လေ့ကျင့်ခန်း မလုပ်ခင် ပြုလုပ်သင့်တဲ့ အကောင်းဆုံး သွေးပူလှုပ်ရှားမှု များ

Warm Up လို့ခေါ်တဲ့ သွေးပူလှုပ်ရှားမှု ဟာ အားကစားလုပ်သူတိုင်းအတွက် အရေးပါတဲ့ လုပ်ဆောင်မှုတစ်ခု ဖြစ်ပါတယ်။ လေ့ကျင့်ခန်း လုပ်တော့မယ် အရင်ဆုံး သွေးပူအောင် ကိုယ်လက်လှုပ်ရှားမှု တချို့ကို မဖြစ်မနေ လုပ်ဆောင်ပေးဖို့ လိုပါတယ်။ Warm Up လုပ်တာက ခန္ဓာကိုယ်အတွက် လိုအပ်တဲ့ အောက်ဆီဂျင်ပမဏကို လုံလုံလောက်လောက်ရစေသလို ခန္ဓာကိုယ်ရဲ့ ပြောင်းလွယ်ပြင်လွယ် Flexibility ကို တိုးစေပြီး ကြွက်သားစွမ်းဆောင်ရည်ကို မြှင့်တင်ပေးပါတယ်။ ဒါ့အပြင် နှလုံးခုန်နှုန်းကို ဖြည်းဖြည်းချင်း မြှင့်တင်ရာမှာ အထောက်အကူဖြစ်စေပြီး လေ့ ကျင့်ခန်းလုပ်နေစဉ်အတွင်းမှာလည်း မတော်တဆထိခိုက်ဒဏ်ရာ ရနိုင်ခြေကို လျော့ချပေးပါတယ်။ ဒီတစ်ခေါက်မှာတော့ လေ့ကျင့်ခန်း မလုပ်ခင်မှာ ပြုလုပ်သင့်တဲ့ အကောင်းဆုံး သွေးပူလှုပ်ရှားမှု တချို့ကို မျှဝေပေးချင်ပါတယ်။

လေ့ကျင့်ခန်းမလုပ်ခင် ဘယ်လောက်ကြာကြာ Warm Up ပြုလုပ်သင့်လဲ

Photo : What’s Up Doc

တကယ်တော့ Warm Up လုပ်တဲ့ ကြာချိန်ဟာ သင်ပြုလုပ်မယ့် လေ့ကျင့်ခန်း အစီအစဉ်ရဲ့ ကြာချိန်ပေါ် မူတည်ပါတယ်။ ယေဘုယျအားဖြင့် သင်ဟာ ၁ နာရီ ကြာမြင့်မယ့် လေ့ကျင့်ခန်း အစီအစဉ်ကို လုပ်ဆောင်မယ်ဆိုပါက သွေးပူလှုပ်ရှားမှု Warm Up ကို ၅ မိနစ်ကနေ ၈ မိနစ်ခန့် ပြုလုပ်ပေးဖို့ လိုပါတယ်။

လေ့ကျင့်ခန်းမလုပ်မီ အကောင်းဆုံး သွေးပူလှုပ်ရှားမှု များ

Photo : GQ

အပြေးအားကစားသမားများအတွက် ခပ်ရွရွပြေးခြင်းဟာ အကောင်းဆုံး Warm Up ပါပဲ။ Gym ဒါမှမဟုတ် တခြားသော Sports Activity တွေလုပ်ဆောင်မယ့် အားကစားသမားတွေအနေနဲ့ လမ်းလျှောက်စက် ၊ Indoor စက်ဘီးနင်းစက်တွေနဲ့ သွေးပူလှုပ်ရှားမှု လုပ်ဆောင်နိုင်ပါတယ်။ အားကစားနည်းအားလုံးအတွက် ယေဘုယျအနေနဲ့ ပြောမယ်ဆိုရင်တော့ အကြောလျော့တဲ့ Stretching လေ့ကျင့်ခန်းတွေ လုပ်တာက အကောင်းဆုံး Warm Up လှုပ်ရှားမှု ဖြစ်ပါတယ်။

Stretching လေ့ကျင့်ခန်းတွေထဲက လွယ်ကူးရိုးရှင်းပြီး ထိရောက်တဲ့ လေ့ကျင့်ခန်း ၅ ခု

Photo : Men’s Journal

(၁) Side Bends – ညာဘက်လက်ကို ဦးခေါင်းထက်မြှောက်ပြီး ခန္ဓာကိုယ်ရဲ့ ဘယ်ဘက်ကို စောင်းထားပါ။ ဒီအနေအထားအတိုင်း စက္ကန့်အနည်းငယ်လောက် ဖိထားပြီး နောက်တစ်ဖက် ပြောင်းလုပ်ပေးရပါမယ်။

(၂) Chest Stretch – လက်နှစ်ဖက်ကို ရှေ့သို့ဆန့်ထုတ်ပြီး လက်ချောင်းတွေကို ပြောင်းပြန်အနေအထားအတိုင်း ချိတ်ထားပေးရပါမယ်။

(၃) Knee Bends – ခြေထောက်ကို ပခုံးအကျယ်အတိုင်းချဲထားပြီး လက်နှစ်ဖက်ကို ရှေ့သို့ ဆန့်တန်းထားပါ။ ထို့နောက် ခန္ဓာကိုယ်ကို ဒူးနဲ့ အနီးကပ်ဆုံးဖြစ်အောင် ဖြည်းဖြည်းချင်းကွေးချပြီး စက္ကန့်အနည်းငယ် ဖိထားရပါမယ်။ ပြီးရင်တော့ မူလအတိုင်း မတ်တပ်ပြန်ရပ်လိုက်ပါ။

(၄) Shoulder Roll – မတ်တပ်ရပ်အနေအထားအတိုင်း လက်နှစ်ဖက်ကို ခန္ဓာကိုယ်ရဲ့ ဘေးတစ်ဖက် တစ်ချက်စီကို ဆန့်ထုတ်လိုက်ပါ။ ပြီးရင် ပခုံးကို ရှေ့နဲ့ နောက် ၉၀ ဒီဂရီခန့် ၅ ကြိမ်စီ လှည့်ပေးရပါမယ်။

(၅) Knee Lifts – ဒူးမြှောက် လေ့ကျင့်ခန်း ဖြစ်ပါတယ်။ မတ်တပ်ရပ်ပြီး ညာဘက်ဒူးကို ဘယ်ဘက်လက်နဲ့ ထိအောင်မြှောက်ပါ။ ပြီးတဲ့အခါ ဘယ်ဘက်ဒူးကို ညာဘက်လက်နဲ့ ထိအောင် ဘက်ပြောင်းပြီး တစ်လှည့်စီ မြှောက်ပေးရပါမယ်။

Featured Photo : Men’s Health