အပြေးအားကစားသမား တွေအနေနဲ့အဓိက လိုအပ်တာဟာ ခန္ဓာကိုယ်သန်စွမ်းကြံ့ခိုင်မှုနဲ့ စိတ်ခွန်အားပါပဲ။ ပြေးတာဟာ လူတိုင်းလုပ်နိုင်တဲ့ အလွယ်ကူဆုံး ကိုယ်လက်လှုပ်ရှားအားကစားတစ်ခု ဆိုပေမယ့်လည်း ပြေးဖို့အတွက် သက်လုံစွမ်းရည် ကောင်းကောင်းရှိထားဖို့ အရေးကြီးပါတယ်။ ဒီဆောင်းပါးလေးမှာတော့ အပြေးအားကစားနည်းကို စိတ်ဝင်စားသူတွေရော ၊ အပြေးလေ့ကျင့်ခန်း ပြုလုပ်နေတဲ့ အားကစားသမား တွေအတွက်ပါ သက်လုံစွမ်းရည် မြှင့်တင်နိုင်ဖို့ လိုက်နာရမယ့် အချက်လေးတွေကို ပြောပြပေးချင်ပါတယ်။

(၁) သွေးပူလေ့ကျင့်ခန်းလုပ်ပါ

Photo : Canadian Running Magazine

အပြေးအားကစားသမားတွေအတွက် သွေးပူလေ့ကျင့်ခန်းဟာ မဖြစ်မနေ ပြုလုပ်ပေးဖို့ လိုအပ်ပါတယ်။ သွေးပူလေ့ကျင့်ခန်းလုပ်တာဟာ ခန္ဓာကိုယ်သွေးစီးဆင်းမှုကို မြှင့်တင်ပေးပြီး ကြွက်သားတွေ ဒဏ်ရာမရအောင် ကာကွယ်ပေးနိုင်ပါတယ်။ ဒါ့အပြင် ကြွက်သားတွေရဲ့ပျော့ပျောင်းမှုနဲ့ အရိုးအဆစ်တွေရဲ့လှုပ်ရှားမှုကို တိုးစေပြီး သက်လုံစွမ်းရည် ကောင်းကောင်းနဲ့ ပြေးနိုင်ဖို့ ကူညီပေးမှာ ဖြစ်ပါတယ်။ ဒါ့ကြောင့် အပြေးလေ့ကျင့်ခန်း မပြုလုပ်မီ ၁၀ မိနစ်ခန့်လောက်ကို သွေးပူလေ့ကျင့်ခန်း ပြုလုပ်ပေးဖို့ လိုပါတယ်။

(၂) ကိုယ်ဟန်အနေအထား မှန်ပါစေ

Photo : Runner’s World

ပြေးတဲ့အချိန်မှာ ကိုယ်ဟန်အနေအထား မှန်အောင် ထိန်းသိမ်းခြင်းက ပြေးအားကို ပိုကောင်းစေပြီး အချိန်ကြာကြာ ပြေးနိုင်ဖို့ ကူညီပေးပါတယ်။ ကိုယ်ဟန်အနေအထား မမှန်ရင် ဒဏ်ရာရနိုင်ခြေပိုများပြီး ပခုံး ၊ နောက်ကျောနဲ့ လည်ပင်းနာကျင်မှု ပြဿနာတွေ ဖြစ်လာနိုင်ပါတယ်။

(၃) အသက်ရှုစနစ်ကို ပြန်စစ်ပါ

Photo : AARP

သက်လုံစွမ်းရည် ကောင်းကောင်းနဲ့ ပြေးနိုင်ဖို့ဆိုရင် အသက်ရှုနည်းစနစ်ကို အာရုံစိုက်ဖို့ လိုပါမယ်။ အောက်ဆီဂျင်ကို များများရှူသွင်းပြီး ကာဗွန်ဒိုင်အောက်ဆိုဒ်ကို များများရှူထုတ်တာက ကြွက်သားတွေရဲ့ လှုပ်ရှားမှုအတွက် အရမ်းကို အရေးကြီးပါတယ်။ ပြေးနေစဉ်အတွင်းမှာ ခြေလှမ်းအရေအတွက်ကို တွက်ချက်ပြီး အသက်ကို ရှုသွင်းရှုထုတ် ပြုလုပ်ပေးဖို့လိုပါတယ်။ အသက်ရှုနည်းစနစ်ကို အာရုံစိုက်တာဟာ အချိန်ကြာကြာ ပိုပြေးနိုင်ဖို့အတွက် ထိရောက်တဲ့ နည်းလမ်းတစ်ခုပဲဖြစ်ပါတယ်။

