သွေးတိုးသမားတွေအနေနဲ့ သွေးပေါင်ချိန် လျှော့ချဖို့ ဆရာဝန်ညွှန်ကြားချက်အတိုင်း ဆေးဝါးတွေကို စနစ်တကျ မှီဝဲသင့်သလို နေ့စဉ် ကျန်းမာရေးနဲ့ ညီညွှတ်တဲ့ နေထိုင်မှုပုံစံရှိဖို့ကလည်း အဓိကကျတဲ့ အခန်းကဏ္ဍကနေ ပါဝင်နေပါတယ်။ ကျန်းမာရေးနဲ့အညီ စားသောက်နေထိုင်တာဟာ သွေးပေါင်ချိန်ကို လျော့ကျစေရုံတင်မကပဲ သွေးတိုးရောဂါနဲ့ ဆက်စပ်နေတဲ့ နှလုံး ၊ ဆီးချို စတဲ့ ရောဂါပြဿနာတွေကိုပါ ကာကွယ်ပြီးသား ဖြစ်စေမှာ ဖြစ်ပါတယ်။ ဒီတစ်ခေါက်မှာတော့ သွေးပေါင်ချိန် လျှော့ချဖို့အတွက် ကျန်းမာရေးနဲ့အညီ နေနည်းထိုင်နည်း လေးတွေကို မျှဝေပေးချင်ပါတယ်။

(၁) စိတ်ဖိစီးမှု နည်းအောင်နေပါ

Photo : Man of Many

စိတ်ဖိစီးမှုနဲ့ သွေးပေါင်ချိန်ဟာ တိုက်ရိုက်သက်ဆိုင်ပါတယ်။ လူတစ်ယောက်ဟာ စိတ်ဖိစီးမှုများနေချိန်မှာ ခန္ဓာကိုယ်က သွေးပေါင်ချိန်မြင့်တက်စေတဲ့ ဟော်မုန်းတွေကို ထုတ်ပေးပါတယ်။ ရလဒ်အနေနဲ့ကတော့ စိတ်ဖိစီးလေ သွေပေါင်ချိန်မြင့်တက်လေ ဖြစ်ပါတယ်။ ဒါ့ကြောင့် သဘာဝနည်းအတိုင်း သွေးပေါင်ချိန်ကို ထိန်းညှိချင်တယ်ဆိုရင်တော့ နေ့စဉ်ဘဝထဲမှာ တက်နိုင်သလောက် စိတ်ဖိစီးမှုနည်းအောင် ပြုမူနေထိုင်သင့်ပါတယ်။ လေ့လာမှုတွေအရ ယောဂကစားခြင်း သို့မဟုတ် တရားထိုင်ခြင်းဟာ စိတ်ဖိစီးမှုသက်သာစေပြီး သွေးပေါင်ချိန်ကို လျှော့ချပေးနိုင်တဲ့ အကောင်းဆုံးနည်းလမ်း ဖြစ်ပါတယ်။

(၂) ဘာတွေစားဖြစ်လဲ ပြန်ကြည့်ပါ

Photo : Men’s Health

တစ်နေ့တာမှာ သင် ဘယ်လိုအစားအသောက်တွေ စားဖြစ်နေလဲဆိုတာကို ပြန်လည်ဆန်းစစ်ဖို့ လိုပါမယ်။ သွေးတိုးသမားတစ်ယောက်အတွက် အစားအသောက်ဟာ အရမ်းကို အရေးကြီးပြီး သွေးပေါင်ချိန်ကို ထိန်းညှိပေးနိုင်တဲ့ အစားအသောက် Plan တစ်ခု သေချာရှိထားဖို့ လိုပါတယ်။ အဓိကအားဖြင့် ပြည့်ဝဆီနဲ့ ကိုလက်စထရောများတဲ့ အစားအစာတွေကို ရှောင်ကြဉ်ပြီး အစေ့အဆန်တွေ ၊ ကြက်သား ၊ ငါးနဲ့ အဆီနည်းတဲ့ နို့ထွက်ပစ္စည်းတွေလို ပရိုတင်းနဲ့ အမျှင်ဓာတ်ကြွယ်ဝတဲ့ အစားအစာတွေကို စားသုံးပေးပါ။ အချိုနဲ့ အငံဓာတ်များတဲ့ သရေစာနဲ့ မုန့်တွေကို လျှော့စားပြီး အစားစားတိုင်းမှာ ဟင်းသီးဟင်းရွက် သို့မဟုတ် အသီးအနှံတစ်ခုခု ပါအောင်ထည့်စားသင့်ပါတယ်။

