိုင်တာ ဖြစ်ပြီး အလွန်အကျွံအားကစားလုပ်ရင်တော့ ခန္ဓာကိုယ်ကနေ Stress Hormones တွေ ပိုပြီးထုတ်တတ်ပါတယ်။

(၂) အာရုံစိုက်မှု ပိုကောင်းလာစေတယ်

Photo: Freepik

ကိုယ်လက်ကြံ့ခိုင်ရေးဆိုင်ရာ ကျွမ်းကျင်သူတွေရဲ့အဆိုအရ Pushup လုပ်ခြင်းဟာ စိတ်ပိုင်းအာရုံစူးစိုက်မှုကို ပိုကောင်းမွန်စေတယ်လို့ ဆိုပါတယ်။ Endorphins တွေ ထွက်လာပြီး Stress Hormone ပမာဏနည်းသွားတာကြောင့် စိတ်အာရုံမှာ ဖိစီးနေတဲ့ အနှောင့်အယှက်တွေ နည်းသွားပြီး အာရုံစူးစိုက်မှုကို ပိုပြီး တိုးတက်လာစေတာ ဖြစ်ပါတယ်။

(၃) ဇီဝကမ္မဖြစ်စဉ်တွေ ပိုတိုးတက်စေတယ်

Photo: Freepik

နေ့တိုင်းဒိုက်ထိုးနေတာဟာ ကိုယ့်ကိုယ်ကိုယ် နုပျိုနေစေတဲ့ အကြောင်းရင်းတစ်ခု ဖြစ်နိုင်ပါတယ်။ အသက်ကြီးလာတဲ့အခါ လူ့ခန္ဓာကိုယ်ဟာ တဖြည်းဖြည်းနဲ့ ကြွက်သားတောင့်တင်းမှု အားနည်းနည်း လာတတ်ပါတယ်။ ဒါကို ဆေးပညာအခေါ်အဝေါ်အရ Sarcopenia လို့ခေါ်ပါတယ်။ ဆယ်နှစ်ကြာတစ်ခါလောက် လူ့ကိုယ်ခန္ဓာက ကြွက်သားပမာဏ ၃% ကနေ ၅% အကြား ဆုံးရှုံးလေ့ရှိပါတယ်။ တစ်ဘဝလုံးစာအတွက်ဆို ယောင်္ကျားတစ်ယောက်ရဲ့ ကိုယ်ခန္ဓာက Muscle Mass ၃၀% လောက် ဆုံးရှုံးတဲ့ သဘောဖြစ်ပါတယ်။

ကြွက်သားအားနည်းလာရင် ဇီဝကမ္မဖြစ်စဉ်တွေ ကမောက်ကမဖြစ်လာတတ်ပြီး Body Fat တက်လာတတ်ပါတယ်။ ပုံမှန် ဒိုက်ထိုးလေ့ကျင့်ခန်း လုပ်ခြင်းအားဖြင့် ကြွက်သားထုနဲ့ သန်မာမှုကို တိုးတက်ကောင်းမွန်အောင် အထောက်အကူပြုပေးပါတယ်။

(၄) ကျောရိုးမကြီး သန်မာစေတယ်

Photo: Freepik

နည်းစနစ်တကျ ဒိုက်ထိုးခြင်းအားဖြင့် ပခုံး ၊ လက်မောင်း ၊ ရင်အုပ်နဲ့ လက်ပြင်ဘက်က ကြွက်သားနဲ့ အရိုးတွေကို ကောင်းကောင်းမွန်မွန် အလုပ်လုပ်စေပါတယ်။ လက်ပြင်ကုန်းတဲ့သူတွေ ၊ ခါး/နောက်ကျောနာတတ်သူတွေ နဲ့ အထိုင်များတဲ့သူတွေအနေနဲ့ ဒိုက်ထိုးတာကို ပုံမှန်လေ့ကျင့်ခန်းအဖြစ် နေ့တိုင်း လုပ်ပေးသင့်ပါတယ်။

ပုံမှန် Pushup လုပ်ပေးသွားခြင်းအားဖြင့် Body Posture မှန်သွားပြီး ပုခုံးဆစ်တွေ တောင့်တောင့်တင်းတင်း ဖြောင့်ဖြောင့်မတ်မတ်နဲ့ ကြည့်လို့ကောင်းစေမှာပါ။ ဒိုက်ထိုးတာဟာ သွယ်ဝိုက်တဲ့နည်းနဲ့လည်း ကိုယ့်ကိုယ်ကိုယ် ယုံကြည်မှုတက်လာအောင် လေ့ကျင့်နေတာပဲ ဖြစ်ပါတယ်။

(၅) ချော်လဲတာတွေ အဖြစ်နည်းစေတယ်

Photo: Freepik

သက်ကြီးပိုင်း ရောက်လာချိန်မှာ မကြာခဏချော်လဲတတ်ပါတယ်။ အရိုးအဆစ်တွေ အားနည်းလာတာကြောင့်ရော ကြွက်သားသန်မာမှု ကျလာတာကြောင့်ရော ဖြစ်တတ်ပြီး လဲကျတာနဲ့ တချို့ဆို အိပ်ရာက မထနိုင်လောက်အောင်အထိ အခြေအနေဆိုးသွားတတ်ပါတယ်။ ဒိုက်ထိုးခြင်းဟာ ကိုယ်အပေါ်ပိုင်းပဲ တောင့်တင်းသန်မာစေတာမျိုး မဟုတ်ဘဲ ကြွက်သားတွေရဲ့ မှတ်သားမှုကို ပိုကောင်းစေလို့ လဲကျချိန်မှာ ကိုယ့်ကိုယ်ကိုယ် ကာကွယ်ဖို့ အမြန်တုံ့ပြန်နိုင်စွမ်း ရှိစေပါတယ်။

သတိထားရမှာက Pushup လုပ်ချိန်မှာ နည်းစနစ်မမှန်ရင် လက်ကောက်ဝတ်တွေနာတတ်ပါတယ်။ ဒိုက်ထိုးမယ့် ကိုယ်နေဟန်ထားဟာ ဟန်ချက်မျှပြီး နည်းမှန်လမ်းမှန် ဒိုက်ထိုးတာမျိုး ဖြစ်ဖို့ လိုပါတယ်။ မဟုတ်ရင် ကြွက်သားပုံစံ ဟန်ချက်မမှန်တာ နဲ့ ထိခိုက်နာကျင်တာတွေ ဖြစ်တတ်ပါတယ်။ ဒါကြောင့် နည်းစနစ်မှန်ဖို့ ဂရုပြုပါ။ အလွန်အကျွံ Pushup လုပ်တာမျိုး ရှောင်ပါ။

Pushup နေ့တိုင်း လုပ်တာဟာ အပြောင်းအလဲမရှိရင် ပျင်းလာတတ်ပါတယ်။ ဒိုက်ထိုးတဲ့ပုံစံကို တစ်မျိုးတည်း သမရိုးကျမဟုတ်ဘဲ ပခုံးခွင်ထက် ကျယ်/ကျဉ်းတဲ့ Wide Pushup ၊ Narrow Pushups နဲ့ အရှေ့အနောက် Forward Pushup ၊ Backward Pushup ပုံစံတွေ ပြောင်းပြီးလည်း ထိုးပေးသင့်ပါတယ်။