ကွီးတို့ရဲ့ မနက် အိပ်ရာထ ချိန်က ဘယ်နှစ်နာရီဖြစ်မလဲ။ လူအများစုအတွက် ပုံမှန် အိပ်ရာဝင်ချိန်ဟာ ည ၁၀ နာရီ နဲ့ ၁၁ နာရီကြား ဖြစ်ပြီး အိပ်ရာထ ချိန်ကတော့ ၆ နာရီ ၆ နာရီခွဲဖြစ်တယ်လို့ ဆိုပါတယ်။ Barnsley College ရဲ့ လေ့လာမှုအရ ကိုယ့်ဒူးကိုယ်ချွန် မီလျံနာဖြစ်လာသူတွေရဲ့ ၅၀% နဲ့ အမှုဆောင်အရာရှိတွေရဲ့ ၉၀% ဟာ မနက် ၆ နာရီ မထိုးခင် အိပ်ရာက ထ,တယ်လို့ ဖော်ပြထားပါတယ်။

မနက်စောစော အိပ်ရာထခြင်းဟာ လူရဲ့ ကိုယ်တွင်းနာရီ Body Clock ကျန်းမာရေးအတွက် အရေးကြီးသလို လူရဲ့ နေ့စဉ်ဘဝလုပ်ဆောင်ချက်တွေအတွက်ပါ အထောက်အကူ ဖြစ်စေပါတယ်။ မနက် ၄ နာရီ အိပ်ရာထတဲ့ အလေ့အကျင့် လုပ်ပေးခြင်းအားဖြင့် ပုံမှန်ထက်အနည်းဆုံး လုပ်ချင်ရာ လုပ်ဖို့ အချိန် ၃ နာရီ ပိုရလာပါတယ်။ ဒါဟာ တစ်ပတ်ဆို နာရီ ၂၀ ဖြစ်ပါတယ်။ အချိန်ရှားတယ်ဆိုသူတွေအတွက် တစ်ပတ် နာရီပို ၂၀ ထွက်လာမှာ ဖြစ်လို့ တစ်ရက်စာ နီးပါး လုပ်စရာအချိန် ပိုရလာမှာပဲ ဖြစ်ပါတယ်။

တစ်နေ့တာလုံးမှာ စိတ်အကြည်ဆုံးအချိန်က မနက် ၅ နာရီကနေ ၉ နာရီဝန်းကျင်ဖြစ်ပါတယ်။ ဒီအချိန်မှာ အိပ်ရာက ထပြီး အလုပ်လုပ်ရင် အလုပ်လည်း ပိုပြီး အလုပ်တွင်သလို Mood လည်း ပိုကောင်းပါတယ်။ စိတ်ခံစားချက်ကောင်းလေလေ တစ်ခုခုကို ထိထိရောက်ရောက်လုပ်နိုင်ဖို့ ပိုလွယ်လေလေပါပဲ။ လူတော်တော်များများက မနက်စောစောထရင် ခေါင်းမကြည်ဘူးလို့ ထင်ကြပါတယ်။ ညဘက်တွေ အိပ်ရာဝင်နောက်ကျတာဆိုရင်တော့ ဟုတ်ပါတယ်။ ညဘက် စောစောအိပ်ရာဝင်ထားပြီး မနက်စောစော နိုးလာတဲ့သူတွေကတော့ ဒီလိုမဟုတ်ပါဘူး။ ရုံးပိတ်ရက်မနက်စောစောမှာ အိပ်ရာကထကြည့်မယ်ဆိုရင် ကိုယ့်ရဲ့ အာရုံစိုက်နိုင်စွမ်း မြင့်မားနေတာကို တွေ့ပြီး အံ့ဩရပါလိမ့်မယ်။

Photo : voicesofyouth

မနက် အချိန်ပိုရတာတာကြောင့် ကျန်းမာရေးအတွက် အညောင်းအညာပြေ လမ်းလျှောက်တာ ၊ အားကစားလုပ်တာတွေ လုပ်ဆောင်နိုင်လာပါတယ်။ မနက်ဘက်ဆိုတာ ခန္ဓာကိုယ်ရဲ့ Cortisol Level တက်နေချိန်ဖြစ်လို့ အားကစားလုပ်ဖို့အတွက် ပိုပြီး နိုးကြား တက်ကြွနေမှာပါ။ မနက်စာ မစားခင် Work Out လုပ်မယ်ဆိုရင် ဝိတ်ကျတာလည်း ပိုမြန်လာနိုင်ပါတယ်။ ကျန်းမာတဲ့ ကိုယ်အလေးချိန် ပိုင်ဆိုင်ချင်ရင် မနက်စောစော အိပ်ရာထပြီး ကိုယ်လက်လှုပ်ရှားမှု လုပ်ပေးဖို့ လိုပါတယ်။ ဒါမှမဟုတ်လည်း မနက်စောစော အသံဗလံ တိတ်ဆိတ်နေတုန်းမှာ တရားထိုင်တာ ၊ ယောဂလုပ်တာလိုမျိုး စိတ်ကြည်လင်ရေး ဦးစားပေးနိုင်ပါတယ်။