(၃) ပုံမှန်သွေးပေါင်ချိန် တိုင်းတာပါ

Photo : Scope Blog – Stanford University

သွေးပေါင်အတက်အကျကို သေချာစွာသိနိုင်ဖို့ နေ့တိုင်းပုံမှန် သွေးပေါင်ချိန် တိုင်းတာပေးဖို့လည်း လိုအပ်ပါတယ်။ အကောင်းဆုံးကတော့ အိမ်မှာ သွေးပေါင်ချိန်စက်တစ်လုံး ဆောင်ထားတာပါပဲ။ တစ်နေ့တာအတွင်းမှာ သွေးပေါင်ချိန်ဘယ်လောက် ပြောင်းလဲသွားတယ်ဆိုတာကို သွေးပေါင်ချိန်ကြည့်ခြင်းနည်းဖြင့်ပဲ မှန်ကန်တိကျစွာသိနိုင်မှာ ဖြစ်ပါတယ်။ ဒီလိုသွေးပေါင်ချိန်ကို အမြဲပုံမှန်တိုင်းတာပေးတာဟာ ရောဂါအခြေအနေကို ခန့်မှန်းနိုင်မှာဖြစ်သလို ဆရာဝန်နဲ့ တိုင်ပင်ပြီး လိုအပ်တဲ့ ဆေးဝါးမှီဝဲကုသမှုတွေကိုလည်း ထိထိရောက်ရောက် ခံယူနိုင်မှာ ဖြစ်ပါတယ်။

(၄) ဆေးလိပ်သောက်ရင် ဖြတ်လိုက်ပါ

Photo : Kettering Health

နီကိုတင်းဓာတ်ဟာ သွေးကြောတွေကို ကျဉ်းစေပြီး နှလုံးခုန်နှုန်းကို မြန်စေကာ သွေးဖိအားကို တိုးစေပါတယ်။ ဒါကြောင့် သွေးတိုးရောဂါရှိတယ်ဆိုရင် ဆေးလိပ်လုံးဝ မသောက်သင့်ပါဘူး။ အံ့ဩစရာကောင်းတာက ဆေးလိပ်ဖြတ်လိုက်တာနဲ့အမျှ သွေးပေါင်ချိန်ဟာ ပုံမှန်အနေအထားကို ပြန်လည်ရောက်ရှိသွားမှာပဲ ဖြစ်ပါတယ်။ အလားတူ အရက်အလွန်အကျွံ သောက်တာကလည်း သွေးပေါင်ချိန်တက်စေတဲ့အပြင် နှလုံး ၊ အသည်းနဲ့ ဦးနှောက်မှာ ဆိုးရွားတဲ့ ကျန်းမာရေး ပြဿနာတွေ ဖြစ်ပေါ်လာစေနိုင်ပါတယ်။ အရက်သောက်တက်သူဆိုရင် တက်နိုင်သမျှ လျော့သောက်ပါ။ ဘီယာတစ်ခွက် ၊ ဝိုင်တစ်ခွက် သို့မဟုတ် ဝီစကီ တစ်ခွက်လောက်ပဲ မှီဝဲတာက ကျန်းမာရေးအတွက်လည်း ဆိုးဆိုးရွားရွားထိခိုက်မှု ရှိစေမှာ မဟုတ်ပါဘူး။

