လေ့ကျင့်ခန်းလုပ်ဖို့ နောက်ကျတယ်ဆိုတာ မရှိပါဘူး။ ငယ်ရွယ်သူတွေကစလို့ အသက်ကြီးပိုင်းတွေအထိ ကိုယ်လက်လှုပ်ရှား လေ့ကျင့်ခန်း ပုံမှန် ပြုလုပ်သင့်ပါတယ်။ အသက် ၄၀ ကို ကျော်လွန်လာပြီဆိုတာနဲ့ ခန္ဓာကိုယ်မှာရှိတဲ့ ကြွက်သားနဲ့ အရိုးအဆစ်တွေရဲ့ ကြံ့ခိုင်သန်မာမှုဟာ အား လျော့လာတဲ့အတွက် လှုပ်လှုပ်ရှားရှား လေ့ကျင့်ခန်းတွေ ပိုလို့တောင် လုပ်သင့်တယ်လို့ ပြောနိုင်ပါတယ်။
အသက် ၄၀ – ၅၀ အရွယ်ခန္ဓာကိုယ်ဟာ အသက် ၂၀ အရွယ်လူငယ်လေးတစ်ယောက်လိုတော့ ဖျက်လက်တက်ကြွနေမှာ မဟုတ်ပေမယ့် အသက်အရွယ်နဲ့အညီ လုပ်နိုင်တဲ့ လှုပ်ရှားမှု/ လေ့ကျင့်ခန်းတွေ နေ့စဉ်ပုံမှန် လုပ်ဆောင်သွားမယ်ဆိုရင် ကျန်းမာရွှင်လန်းတဲ့ လူမှု့ဘဝတစ်ခုကို ပိုင်ဆိုင်နိုင်မှာ အသေအချာပါပဲ။ ကဲဒါဆို အသက် ၅၀ ကျော်ချိန်မှာ လေ့ကျင့်ခန်း လုပ်မယ့် သူတွေအနေနဲ့ သိထားသင့်တဲ့ အချက်လေးတွေကို ပြောပြပေးချင်ပါတယ်။
(၁) လေ့ကျင့်ခန်း လုပ်တာက ဘာတွေကောင်းစေလဲ
Photo : WellcomeMD
လေ့ကျင့်ခန်း လုပ်တာဟာ အသက်ကြီးလာတာနဲ့အမျှ တဖြည်းဖြည်းဆုံးရှုံးလာတဲ့ ကြွက်သားထုကို ပြန်လည်တည်ဆောက်ရာမှာ ကူညီပေးပါတယ်။ ခန္ဓာကိုယ်ရဲ့ ကြွက်သားတွေ အားလျော့တာ ၊ ကြွက်သားတင်းမာမှုနဲ့ လှုပ်ရှားရခက်တာတွေကို လျော့ကျသက်သာစေတဲ့အပြင် အရိုးနဲ့ အဆစ်အမြစ်တွေရဲ့ ကြံ့ခိုင်သန်စွမ်းမှုကို ပိုမိုအားကောင်းစေဖို့ ထောက်ပံ့ပေးပါတယ်။
ဒါ့အပြင် သက်ကြီးပိုင်းအရွယ်တွေမှာ အဖြစ်များတဲ့ နှလုံးရောဂါ ၊ သွေးတိုး ၊ ဆီးချို ၊ လေဖြတ်ခြင်း ၊ အယ်လ်ဇိုင်းမားရောဂါ ၊ အဆစ်အမြစ်ရောင်ရောဂါနဲ့ အရိုးပွရောဂါတွေလို ပြင်းထန်တဲ့ နာတာရှည်ရောဂါ အန္တရာယ်တွေမှလည်း အထိုက်အလျောက် ကာကွယ်ကုသပေးနိုင်ပါတယ်။
(၂) ဘယ်လို လေ့ကျင့်ခန်းအမျိုးအစားတွေ လုပ်သင့်လဲ
Photo : Thibodaux Regional Fitness Center
သက်ကြီးပိုင်းတွေအနေနဲ့ လူငယ်တွေလိုတော့ လေ့ကျင့်ခန်း အမျိုးအစားမရွေး လုပ်ဆောင်နိုင်ဖို့ မဖြစ်နိုင်ပါဘူး။ ခန္ဓာကိုယ်ရဲ့ ခံနိုင်စွမ်းအား ၊ ကြံ့ခိုင်မှု ၊ သက်လုံနဲ့ ထိခိုက်ဒဏ်ရာရနိုင်ခြေတွေကို တွက်ချက်ချိန်ဆပြီး ကိုက်ညီတဲ့ လေ့ကျင့်ခန်းအမျိုးအစားကို ရွေးချယ်လုပ်ဆောင်ရမှာ ဖြစ်ပါတယ်။
