အမောခံနိုင်ပြီး ကျန်းမာနေဖို့ဆိုတာ လေ့ကျင့်ခန်း ပုံမှန်ပြုလုပ်ပေးဖို့ လိုအပ်ပါတယ်။ အမောလည်း ခံနိုင်ပြီး ဆက်စီကျတဲ့ ခန္ဓာကိုယ် ပိုင်ဆိုင်နိုင်ဖို့အတွက်ကျတော့ စည်းစနစ်ကျတဲ့ စားသောက်ပုံနှင့် Workout Plan တို့ လိုအပ်ပါတယ်။ ခန္ဓာကိုယ်က ဆက်စီကျဖို့ဆိုရင် ကြွက်သားများကို တောင့်တင်းသန်မာနေအာင် အရင်ဆုံး ဆော့ကစားပေးရမှာ ဖြစ်ပါတယ်။ ခန္ဓာကိုယ် အောက်ခြေကြွက်သားများ တောင့်တင်းပြီး အုတ်မြစ် တောင့်မှသာလျှင် ကွီးတို့လည်း သက်လုံ ကောင်းပြီး စွမ်းဆောင်ရည် မြင့်နေမှာဖြစ်ပါတယ်။

ဒါဆိုရင်တော့ အခုဖော်ပြပေးမယ့် လေ့ကျင့်ခန်းများကို မှန်မှန်ပြုလုပ်ပေးရမှာပဲ ဖြစ်ပါတယ်။

လေ့ကျင့်ခန်း (၁)

Source: Menshealth

ဒီလေ့ကျင့်ခန်းလေးရဲ့ နာမည်ကတော့ Dumbbell Lunge လေ့ကျင့်ခန်းပဲ ဖြစ်ပါတယ်။ လေ့ကျင့်ခန်း ပြုလုပ်ဖို့ရန်အတွက် အလေးတုံး နှစ်တုံး လိုအပ်ပြီး ပုံမှာ ပြထားတဲ့အတိုင်း ညာခြေကို ရှေ့ထုတ်ကာ ကွေးလိုက်၊ ဘယ်ခြေကို ရှေ့ထုတ်ကာ ကွေးလိုက်ဖြင့် တစ်လှည့်စီ ပြုလုပ်ပေးရပါမယ်။

စုစုပေါင်း ၁၅ ကြိမ်၊ ၃ ကျော့ ပြုလုပ်ပေးရပါမယ်။

လေ့ကျင့်ခန်း (၂)

Source: Menshealth

ဒူးနှစ်ဖက်ကို ပုခုံးအကျယ်ထက် ပိုကျယ်အောင် ချဲထားပြီးနောက် လက်နှစ်ဖက်က အလေးတုံးကို ကိုင်ထားပါ။ ထို့နောက် တင်ပါးနောက်ပစ်ကာ Squat ထိုင်ချလိုက်ရပါမယ်။ ထိုင်လိုက် ထလိုက်ဖြင့် တစ်လှည့်စီ ပြုလုပ်ကာ စုစုပေါင်း ၁၅ ကြိမ်၊ ၃ ကျော့ ပြုလုပ်ပေးရပါမယ်။

လေ့ကျင့်ခန်း (၃)

Source: Menshealth

ညာခြေကို ခုံပေါ်မှာ တင်ထားပြီးနောက် လက်နှစ်ဖက်က အလေးတုံးတစ်တုံးကို ကိုင်ထားလိုက်ပါ။

ထို့နောက် ညာဒူးကို အောက်သို့ နိမ့်ချလိုက်ကာ ဘယ်ဒူးကိုလည်း အလိုက်သင့်လေး ကွေးညွှတ်လိုက်ရပါမယ်။

ထိုနည်းအတိုင်း ၁၅ ကြိမ် ပြည့်တဲ့အခါ ညာခြေကို ကြမ်းပြင်မှာ ချထားပြီး ဘယ်ခြေကို ခုံပေါ်မှာ တင်ထားလိုက်ပါ။ ၁၅ ကြိမ် ဆက်လက်ပြုလုပ်ပါ။ ညာ ၁၅ ကြိမ်၊ ဘယ် ၁၅ ကြိမ်ပြည့်မှ ၁ ကျော့ပြီးသွားမှာဖြစ်ပါတယ်။ နောက်ထပ် ၂ ကျော့ကို ထိုနည်းအတိုင်း ဆက်လက်ပြုလုပ်ပေးရပါမယ်။

လေ့ကျင့်ခန်း (၄)

Source: Tenor

ဒူးနှစ်ဖက်ကို ပုခုံးအကျယ်အတိုင်း ချဲထားပါ။ လက်နှစ်ဖက်က အလေးတုံးကို ကိုင်ထားပြီးနောက် ပုံပါအတိုင်း ခန္ဓာကိုယ် အပေါ်ပိုင်းကို အရှေ့သို့ ကိုင်းညွှတ်ပေးရမှာဖြစ်ပါတယ်။ စုစုပေါင်း ၁၅ ကြိမ်၊ ၃ ကျော့ ပြုလုပ်လိုက်ပါ။

လေ့ကျင့်ခန်း (၅)

Source: Menshealth

ဒူးနှစ်ဖက်ကို ပုခုံးအကျယ်အတိုင်း အနည်းငယ် ချဲထားပြီးနောက် လက်နှစ်ဖက်ကို ခုံပေါ်မှာ တင်ထားလိုက်ပါ။ ထို့နောက် တင်ပါးကို ပုံပါအတိုင်း အပေါ်သို့ ပင့်တင်လိုက် မူလအနေအထားအတိုင်း ပြန်ချလိုက်ဖြင့် တစ်လှည့်စီ ပြုလုပ်ရပါမယ်။

စုစုပေါင်း ၁၅ ကြိမ်၊ ၃ ကျော့ ပြုလုပ်ပေးရမှာဖြစ်ပါတယ်။

ဒီလေ့ကျင့်ခန်းများကတော့ ကွီးတို့ကို အုတ်မြစ် တောင့်ပြီး သက်လုံ ကောင်းကာ အမောခံနိုင်အောင် ကူညီပေးမှာပဲ ဖြစ်ပါတယ်။

အထက်ဖော်ပြပါ လေ့ကျင့်ခန်းများ မစခင်မှာ သွေးပူလေ့ကျင့်ခန်းများကို ၅ မိနစ်မှ ၁၀ မိနစ်ခန့် ပြုလုပ်ဖို့ မမေ့ပါနဲ့။ လေ့ကျင့်ခန်းအားလုံး ပြုလုပ်ပြီးတဲ့အခါမှာလည်း အကြောလျော့လေ့ကျင့်ခန်းများကို မမေ့မလျော့ ပြုလုပ်ပေးရမှာ ဖြစ်ပါတယ်။

Source: Verywellfit

Featured Image: Freepik