“အားကစား လုပ်ဖို့ သင် ဘယ်တော့မှ နောက်မကျဘူး” ဆိုတဲ့ စကားလေးကို ကြားဖူးကြမယ် ထင်ပါတယ်။ ဟုတ်ပါတယ် အားကစားလုပ်ဖို့ နောက်ကျတယ်ဆိုတာ မရှိပါဘူး။ အဓိက အားကစားလုပ်ချင်တဲ့ စိတ်ရှိဖို့ပဲ လိုတာပါ။ အချိန်စောစော အားကစားလုပ်နိုင်လေ ကျန်းမာကြံ့ခိုင်တဲ့ လူမှုဘဝတစ်ခုကို စောစောပိုင်ဆိုင်နိုင်လေပဲ ဖြစ်ပါတယ်။ ဒီတစ်ခေါက်တော့ အခုကစပြီး အားကစား လုပ်မယ်လို့ ဆုံးဖြတ်ချက်ချထားတဲ့ ကွီးတို့အတွက် သိထားရမယ့် Fitness Tips လေးတွေကို မျှဝေပေးချင်ပါတယ်။

(၁) ပထမ ခြေလှမ်းနဲ့ စတင်ပါ

Photo : Healthline

အားကစား လုပ်တဲ့အခါ ကျန်းမာရေးပိုကောင်းဖို့ ၊ ဘော်ဒီပြောင်းလဲဖို့ စသည်ဖြင့် Goals တွေ ရှိကြပါတယ်။ ကွီးတို့ အနေနဲ့ ရည်မှန်းထားတဲ့ Goals တွေ ၊ ပန်းတိုင်တွေကို အရောက်လှမ်းနိုင်ဖို့ဆိုရင် ပထမဆုံး ခြေလှမ်းတစ်ခုနဲ့ စတင်ရမှာ ဖြစ်ပါတယ်။ သေးငယ်တဲ့ ပန်းတိုင်လေးတွေနဲ့ စတင်တာဟာ ကွီးတို့ရည်မှန်းထားတဲ့ မဟာပန်းတိုင်ကြီးဆီရောက်ဖို့ လမ်းကြောင်းပေါ် တက်လိုက်ခြင်းပဲ မဟုတ်လား။ ဥပမာ အပြေးလေ့ကျင့်ခန်း လုပ်မယ်ဆိုရင် အရင်ဆုံး ကီလိုမီတာ အနည်းငယ်နဲ့ စတင်ပြေးလိုက်ပါ။ တစ်ရက်ထက် တစ်ရက် အကွာအဝေးကို ပိုတိုးပြီး ပြေးနိုင်အောင်ကြိုးစားပါ။ ဘယ်အားကစားပဲ လုပ်လုပ် ကိုယ့်ကိုယ်ကို ဒဏ်မပိစေမယ့် သေးငယ်တဲ့ ခြေလှမ်းတစ်ခုနဲ့ စတင်ဖို့ လိုပါတယ်။

(၂) လေ့ကျင့်ခန်းအစီအစဉ်တွေ ပြောင်းလဲလုပ်ဆောင်ပါ

Photo : Man of Many

နေ့ရက်တိုင်းမှာ တူညီတဲ့ လေ့ကျင့်ခန်းတွေ ၊ အားကစားနည်းတွေကိုပဲ ထပ်တလဲလဲ လုပ်နေရမယ်ဆိုရင် ပျင်းရိငြီးငွေ့ လာနိုင်ပါတယ်။ ဒီအခါ အားကစားလုပ်ခြင်းကို လက်လျှော့ချင်စိတ်တွေ ဖြစ်လာပါလိမ့်မယ်။ ဒီလိုမဖြစ်ရလေအောင် မတူညီတဲ့ လေ့ကျင့်ခန်းတွေ ၊ အားကစားနည်းတွေကို ပြောင်းလဲလုပ်ဆောင်ပါ။ Tnterval Training တွေ ၊ Strength Training တွေနဲ့ ရေကူးခြင်း ၊ Indoor Cycling ၊ Kickboxing ကစားခြင်းစတဲ့ Cardio Activities တွေကိုလည်း လုပ်ဆောင်နိုင်ပါတယ်။

(၃) နည်းစနစ် အမှန်ကို လေ့လာပါ

Photo : Men’s Health

ပြေးတာပဲဖြစ်ဖြစ် ၊ အလေးမ တာပဲဖြစ်ဖြစ် နည်းစနစ်မှားနေရင် လေ့ကျင့်ခန်းလုပ်သလောက် အကျိုးရှိမှာ မဟုတ်သလို ထိခိုက်ဒဏ်ရာ ရနိုင်ခြေပိုများပါတယ်။ အထူးသဖြင့် ကွီးတို့လုပ်နေတဲ့ လေ့ကျင့်ခန်းအစီအစဉ်က ကွီးတို့အတွက် သက်တောင့်သက်သာမဖြစ်ပဲ ဆိုးကျိုးတစ်စုံတစ်ရာ သက်ရောက်နေစေမယ်ဆိုရင် နည်းစနစ်ပိုင်း မှားယွင်းမှုနဲ့ လိုအပ်ချက်တစ်စုံတစ်ရာ ရှိနေတယ်ဆိုတာ ခန့်မှန်းသိနိုင်ပါတယ်။ အကောင်းဆုံးကတော့ Gym ကစားတဲ့သူတွေဆိုရင် ကျွမ်းကျင်တဲ့ Trainers တွေ ၊ Fitness Staff တွေဆီကနေ မှန်ကန်တဲ့ အားကစားဆိုင်ရာ နည်းစနစ်တွေကို မေးမြန်းပါ။ ဒါမှမဟုတ် Fitness Magazines နဲ့ အားကစား ဝက်ဘ်ဆိုဒ်တွေကနေလည်း လေ့ကျင့်ခန်းတစ်ခုချင်းစီအတွက် မှန်ကန်တဲ့ နည်းစနစ်နဲ့ လေ့ကျင့်ခန်းလုပ်နည်း ဗီဒီယိုတွေရှာဖွေ ကြည့်နိုင်ပါတယ်။

