စီးပွားရေးဆိုင်ရာတွေ့ဆုံပွဲတွေ၊ ကုမ္ပဏီနှစ်ပတ်လည်နေ့တွေ၊ လုပ်ငန်းပိုင်းဆိုင်ရာ ပူးပေါင်းလုပ်ဆောင်တဲ့ အခါ Business Dinner ညစာစားပွဲတွေကို ကျင်းပလေ့ရှိပါတယ်။ ဒီလိုပွဲမျိုးက သာမာန်ညစာစားပွဲတွေနဲ့ မတူဘဲ သတိထားပြင်ဆင်ရလေ့ ရှိပါတယ်။ အကယ်၍ Business Dinner တစ်ခုကို ကွီးတို့ ကိုယ်တိုင် ပြင်ဆင်ရမယ်ဆိုရင် သိထားရမဲ့အချက်များကို ဒီဆောင်းပါးလေးကနေပြီးတော့ ဖော်ပြပေးချင်ပါတယ်။

ကျင်းပမဲ့နေရာကို သေချာရွေးချယ်ပါ

Photo : Best Resataurants

Business Dinnerကို ကွီးကိုယ်တိုင် ပြင်ဆင်ရမယ်ဆိုရင် ကျင်းပမဲ့နေရာကို မရွေးချယ်ခင်၊ လူဦးရေဘယ်လောက် ကိုဖိတ်ကြားမလဲဆိုတာ အရင်ဆုံး စာရင်းပြုစုပါ။ လူ ၁၀ ယောက်လောက်နဲ့ သီးသန့်ဆန်ဆန် တွေ့ဆုံပွဲလား၊ လူများများနဲ့ လုပ်မလားဆိုတာ သေချာသိထားရင် ညစာစားပွဲ ကျင်းပမဲ့ နေရာရွေးချယ်ရာမှာ အထောက်အကူပြုစေမှာပါ။ ကျင်းပမဲ့နေရာရွေးချယ်ရာမှာ တိတ်ဆိတ်ပြီး သီးသန့်ဖြစ်တဲ့ စားသောက်ဆိုင်ကို ရွေးချယ်မလား၊ ဒါမှမဟုတ် ဟိုတယ်မှာ အခန်းသီးသန့်ငှားပြီး ကျင်းပမလား ဆိုတာသေချာရွေးချယ်ပါ။ ပြီးလျှင် ရွေးချယ်ထားတဲ့နေရာမှာ ကြိုတင်ဘွတ်ကင် လုပ်ထားဖို့လည်း လိုပါတယ်။ နောက်အရေးကြီးတဲ့ အချက်ကတော့ ကားပါကင်နေရာ အဆင်ပြေ၊ မပြေ စစ်ဆေးပြီးမှ ရွေးချယ်ပါ။

အချိန်နဲ့ ရက်သတ်မှတ်ပါ

Photo : Zazzle

ကွီးတို့အနေနဲ့ လုပ်ငန်းပိုင်းဆိုင်ရာ ညစာစားပွဲဖြစ်တဲ့အတွက် ကွီးတို့ဖိတ်ကြားချင်တဲ့ ပုဂ္ဂိုလ်များအားလုံး အဆင်ပြေတဲ့ ရက်ကို သတ်မှတ်ဖို့လိုပါတယ်။ ရုံးပိတ်ရက်ဖြစ်တဲ့ စနေ၊ တနင်္ဂနွေနေ့မျိုးက ရွေးချယ်လို့အဆင်ပြေပါတယ်။ ထို့နောက် ကွီးတို့ Dinner စတင်မဲ့အချိန်ကို သေချာသတ်မှတ်ပါ။ ရက်နဲ့ အချိန်ကို သေချာသတ်မှတ်ပြီးလျှင် ကွီးတို့ဖိတ်ကြားမဲ့ ပုဂ္ဂိုလ်များကို ကြိုတင်ပြီး ဖိတ်ကြားလွှာပေးပို့ပါ။