အလုပ်အကိုင်ကိုယ်စီနဲ့ ရုံးသွားရုံးတက်ကြမယ့် သူတွေအတွက်လည်း စောစောစီးစီး အိပ်ရာက ထတာဟာ တစ်နေ့တာ လုပ်စရာတွေကို အချိန်ယူပြီး စီစဉ်ထားလို့ ရနိုင်ပါတယ်။ ဒီနေ့အတွက် ကိုယ်ဘယ်အပိုင်းကို မဖြစ်မနေ လုပ်ရမှာလဲ ၊ အရေးကြီးတဲ့ Key Goals တွေက ဘာတွေလဲ ချပြီး အစီအစဉ် ဆွဲထားနိုင်သလို ခေါင်းထဲမှာ ပေါ်လာသမျှကိုလည်း အာရုံထားပြီး ချရေးနိုင်မှာ ဖြစ်ပါတယ်။ တချို့တွေဆို မနက်ပိုင်းမှာ မှတ်တမ်းရေးတာ ၊ အချိန်ဇယားဆွဲတာတွေ လုပ်လေ့ရှိပါတယ်။ ဒီလို တစ်နေ့တာအတွက် ပထမဆုံးအချိန်မှာ လုပ်စရာလေးတွေ အာရုံစိုက်နိုင်တာကြောင့်လည်း အလုပ်တွင်ပြီး အရေးကြီး လုပ်စရာတွေ တစ်ခုမကျန် လုပ်ဆောင်လာနိုင်ပါတယ်။

မိသားစုနဲ့ ကလေးတွေအတွက် မနက်စာ ပြင်ပေးဖို့လည်း အချိန်ရလာပါမယ်။ မိသားစုနဲ့ အတူတူ မနက်ခင်းကို ဖြတ်သန်းဖို့လည်း အချိန်ပေးလာနိုင်မှာပါ။ တစ်နည်းအားဖြင့် မိသားစုနဲ့ နီးစပ်မှု ပိုမြင့်လာပြီး တစ်ယောက်ကို တစ်ယောက် ပိုဂရုစိုက်လာနိုင်မယ်လို့ ပြောချင်ပါတယ်။ ကျန်းမာရေးအမြင်အရ ကြည့်မယ်ဆိုရင်လည်း မနက် ၄ နာရီလိုမျိုး ခပ်စောစော အိပ်ရာက ထတာဟာ အင်မတန် အကျိုးများပါတယ်။

သိသာတဲ့အချက်က နေ့တိုင်း မနက်စာ စားဖြစ်လို့ မနက်စာလွတ်လို့ ကျန်းမာရေးထိခိုက်တာမျိုးလည်း ဖြစ်တော့မှာ မဟုတ်ပါဘူး။ မနက်ချိန်ခါဟာ စိတ်ကြည်လင်မှု နဲ့ ခံစားချက်တွေ အကောင်းဆုံး အချိန်ဖြစ်ပါတယ်။ ဒိအချိန်မှာ လူရဲ့ သိစိတ် လုပ်ဆောင်ချက် Cognitive Function ဟာ အားကောင်းနေတာကြောင့် ပြဿနာဖြေရှင်းနည်း စွမ်းဆောင်ရည်ကောင်းသလို မှတ်ဉာဏ်စီစဉ်မှု ၊ အာရုံစူးစိုက်မှု ၊ အတွေးအခေါ်နဲ့ အကောင်းမြင်စိတ်တွေပါ မြင့်တက်လာနိုင်ပါတယ်။ ဒါဟာ စိတ်ဖိစီးမှု နဲ့ စိတ်ဓါတ်ကျဆင်းနိုင်ခြေကိုလည်း တစ်ဖက်တစ်လမ်းကနေ တိုက်ထုတ်ပေးနိုင်စွမ်း ရှိပါတယ်။

Photo : goalcast

စောစောအိပ်ပြီး အိပ်ရာစောစောထတဲ့ သူတွေဟာ အိပ်စက်မှုအရည်အသွေး မြင့်မားတဲ့သူတွေလည်း ဖြစ်လို့ အိပ်ရေးပျက်ခြင်းကြောင့် ခန္ဓာကိုယ် ဇီဝဖြစ်စဉ် ထိခိုက်တာမျိုးလည်း နည်းပါးတတ်ပါတယ်။ ကိုယ်တွင်းဇီဝကမ္မဖြစ်စဉ် ကမောက်ကမ ဖြစ်မှု နဲ့ ဆက်စပ်ပြီး ဝင်ရောက်တတ်တဲ့ ဆီးချို ၊ သွေးချို ၊ နှလုံးရောဂါ နဲ့ ဝိတ်တက်တာတွေ အဖြစ်နည်းပါတယ်။ မနက်ဖက် အိပ်ရာထဖြစ်တာဟာ ဝမ်းမှန်ခြင်းကိုလည်း အားပေးလို့ အစာခြေစနစ်ကိုပါ အထောက်အကူပြုနိုင်ပါတယ်။

ပုံမှန် အိပ်ရာက ထချိန်ထက် ၂ နာရီ ၃ နာရီလောက် စောပြီး အိပ်ရာထတာဟာ အိပ်ရေးမဝ,ဘဲ ပင်ပန်းမယ်လို့ ထင်ကြပါတယ်။ တကယ်က အလေ့အကျင့်ကပဲ လူကို ဦးဆောင်သွားတာပါ။ ညစောစော အိပ်ပြီး မနက်စောစော ထတဲ့ အလေ့အကျင့် လုပ်ထားမယ်ဆိုရင် မနက် ၄ နာရီ ထဖို့ကလည်း ခက်ခဲတော့မှာ မဟုတ်ပါဘူး။

Featured Photo : rushcuttershealth