(၄) လောင်စာဖြည့်တင်းပါ

Photo : Freepik

လေ့ကျင့်ခန်းလုပ်ချိန်မှာ ခွန်းအားနဲ့ စွမ်းရည်ပြည့်ဝနေဖို့အတွက် လောင်စာဖြည့်တင်းဖို့ လိုပါတယ်။ အားကစား လုပ်သူတွေအတွက် အဓိက လောင်စာကတော့ ကျန်းမာရေးနဲ့ ညီညွှတ်တဲ့ စားစရာတွေနဲ့ သောက်စရာတွေပါပဲ။ လေ့ကျင့်ခန်းမလုပ်မီ ကာဗိုဟိုက်ဒရိတ် ( ဖျော်ရည်၊ သစ်သီး သို့မဟုတ် ဒိန်ချဉ်) စတဲ့အစားအသောက်တွေစားပေးပါ။ အချိန်ကြာကြာ ပြင်းထန်တဲ့လေ့ကျင့်ခန်းတွေ လုပ်ပြီးချိန်မှာ မြေပဲထောပတ် ၊ အသားညှပ်ပေါင်မုန့် သို့မဟုတ် ပရိုတင်း ဖျော်ရည်တွေ စားသုံးနိုင်ပါတယ်။ အဆာပြေအနေနဲ့ ပန်းသီး ၊ မြေပဲထောပတ်၊ ဒိန်ချဉ်၊ အခွံမာသီး ၊ ဂျုံကြမ်းပေါင်မုန့်နဲ့ ကြက်ဥပြုတ်တို့ စားလို့ရပါတယ်။ အလားတူ ခန္ဓာကိုယ်အတွက် အရေးကြီးတဲ့ ရေဓာတ်ပမာဏကိုလည်း လုံလုံလောက်လောက် ဖြည့်တင်းပေးဖို့ လိုပါတယ်။ လေ့ကျင့်ခန်းမလုပ်မီ နှစ်နာရီမှာ ပုံမှန် ရေ ၂ ခွက်ကနေ ၃ ခွက်ခန့် သောက်ပါ။ လေ့ကျင့်ခန်း လုပ်နေစဉ် ၁၀ – ၂၀ မိနစ် အတွင်းမှာ ရေအနည်းငယ် သောက်ပေးနိုင်ပါတယ်။ လေ့ကျင့်ခန်းလုပ်ပြီးချိန်မှာလည်း ရေလုံလုံလောက်လောက် သောက်ပေးဖို့ မမေ့ပါနဲ့။

(၅) ဆရာဝန်ရဲ့ ထောက်ခံချက်ရယူပါ

Photo : TheBodyPro

ဒီအချက်ကတော့ အသက် ၄၅ နှစ်နဲ့အထက်မှ အားကစား စလုပ်မယ့် အမျိုးသားတွေအတွက် ရည်ရွယ်ပါတယ်။ အသက်ကြီးပိုင်းအရွယ်မှ လေ့ကျင့်ခန်းစလုပ်မယ်ဆိုရင် အရင်ဆုံး ဆရာဝန်နဲ့ ဆွေးနွေးတိုင်ပင်ပြီး ထောက်ခံချက် ရယူသင့်ပါတယ်။ ကျန်းမာရေး ပြဿနာတစ်ခုခုရှိပါက သို့မဟုတ် ပုံမှန်ဆေးတစ်မျိုးမျိုး မှီဝဲနေရပါက ဆရာဝန်နဲ့ ပြသအကြံဉာဏ်တောင်းပြီးမှ သင့်လျော်တဲ့ လေ့ကျင့်ခန်းအစီအစဉ်ကို ပြုလုပ်တာ ပိုကောင်းပါတယ်။ ပင်ပန်းနွမ်းနယ်ခြင်းနဲ့ ဒဏ်ရာအနာတရ ရနိုင်ခြင်းကို လျော့ချနိုင်ဖို့ တစ်ပတ်ကို ၃ ရက် တစ်ကြိမ်ကို ၁၀ -၁၅ မိနစ် လေ့ကျင့်ခန်း လုပ်နိုင်ပါတယ်။ ခံနိုင်စွမ်းအားပေါ်မူတည်ပြီး လေ့ကျင့်ခန်းလုပ်တဲ့ ရက်နဲ့ အချိန်ကို တိုးသွားနိုင်ပါတယ်။

Featured Photo : Forbes