ဘယ်အားကစားမဆို ကျန်းမာရေး အကျိုးများတာ ငြင်းစရာမရှိပါဘူး။ ဒါပေမယ့်လည်း ထိခိုက်မှု နည်းပြီး ကိုယ်ရော စိတ်ပါ ကျန်းမာရွှင်လန်းရေးအတွက် အထောက်အပံ့ မြင့်တဲ့ အားကစားတွေ လိုက်စားတာကတော့ ပိုပြီး အကျိုးရှိမယ်လို့ ဆိုချင်ပါတယ်။ ဒါကြောင့်ပဲ အားကစားနဲ့ ကိုယ်လက်ကြံ့ခိုင်မှုနဲ့ ပတ်သက်ပြီး ကျန်းမာရေးနဲ့ အညီညွတ်ဆုံး အားကစား တချို့အကြောင်းကို ဒီတစ်ခေါက် တင်ပြလိုက်ရပါတယ်။
(၁) ရေကူးခြင်း
Photo : Spine-Health
ရေကူးတာက နှလုံးကျန်းမာရေးအတွက် အံ့အားသင့်ဖွယ် အကျိုးများလှပါတယ်။ စိတ်ဖိစီးမှုလည်း နည်းပါးပြီး Body Weight လည်း ထိန်းပေးနိုင်ပါတယ်။ အဆုတ်အားကောင်းပြီး ကြွက်သား ကြံ့ခိုင်တောင့်တင်းစေသလို ကယ်လိုရီလောင်ကျွမ်းမှုလည်း မြင့်မားပါတယ်။
(၂) တင်းနစ်
Photo : sportingnews
တစ်နာရီကြာ တင်းနစ်ကစားတာဟာ ကယ်လိုရီ ၆၀၀ လောင်ကျွမ်းနိုင်ပါတယ်။ ဒါက အကောင်းဆုံးအေရိုးဗစ်လေ့ကျင့်ခန်းတွေအဖြစ် ပြောကြတဲ့ ရွရွပြေးခြင်း ၊ စက်ဘီးစီးခြင်းတွေထက်တောင် သာလွန်နေတာ ဖြစ်ပါတယ်။ ကိုယ်ရည်စစ်သလို ကိုယ်လက်ကြံ့ခိုင်သန်မာမှုလည်း မြင့်မားစေပါတယ်။
(၃) လှေလှော်ခြင်း
Photo : nbcolympics
ရေကူးလှေလှော်ဆိုတဲ့ အားကစားတွေက Weight ကျမှု မြင့်သလို ထိခိုက်ဒဏ်ရာရမှု လျော့နည်းပြီး ကြွက်သားသန်စွမ်းမှု မြင့်မားပါတယ်။ ချောင်းတွေ မြစ်တွေထဲ လှေလှော်တာမျိုး မလုပ်နိုင်ရင်လည်း Rowing Machine တွေနဲ့ ကစားနိုင်ပါတယ်။
(၄) Squash ရိုက်ခြင်း
Photo : ntu
တင်းနစ်ရိုက်သလိုမျိုး Racket နဲ့ Squash Ball ၊ Squash ကွင်း Court ထဲမှာ ပြိုင်ဘက်နဲ့အတူ ဆားဗစ်လိုင်းအတွင်း ဝင်အောင် ရိုက်ရတာပါ။ ဒီကစားနည်းက တောက်လျှောက် မနားတမ်း ရိုက်နေရတာမျိုး ဖြစ်ပြီး မျက်စိနဲ့ လက် အသားတကျ ချိတ်ဆက်လုပ်ဆောင်ရတာ ဖြစ်သလို ကိုယ်ခန္ဓာအလွယ်တကူ လှည့်ပြောင်းနိုင်မှု ၊ ကြံ့ခိုင်မှုနဲ့ သက်လုံလိုတဲ့ အားကစား လည်း ဖြစ်ပါတယ်။
(၅) စက်ဘီးစီးခြင်း
Photo : wam
မိုးရာသီကလွဲရင် စက်ဘီးစီးဖို့အတွက် အချိန်အခါကောင်းတွေချည်းပါပဲ။ ပုံမှန်အားဖြင့် စက်ဘီးစီးဖို့ စက်ဘီးကောင်းကောင်း တစ်စီးပဲ လိုပါတယ်။ ဒီအားကစားက ပြိုင်ဘက်မလိုတဲ့ အားကစား လည်း ဖြစ်ပြီး အဆုတ်အားကောင်းစေခြင်း ၊ ကိုယ်ရည်စစ်ပြီး သက်လုံကောင်းမွန်စေခြင်း အကျိုးတွေ အပြင် ကယ်လိုရီ လောင်ကျွမ်းမှု မြင့်မားသလို ဦးနှောက်စွမ်းဆောင်ရည်ပါ ထက်မြက်စေတယ်လို့ သုတေသနတွေက ထောက်ခံထားကြပါတယ်။
Featured Photo : wam
