ရိုရိုးသားသားပြောရလျှင် ဒီကမ္ဘာပေါ်မှာ ယောကျာ်း၊ မိန်းမ မရွေး ငယ်ရွယ်နုပျိုမှု၊ သန်မာဖျတ်လတ်မှုကို နှစ်သက်ကြသူတွေ ချည်းပါပဲ။ အသက်အရွယ်ကြီးရင့်လာခြင်းက တားစီးလို့မရတဲ့ ဘဝရဲ့ သဘာဝဖြစ်စဉ်တစ်ခု ဖြစ်ပါတယ်။ ထို့အပြင် ထာဝရနုပျိုသန်မာစေတဲ့ မှော်ဆေးမျိုးလည်းလောကမှာ မရှိပါဘူး။ ဒါပေမဲ့ စိတ်ဓာတ်မကျပါနဲ့။ ငယ်ရွယ်စဉ်ကကဲ့သို့ သွက်လက်ဖျတ်လက်ကာ အိုမင်းရင့်ရော်မှုကို နှေးကွေးစေပြီး ပြောင်းပြန်လှန်နိုင်တဲ့ နည်းလမ်းရှိပါတယ်။ ဒါကတော့ ပုံမှန် လေ့ကျင့်ခန်း လုပ်ခြင်းနဲ့ သစ်သီးများ၊ ဟင်းသီးဟင်းရွက်များနဲ့ ပရိုတင်းပြည့်ဝသော အစားအစာများကို စားခြင်းဖြစ်ပါတယ်။ ထို့ကြောင့် အသက် ၅၀ နောက်ပိုင်း အိုမင်းရင့်ရော်မှုကို တွန်းလှန်ရန်နှင့် ကြွက်သားများ သန်မာပြီး သွက်လက်ကျန်းမာကာ ငယ်ရွယ်နုပျိုစေရန် ထိရောက်တဲ့ လေ့ကျင့်ခန်း များ ကိုဖော်ပြပေးချင်ပါတယ်။

အသက် ၅၀ နောက်ပိုင်း အိုမင်းရင့်ရော်မှုကို တွန်းလှန်ရန် အထိရောက်ဆုံးသော လေ့ကျင့်ခန်းများ ကတော့…………

လေ့ကျင့်ခန်း (၁)

Photo : Men’s Health

ဒီ လေ့ကျင့်ခန်း ကို လုပ်မယ်ဆိုရင် ကွီးတို့ရင်ဘတ်ရှေ့တွင် Dumbbell အလေးတုံးတစ်တုံး ကိုင်ထားခြင်းဖြင့် ဤလေ့ကျင့်ခန်းကို စတင်ပါ။ ကွီးတို့ရဲ့ခါးကို တည့်တည့်မတ်မတ် ထားပါ။ ထို့နောက် ကွီးတို့ရဲ့ တင်ပါးများကို နောက်သို့တွန်းထုတ်ပြီး Squat ထိုင်သကဲ့သို့ ပေါင်များကိုကွေးပါ။ တစ်ဖန် မတ်တပ်ပြန်ရပ်ရန် ခြေဖနောင့်များကို အားပြုပြီး တင်ပါးကိုပြန်လည် တည့်မတ်ပါ။ ထိုကဲ့သို့ ၁၀ ကြိမ်ခန့်ကို ၃ ခါမှ ၄ ခါပြုလုပ်ပါ။

လေ့ကျင့်ခန်း (၂)

Photo : Lifetime 60 Day Challenge

ဒီလေ့ကျင့်ခန်းကို လုပ်မယ်ဆိုရင် အရင်ဆုံး ကွီးတို့အနေနဲ့ Gym ခုံတန်းလျားပေါ်လှဲလျောင်းပြီး Dumbbell အလေးတုံး တစ်စုံကို ကိုင်ထားပါ။ လက်နှစ်ဖက်ကို အပြည့်အဝ ဆန့်ထုတ်ပြီး Dumbbell အလေးတုံးများကို ဖြောင့်ဖြောင့်တန်းတန်း ကိုင်ထားပါ။ ထို့နောက် အလေးတုံးများကို ကိုင်လျက်လက်ကို ရင်ဘတ်ဆီသို့ နှိမ့်ချလိုက်သည်နှင့် ရင်ဘတ်ကို ဆန့်ထုတ်ပါ။ ထို့နောက် အစအနေအထားသို့ ပြန်သွားပါ။ ထိုကဲ့သို့ ၁၀ ကြိမ်မှ ၁၂ ကြိမ် တစ်စုံ ၃ ခါမှ ၄ ခါပြုလုပ်ပါ။

လေ့ကျင့်ခန်း (၃)

Photo : Legion

ဒီလေ့ကျင့်ခန်းကို လုပ်မယ်ဆိုလျှင် ပထမဆုံးအနေဖြင့် Seated Row Machine ပေါ်တွင်နေရာယူပြီး ခြေထောက်များကို ခြေတင်ပေါ်သို့ သေချာနေရာ ချထားပါ။ ထို့နောက် လက်ကိုင်ကွင်းကို ဆွဲယူပြီး ခြေထောက်များကို ဖြောင့်ပါ။ ရင်ဘတ်ကို ဖြောင့်တန်းထားပါ။ ခါးကိုလည်းမတ်ထားပါ။ ထို့နောက် လက်ကိုင်ကွင်းကိုင်လျက် တံတောင်ဆစ်များကိုတင်ပါးနောက်သို့ ဆွဲပါ။ နောက်ကျောဘက်ကို ညှစ်ပါ။ ထို့နောက် လက်များကို ပြန်လည်ဆန့်တန်းပြီး စသည့်အနေအထားသို့ ပြန်သွားပါ။ ထိုကဲ့သို့ ၁၀ ကြိမ်မှ ၁၂ကြိမ်အထိ တစ်စုံ ၃ ခါမှ ၄ ခါ ပြုလုပ်ပါ။

အခုဖော်ပြပေးလိုက်တာကတော့ အသက် ၅၀ နောက်ပိုင်း အိုမင်းရင့်ရော်မှုကို တွန်းလှန်ရန် နှင့် ကြွက်သားများ သန်မာပြီး သွက်လက်ကျန်းမာကာ ငယ်ရွယ်နုပျိုစေရန် ထိရောက်တဲ့ လေ့ကျင့်ခန်းများပဲ ဖြစ်ပါတယ်။ ဒီလေ့ကျင့်ခန်းတွေကို အသက် ၅၀ နောက်ပိုင်းမှ မဟုတ်ပါဘူး၊ ကြွက်သားများ သန်မာစေရန် အတွက် အသက်အရွယ်မရွေး လုပ်လို့ရပါတယ်။ လေ့ကျင့်ခန်း လုပ်ခြင်းက ကျန်မာရေးကို အထောက်အကူပြုသည်သာမက အိုမင်းရင့်ရော်မှုကိုလည်း နှေးကွေးစေတဲ့အပြင် စိတ်ဖိစီးမှုကိုလည်း လျော့ကျစေတဲ့အတွက် အသက်အရွယ်မရွေးအချိန်ပေးပြီး လေ့ကျင့်ခန်းကို လုပ်သင့်ပါတယ်။

Source : Eat This, Not That

Featured Photo : Exercises