(၅) လှုပ်လှုပ်ရှားရှားနေပါ

Photo : USPS News Link

လေ့ကျင့်ခန်းလုပ်ခြင်းဟာ သွေးပေါင်ချိန် ကို လျှော့ချဖို့အတွက် အကောင်းဆုံးနည်းလမ်းတွေထဲက တစ်ခုဖြစ်ပါတယ်။ သွေးတိုးရောဂါရှိတဲ့ လူတစ်ယောက်ဟာ တစ်နေ့တာမှာ အနည်းဆုံး မိနစ် ၃၀ ခန့် လှုပ်လှုပ်ရှားရှား နေဖို့လိုအပ်ပါတယ်။ Gym သွားနိုင်မှ မဟုတ်ပါဘူး လမ်းလျှောက်တာ ၊ ပန်းပင်ရေလောင်းတာ ၊ အိမ်မွေးခွေးနဲ့အတူ လမ်းလျှောက်တာ ၊ အိမ်သန့်ရှင်းရေး ပြုလုပ်တာ စတဲ့ နည်းလမ်းတွေနဲ့လည်း ခန္ဓာကိုယ်ကို လှုပ်ရှားမှုဖြစ်အောင် ပြုလုပ်ပေးနိုင်ပါတယ်။

(၆) ကျန်းမာတဲ့ ကိုယ်အလေးချိန်ကို ထိန်းထားပါ

Photo : Daily Express

ကိုယ်အလေးချိန် တက်လာတာနဲ့အမျှ သွေးပေါင်လည်း တက်ပါတယ်။ လူတစ်ယောက်ဟာ အသက်အရွယ် ၊ အရပ်အမောင်းနဲ့ အညီ ရှိသင့်ရှိထိုက်တဲ့ ကိုယ်အလေးချိန်ထက် ပိုများနေမယ်ဆိုရင် ရောဂါတွေအများကြီး ဝင်လာနိုင်ခြေများပါတယ်။ ဒါကြောင့် ကိုယ်အလေးချိန်များနေတယ်ဆိုရင် ဝိတ်ချဖို့ ကြိုးစားပါ။ ကိုယ်အလေးချိန်ကျစေဖို့ တစ်နေ့တာအတွင်း ပုံမှန်စားနေကျ ကယ်လိုရီပမာဏထက် လျှော့စားတာ ကိုယ်လက်လှုပ်ရှားလေ့ကျင့်ခန်း လုပ်တာတွေ ပြုလုပ်သင့်ပါတယ်။ ဖြည်းဖြည်းချင်း ကိုယ်အလေးချိန်လျော့သွားတဲ့နည်းက ပိုကောင်းပါတယ်။ တစ်ပတ်ကို ၂ ပေါင်ထက် မပိုပဲ ကိုယ်အလေးချိန် လျှော့ချတဲ့နည်းလမ်းဟာ ကျန်းမာရေးနဲ့ အညီညွှတ်ဆုံး ဖြစ်ပါတယ်။

(၇) အိပ်ရေးဝဝအိပ်ပါ

Photo : King’s College London

အရွယ်ရောက်ပြီးသား လူတိုင်းအတွက် တစ်ညမှာ အနည်းဆုံး အိပ်ချိန် ၇ နာရီကနေ ၈ နာရီခန့် လိုအပ်ပါတယ်။ အိပ်ချိန်ဟာ အဲဒီထက်နည်းနေမယ်ဆိုရင် သွေးပေါင်ချိန် ထိန်းညှိရခက်တာမျိုး ဖြစ်နိုင်ပါတယ်။ အကြောင်းကတော့ အိပ်စက်ခြင်းက စိတ်ဖိစီးမှုဟော်မုန်းတွေကို ထိန်းချုပ်ပေးပြီး အာရုံကြောစနစ်ကို ကောင်းစွာလည်ပတ်စေဖို့ အဓိကအရေးပါတဲ့ လုပ်ငန်းစဉ်တစ်ခု ဖြစ်တာကြောင့်ပါ။ အကယ်၍ ညဘက်မှာ ကောင်းကောင်းအိပ်မပျော်တဲ့ ပြဿနာရှိတာ သို့မဟုတ် ညဘက်နှစ်နှစ်ခြိုက်ခြိုက် အိပ်ပျော်ဖို့ခက်ခဲတာမျိုး ခံစားနေရတယ်ဆိုရင်တော့ ဆရာဝန်နဲ့ ဆွေးနွေးတိုင်ပင်ကြည့်ဖို့ အကြံပြုချင်ပါတယ်။

Featured Photo : UK NEWS TO DAY