တည်ခင်းဧည့်ခံမဲ့ အစားအစာများ

Photo : Part Joys

Business Dinner တစ်ခုကို ကွီးတို့ ကိုယ်တိုင် ပြင်ဆင်ရမယ်ဆိုရင် အရေးကြီးတဲ့ အချက်တစ်ခုကတော့ အစားအစာနဲ့ အဖျော်ယမကာများ သေချာရွေးချယ်ပြီး ထည့်သွင်း ဧည့်ခံဖို့ပါပဲ။ ညစာစားပွဲမှာ ကျွေးမွေးဧည့်ခံမဲ့ အစားအစာများက သန့်ရှင်းလတ်ဆတ်ပြီး ရာသီနဲ့လိုက်ဖက်သော အစားအစာများ ဖြစ်ပါစေ။ ဒါ့အပြင် ကြွရောက်လာမဲ့ ဧည့်သည်များ ကြိုက်နှစ်သက်ရာရွေးချယ်နိုင်အောင် စီစဉ်ထားပေးသင့်ပါတယ်။ အချိုပွဲများကိုလည်း ထည့်သွင်းဖို့ မမေ့ပါနဲ့။

အဖျော်ယမကာများ

Photo : Adobe Stock

နောက်ထပ်အရေးကြီးတာကတော့ အဖျော်ယမကာများ ထည့်သွင်းမှုပါပဲ။ လုပ်ငန်းကိစ္စများ စကားစမြည်ပြောရင်းနဲ့ သောက်သုံးနိုင်ဖို့ ဝိုင်များ၊ ဝီစကီနဲ့ ရှန်ပိုင်များ စသည်တို့ကို သေချာထည့်သွင်း စီစဉ်ပေးရပါမယ်။ ကွီးတို့ တည်ခင်းဧည့်ခံမဲ့ အစားအစာများ၊ အချိုပွဲများနဲ့ လိုက်ဖက်တဲ့ အဖျော်ယမကာများ ဖြစ်ပါစေ။ ဒါ့အပြင် အယ်လ်ကို‌ဟော မသောက်သုံးချင်တဲ့ ဧည့်သည်တော်များအတွက်လည်း အခြားသော သောက်စရာများ၊ ဖျော်ရည်များကို သေချာစွာစီစဉ်ထားပေးသင့်ပါတယ်။

တေးဂီတ အစီအစဉ်များ

Photo : MIT Events

စီးပွားရေးဆိုင်ရာ Dinner ပါတီတွေမှာလဲ တေးဂီတအစီအစဉ် ထည့်သွင်းလို့ရပါတယ်။ သို့ပေမဲ့ အခြားပါတီတွေကဲ့သို့ မဟုတ်ဘဲ ငြိမ့်ညောင်းတဲ့ သီချင်းသံလေးတွေကိုသာ ရွေးချယ်ပါ။ ဒါမှာသာ ကွီးတို့ စကားပြောဆိုတဲ့အခါမှာ သီချင်းသံတွေနဲ့ အနှောင့်အယှက်မဖြစ်စေမှာပါ။ ဒါ့အပြင် စန္ဒယားနဲ့ တယောတေးဂီတ အစီအစဉ်လေးတွေ ထည့်သွင်းတာကလဲ စိတ်ကူးကောင်းပါပဲ။

ကွီးတို့ရေ အခုဖော်ပြပေးလိုက်တာကတော့ Business Dinner တစ်ခုကို ကွီးတို့ ကိုယ်တိုင် ပြင်ဆင်ရမယ်ဆိုရင် သိထားရမဲ့အချက်လေးတွေပဲ ဖြစ်ပါတယ်။ ဒီအချက်လေးတွေက ကွီးတို့အတွက် ဘယ်လိုညစာစားပွဲမဆို ပြင်ဆင်ရာမှာ အထောက်အကူပြုစေမှာပါ။

Featured Photo : leadership