အသက်မရွယ်မရွေး ကျန်းမာရေးအတွက် အလယ်အလတ်ရှိသော ကိုယ်လက်လှုပ်ရှားမှု တစ်ပတ်လျှင် မိနစ် ၁၅၀ မှ ၃၀၀ အတွင်း ပြုလုပ်သင့်တယ်လို့ ဆိုပါတယ်။ နှလုံးသွေးကြောဆိုင်ရာ လေ့ကျင့်ခန်းများဖြစ်တဲ့ Cardio လေ့ကျင့်ခန်းများ ကိုလုပ်ဖို့ Gym ကို မဖြစ်မနေသွားစရာမလိုသလို၊ စက်ပစ္စည်းအများကြီး မလိုအပ်ပါဘူး။ ကွီးတို့ထဲမှာ အခုမှစပြီးလေ့ကျင့်ခန်း လုပ်ဖို့စဉ်းစားထားပြီး ဘယ်ကစလုပ်ရမှန်းမသိတာမျိုး ဖြစ်နေပါသလား။ ဒါဆိုရင်တော့ မပူပါနဲ့။ အခုမှ လေ့ကျင့်ခန်း စလုပ်မဲ့ ကွီးတို့အတွက် လွယ်ကူတဲ့ အပြင် ခန္ဓာကိုယ်အတွက် ထိရောက်တဲ့ Cardio လေ့ကျင့်ခန်းများ ကိုဖော်ပြပေးပါမယ်။
လေ့ကျင့်ခန်း (၁) Jogging in Place
Photo : Men’s Health
ကွီးတို့အတွက် အခုပထမဆုံးဖော်ပြချင်တဲ့ လွယ်ကူတဲ့ Cardio လေ့ကျင့်ခန်းတစ်ခုကတော့ Jogging in Place ပဲဖြစ်ပါတယ်။ ဒီလေ့ကျင့်ခန်းကို လုပ်မယ်ဆိုရင် ကွီးတို့အနေနဲ့ တစ်နေရာတည်းမှာပဲ ခပ်ရွရွနဲ့ လျင်လျင်မြန်မြန် ပြေးရုံပါပဲ။ ဒီလေ့ကျင့်ခန်းက လွယ်ကူတဲ့အပြင် နှလုံးခုန်နှုန်းကို မြှင့်တင်ပေးနိုင်တဲ့ ရိုးရှင်းပြီး ထိရောက်သော လေ့ကျင့်ခန်းတစ်ခု ဖြစ်ပါတယ်။ အခုမှ လေ့ကျင့်ခန်းစလုပ်သူများအတွက် သင့်တော်တဲ့ သွေးပူလှုပ်ရှားမှုတစ်ခုလည်း ဖြစ်ပါတယ်။
လေ့ကျင့်ခန်း (၂) Jumping Jacks
Photo : Men’s Health
ဒီလေ့ကျင့်ခန်းကလည်း ဘယ်နေရာမှာမဆိုလုပ်လို့ရတဲ့ ထိရောက်တဲ့ လေ့ကျင့်ခန်းတစ်ခုပါပဲ။ ဒီလေ့ကျင့်ခန်းကို လုပ်မယ်ဆိုရင် ခြေထောက်ကို တင်ပါးအကျယ်အတိုင်း မတ်မတ်ရပ်ပြီး လက်နှစ်ဖက်ကို ချထားပါ။ ထို့နောက် ခြေနှစ်ဖက်ကို ဆန့်ထုတ်ကာ လေထဲတွင် ဖြောင့်ဖြောင့် တန်းတန်း ခုန်ပြီး လက်နှစ်ဖက်ကလည်း မြှောက်လိုက်ပါ။ ထို့နောက် ခြေထောက်များနဲ့ လက်များကို ပြန်ချလိုက်ပါ။ ဤကဲ့သို့ ထပ်ခါထပ်ခါ ပြုလုပ်ပေးပါ။ ကွီးတို့အနေနဲ့ ကြံ့ခိုင်မှုအားပေါ်မှာမူတည်ပြီး မြန်မြန်ခုန်လို့ရသလို၊ ဖြေးဖြေးမှန်မှန်လည်း လုပ်နိုင်ပါတယ်။
လေ့ကျင့်ခန်း (၃) ကြိုးခုန်ခြင်း
Photo : Men’s Journal
ဘယ်သူမဆို လုပ်နိုင်ပြီး အခုမှ လေ့ကျင့်ခန်း စလုပ်မဲ့ သူများအတွက်လည်း လွယ်ကူတဲ့ Cardio လေ့ကျင့်ခန်းတစ်ခုကတော့ ကြိုးခုန်ခြင်းပဲ ဖြစ်ပါတယ်။ ကြိုးခုန်ခြင်းက ကွီးတို့ရဲ့ ကယ်လိုရီတွေကို လောင်ကျွမ်းစေရုံသာမက အရိုးသိပ်သည်းကို ပိုမိုမြင့်မားစေပြီး ကွီးတို့ရဲ့ ခြေထောက်များကို ပိုမိုသန်မာလာစေပါတယ်။ ကွီးတို့အနေနဲ့ လေ့ကျင့်ခန်းစစလုပ်ခြင်းမှာ မိနစ်အနည်းငယ်နဲ့ စတင်နိုင်ပြီး နောက်ပိုင်းတွင် တဖြည်းဖြည်း အရှိန်မြှင့်သွားနိုင်ပါတယ်။
လေ့ကျင့်ခန်း (၄) Single Leg Stand
Photo : Men’s Health
နောက်ထပ် ကွီးတို့ကိုဖော်ပြချင်တဲ့ လေ့ကျင့်ခန်းတစ်ခုကတော့ Single Leg Stand ပဲဖြစ်ပါတယ်။ ဒီလေ့ကျင့်ခန်း ကွီးတို့ရဲ့ ဝမ်းဗိုက်ကြွက်သားတွေကို များစွာ အထောက်အကူပြုပါတယ်။ ဒီလေ့ကျင့်ခန်းကိုလုပ်မယ်ဆိုရင် ကွီးတို့ရဲ့ ခြေထောက်များကို ၃ လက်မ ထက်မပိုစေဘဲ ခွာရပ်ပါ။ ထို့နောက် လက်များကို ဆန့်တန်းပြီး ခြေထောက်တစ်ဖက်ကို မြှောက်နိုင်သလောက်မြှောက်ပါ။ ပြီးလျှင်ပြန်ချပါ။ ထိုကဲ့သို့ ခြေထောက်နှစ်ဖက်ကို တစ်လှည့်စီပြုလုပ်ပေးပါ။
အခုဖော်ပြပေးလိုက်တာကတော့ အခုမှ လေ့ကျင့်ခန်း စလုပ်မဲ့ ကွီးတို့အတွက် လွယ်ကူတဲ့ Cardio လေ့ကျင့်ခန်းများပဲ ဖြစ်ပါတယ်။ ဒီလေ့ကျင့်ခန်းများသာမက ကွီးတို့ အဆင်ပြေရာလေ့ကျင့်ခန်းများကို တစ်နေ့လျှင် အနည်းဆုံး နာရီဝက်ခန့် ပြုလုပ်ပေးခြင်းဖြင့် ကျန်းမာရေးဆိုင်ရာ အကျိုးကျေးဇူးများစွာ ရရှိမှာဖြစ်ပါတယ်။
Source : Medical News Today
Featured Photo : Men’s Health