(၄) ဖြည်းဖြည်းနဲ့ မှန်မှန်သွားပါ

Photo : Adidas

အပြေးအားကစားကိုလုပ်မယ်ဆိုရင် စိတ်ရှည်ရှည်နဲ့ ပုံမှန်လေး လေ့ကျင့်သွားဖို့အရေးကြီးပါတယ်။ ပြေးနှုန်းနဲ့ လမ်းကြောင်းအကွာအဝေးကို တိုးမြှင့်ဖို့အတွက် အချိန်ယူရပါတယ်။ အကောင်းဆုံးကတော့ ၁၀ ရာခိုင်နှုန်းစီသာ ဖြည်းဖြည်းချင်း တိုးမြှင့်သွားဖို့ အာရုံစိုက်ပါ။ ဥပမာအားဖြင့် ကွီးတို့က တစ်နေ့ကို တစ်မိုင်နှုန်းပြေးတယ်ဆိုရင် နောက်တစ်ပတ်မှာ တစ်မိုင်ရဲ့ ၁၀ ရာခိုင်နှုန်း ပိုပြေးနိုင်အောင် ကြိုးစားပါ။ အားကစားလုပ်တယ်ဆိုတာဟာ ဖြည်းဖြည်းနဲ့ မှန်မှန်လေးပဲ သွားတာအကောင်းဆုံး ဖြစ်ပါတယ်။

(၅) Interval လေ့ကျင့်ခန်းတွေ လုပ်ပါ

Photo : GearJunkie

အပြေးအားကစားသမား တွေအနေနဲ့ Interval Workout တွေကစားတာဟာ သက်လုံစွမ်းရည် မြှင့်တင်ဖို့အတွက် အထိရောက်ဆုံး နည်းလမ်းတစ်ခုဖြစ်ပါတယ်။ Interval အပြေးလေ့ကျင့်ခန်းဆိုတာဟာ ၁ မိနစ် အမြန်ပြေးပြီး ၂ မိနစ် လမ်းလျှောက် ဒါမှမဟုတ် ၂ မိနစ် အမြန်ပြေးပြီး ၂ မိနစ် လမ်းလျှောက်ရတဲ့ လေ့ကျင့်ခန်း ပုံစံဖြစ်ပါတယ်။ မြန်မြန်ပြေးခြင်းနဲ့ နှေးနှေးပြေးခြင်းတို့ကို မိနစ်ခြား လုပ်ဆောင်တာဟာ ကြွက်သားအုပ်စုတွေကို ပိုမိုမြန်ဆန်စွာ လှုပ်ရှားနိုင်စေဖို့ အထောက်အကူဖြစ်စေပြီး သက်လုံစွမ်းရည်နဲ့ ကြံ့ခိုင်မှုကို တိုးမြှင့်စေပါတယ်။

အထက်ပါအချက်တွေအပြင် အာဟာရပြည့်ဝအောင်စားသုံးတာ ၊ ရေဓာတ်ပြည့်ဝအောင်ဖြည့်တင်းတာ ၊ တစ်ရက်ကို ၇ နာရီခန့် ပြည့်ပြည့်ဝဝ အိပ်စက်အနားယူတာ ၊ အပြေးလေ့ကျင့်ခန်းလုပ်နေစဉ် သီချင်းနားထောင်တာ ၊ ကောင်းမွန်တဲ့ Running Shoes တစ်ရံအသုံးပြုတာ ၊ Strength Training တွေ ကစားတာ စတဲ့နည်းလမ်းလေးတွေကို လိုက်နာမယ်ဆိုရင်လည်း ကွီးတို့ရဲ့ သက်လုံစွမ်းရည် တိုးတက်လာစေမှာ ဖြစ်ပါတယ်။

Featured Photo : Freeletics