အဓိကအားဖြင့် ကြွက်သားတွေသန်မာစေပြီး အရိုးသိပ်သည်းဆကိုတိုးစေမယ့် လေ့ကျင့်ခန်းတွေ ၊ ခန္ဓာကိုယ်တစ်ခုလုံးမှာရှိတဲ့ အဆစ်တွေရဲ့ လှုပ်ရှားမှုကို ပိုမိုကောင်းမွန်စေမယ့် Range of Motion လေ့ကျင့်ခန်းတွေ ၊ ကြွက်သားနဲ့ အရွတ်တွေရဲ့တင်းမာမှုတွေကို ပြေလျော့စေမယ့် အကြောလျော့ လေ့ကျင့်ခန်းတွေ ၊ သက်လုံနဲ့ ခံနိုင်စွမ်းအားတိုးစေမယ့် စက်ဘီးစီးခြင်း ၊ လမ်းလျောက်ခြင်း ၊ ဂေါ့ဖ်ရိုက်ခြင်း ၊ ရေကူးခြင်း နဲ့ အေရိုးဗစ် စတဲ့လေ့ကျင့်ခန်းတွေနဲ့ ဆရာဝန်ညွှန်ကြားတဲ့ လှုပ်ရှားမှု/လေ့ကျင့်ခန်းတွေကို လုပ်သင့်ပါတယ်။
(၃) လေ့ကျင့်ခန်း ဘယ်လောက်လုပ်သင့်လဲ
Photo : Eat This, Not That
ကျန်းမာရေးကောင်းမွန်တဲ့ သူတစ်ယောက်အနေနဲ့တော့ တစ်ပတ်ကို အနည်းဆုံး မိနစ် ၁၂၀ ကနေ ၁၅၀ ခန့် လေ့ကျင့်ခန်း ပြုလုပ်နိုင်ပါတယ်။ တစ်ကြိမ်ကို အနည်းဆုံး ၁၀ မိနစ်ကနေ မိနစ် ၂၀ ခန့် တစ်ရက်ကို ၂ ကြိမ်နဲ့ တစ်ပတ်မှာအနည်းဆုံး ၃ ရက်ခန့် လေ့ကျင့်ခန်း ပြုလုပ်သင့်ပါတယ်။ ခြေထောက် ၊ တင်ပါး ၊ နောက်ကျော ၊ ဝမ်းဗိုက်၊ ပခုံးနဲ့ လက်မောင်းတွေမှာ ရှိတဲ့ ကြွက်သားတွေအတွက် တစ်ပတ်မှာ အနည်းဆုံး ၂ ကြိမ်ခန့် အချိန်ပေးပြီး လေ့ကျင့်ခန်းပြုလုပ်ပါ။ လေ့ကျင့်ခန်းမလုပ်နိုင်ရင်တောင် ခန္ဓာကိုယ်ကို တက်နိုင်သမျှ လှုပ်လှုပ်ရှားရှားနေပါ။ ထိခိုက်ဒဏ်ရာရနိုင်မယ့် လေ့ကျင့်ခန်းတွေ ၊ ပြင်းပြင်းထန်ထန်လုပ်ရတဲ့ လှုပ်ရှားမှုတွေ ရှောင်ပါ။
ပရိုတင်းဓာတ် ၊ ကယ်လ်စီယမ်ဓာတ်နဲ့ အမျှင်ဓာတ်ကြွယ်ဝတဲ့လတ်လတ်ဆတ်ဆတ် ဟင်းသီးဟင်းရွက်တွေ ပြည့်စုံမျှတအောင်စားပေးပါ။ နေ့စဉ်ပုံမှန် အိပ်ချိန်ပြည့်ပြည့်ဝဝ အိပ်စက်အနားယူပြီး လိုအပ်ပါက ဆရာဝန်နဲ့ ၆ လတစ်ကြိမ် ကျန်းမာရေးစစ်ဆေးမှု ခံယူသင့်ပါတယ်။ ဒါဆိုရင်တော့ အသက် ၅၀ အရွယ်မှာ ကျန်းမာရွှင်လန်းတဲ့ လူမှု့ဘဝတစ်ခုကို သေချာပေါက် ပိုင်ဆိုင်နိုင်မှာ ဖြစ်ပါတယ်။
Featured Photo : The Globe and Mail
