ဘရုစ္စလီ ဆိုရင် အက်ရှင်ကွန်ဖူးကားကြိုက်သူတိုင်း သိပြီးသား နာမည်တစ်ခုဖြစ်ကြမှာပါ။ ဆန်ဖရန်စ္စကိုမှာ မွေးပေမယ့် တရုတ်နွယ်ဖွား ဟောင်ကောင်မှာ ကြီးပြင်းခဲ့တဲ့ သူဟာ နာမည်ကျော်တရုတ်သိုင်းဆရာကြီး ရှီဖု ယဲ့မန်ဆီကနေပါ ဝင်ချွန်းသိုင်းပညာသင်ခဲ့ပါတယ်။ ကွန်ဖူးကို ရူးသွပ်သလို သူ့ဘော်ဒီကိုလည်း စိတ်ကြိုက်ဖြစ်အောင် လေ့ကျင့်လေ့ရှိတဲ့ ဘရုစ္စလီ ဆီက အတုခိုးစရာ ၃ မိနစ် Workout အကြောင်းကို ဒီတစ်ခေါက် မျှဝေတင်ဆက်လိုက်ပါတယ်။
(၁) Full Body Stretch
Photo : Pinterest
အကြောလျှော့တာကနေ စကြည့်ရအောင်ပါ။ ဒါက ခန္ဓာကိုယ်ကို အရင်ဆုံး နှိုးလိုက်တာ ဖြစ်ပါတယ်။ စိတ်ရောကိုယ်ပါ ဖြေလျှော့မှုလုပ်ရင်းနဲ့ အာရုံစိုက်လိုက်တာပါ။ လုပ်ငန်းက လက်မောင်းနဲ့ ခြေတွေကို Direction တစ်ဖက်ဖက်ဆီ ဆန့်နိုင်သလောက် ဆန့်ထားပြီး ၃ စက္ကန့်လောက် ထိန်းထားပြီး ၂ စက္ကန့်ကြာ ပြန်ဖြေလျှော့ရပါတယ်။ ဒါမျိုး ၅ ကြိမ် လုပ်ရပါတယ်။ ခြေထောက်ကို ဦးတည်ရာတစ်ဖက်ဆီ ဆန့်ထုတ်နေချိန်မှာ လက်တစ်ဖက်က ဆန့်ကျင်ဘက် အရပ်မျက်နှာဆီ ဝေးနိုင်သမျှ ဝေးအောင် ပို့ရတာပါ။ တစ်ဖက်ကို ၅ စက္ကန့်နှုန်းနဲ့ ၅ ကြိမ် – ၂၅ စက္ကန့်ကြာအောင် လုပ်ရမှာပါ။
(၂) Back Arches
ခါးရိုးကို အမိုးခုံးတစ်ခုလို ကွေးညွှတ်တဲ့ လေ့ကျင့်ခန်းပါ။ Back Arches လုပ်တာက ပက်လက်လှန် ခါးကော့တာပါပဲ။ တင်ပါးကို မြှောက်ထိန်းပြီး ၃ စက္ကန့်ထိန်း ၂ စက္ကန့်နား ၅ ကြိမ် လုပ်ရပါတယ်။
(၃) Leg Tensing
ခြေထောက်တွေကို ဖြည်းဖြည်းချင်း ဆန့်နိုင်သလောက် ဆန့်ပါ။ ၃ စက္ကန့်ထိန်းထားပြီးမှ ၂ စက္ကန့်လောက် ကြာအောင် လျှော့ပြီး ၁၂ ကြိမ်နှုန်းနဲ့ ၁ မိနစ်ကြာအောင် ကစားပါ။
(၄) Abdominal Tensing
Photo: T3
ဗိုက်အကြောတွေ သန်မာကျစ်လျစ်အောင် ကစားတာပါ။ Abs ဗိုက်ခေါက်ကို ထိန်းပြီး ဒူးနှစ်ဖက်ကိုစုပြီး ဘေးဘက်တွေကို ကြမ်းပြင်နဲ့ ထိခါနီးအထိ ထိန်းရတာပါ။ ဒီနည်းက Belly ကစားနည်းနဲ့ ဆင်ပြီး လက်ကို ကြမ်းပေါ်ပဲ ချချ ၊ ခေါင်းအောက် ၊ ဗိုက်ပေါ်ပဲ ထားထား ရပါတယ်။ ဗိုက်ထိန်း ဒူးလှည့်ပြီး ၃ စက္ကန့်ထိန်း ၂ စက္ကန့်လျှော့ အနေအထားနဲ့ စက္ကန့် ၅၀ အထိ ကစားရတာပါ။
(၅) Sit-up touching toes
ထိုင်ထခြေထိ ကစားဖို့ ပက်လက်လှန် ၊ ခြေမြှောက်ဆန့် ခြေချောင်းထိပ်ကို လက်ထိရတာပါ။ ၅ ကြိမ်နှုန်းနဲ့ ၁၀ စက္ကန့်ကြာ ကစားရမှာ ဖြစ်ပါတယ်။
(၆) Bent Leg Raises
ဒီတစ်ခုကလည်း ပက်လက်အနေအထားနဲ့ လုပ်ရတာပါ။ ခြေထောက်တွေကို ရင်ဘတ်အထိ မြှောက်တင် အောက်ချလုပ်ရတာပါ။ ဖြည်းဖြည်းချင်း လုပ်ရမယ့် အလေ့ကျင့်ခန်း ဖြစ်ပြီး လက်နှစ်ဖက်ကို ခေါင်းနောက်ဖက် ဆန့်ထားရမှာပါ။ ၅ ကြိမ်နှုန်းနဲ့ ၁၀ စက္ကန့်ကြာအောင် ကစားပေးဖို့ လိုပါတယ်။
Featured Photo : Fitness Volt
