မနက်အိပ်ယာနိုးနိုးကို လေ့ကျင့်ခန်းပြုလုပ်ချင်းနဲ့ စတင်မယ်ဆိုရင် သက်ရှည်ကျန်းမာရုံသာမက တစ်နေ့တာဖြတ်သန်းမှုမှာလည်းကောင်းကျိုးတွေများစွာရရှိစေပါတယ်။လေ့ကျင့်ခန်းပြုလုပ်ခြင်းကြောင့် စိတ်ကြည်လင်လန်းဆန်းခြင်း ၊ ကိုယ်လက်ပေါ့ပါးခြင်း ၊ စိတ်ဖိစီးမှု ကင်းခြင်း စတဲ့ကောင်းကျိုးတွေကိုခံစားရစေမှာဖြစ်ပါတယ်။ဒါဆိုရင် မနက်ခင်းမှာပေါ့ပေါ့ပါးပါးနဲ့လုပ်ဆောင်ရလွယ်ကူတဲ့ လေ့ကျင့်ခန်းတွေကိုပြောပြပေးချင်ပါတယ်။
(၁) ခပ်သွက်သွက်လမ်းလျောက်ပါ
Source : Verywell Fit
မနက်ခင်းမှာလတ်ဆတ်တဲ့လေကောင်းလေသန့်ကိုရှုရှိုက်ရင်း လမ်းလျောက်ရတာဟာ ခန္ဓာကိုယ်အတွက်တကယ့်ကို အကျိုးရှိစေတဲ့ လေ့ကျင့်ခန်းတစ်ခုပါ။ လမ်းလျောက်ခြင်းနဲ့ အတူ လေကောင်းလေသန့်ကိုပါရှုရှိုက်တဲ့ အောက်စီဂျင်လုံလောက်စွာရရှိပြီး သွေးလည်ပတ်မှုကိုပိုမိုကောင်းမွန်လာစေမှာဖြစ်ပါတယ်။ဒါ့အပြင်ခေါင်းကြည်ခြင်း ၊ စိတ်ဖိစီးမှုလျော့ကျစေခြင်း ၊ ကိုယ်အလေးချိန်ကျစေခြင်း စတဲ့ကောင်းကျိုးတွေရရှိစေတာကြောင့် မနက်ခင်းမှာ မိနစ် (၂၀) လောက်အချိန်ပေးပြီး လမ်းလျောက်လေ့ကျင့်ခန်းပြုလုပ်ပေးပါ။
(၂) အိပ်ထမတင်ပြုလုပ်ပါ
Source : trainbodyandmind.com
အသက်အရွှယ်ရလာတာနဲ့ အမျှအမျိုးသားတွေရဲ့ ဝမ်းဗိုက်မှာအဆီတွေစုလာတက်ပြီး လူအများပြောတဲ့ ဘီယာဗိုက်ဖြစ်လာတက်ပါတယ်။ဒီလိုဝမ်းဗိုက်တစ်ဝိုက်ကမလိုအပ်တဲ့ အဆီတွေကို ဖယ်ရှားပေးနိုင်ဖို့ အကောင်းဆုံးလေ့ကျင့်ခန်းတစ်ခုက အိပ်ထမတင်ပြုလုပ်ခြင်းပါ။အဆိုပါအိပ်ထမတင်လေ့ကျင့်ခန်းကိုပြုလုပ်ခြင်းအားဖြင့် ဝမ်းဗိုက်အဆီတွေကိုလောင်ကျွမ်းစေရုံသာမက ဝမ်းဗိုက်ကြွက်သားတွေကိုသိသိသာသာသန်မာလာစေမှာဖြစ်ပါတယ်။ အိပ်ထမတင်လေ့ကျင့်ခန်းဟာ မိမိရဲ့ အိပ်ခန်းအတွင်းမှာပဲ လွယ်ကူစွာလုပ်နိုင်သလို အချိန်လည်းအများကြီးမပေးရတဲ့အတွက် ပုံမှန်ပြုလုပ်ပေးသင့်တဲ့လေ့ကျင့်ခန်းတစ်ခုဖြစ်ပါတယ်။
(၃) စက်ဘီးစီးပါ
Source : trainbodyandmind.com
မနက်ခင်းမှာ အေးချမ်းသာယာလှတဲ့ သဘာဝအရသာကိုခံစားရင်း လေ့ကျင့်ခန်းလုပ်ချင်တဲ့သူတွေအတွက်တော့စက်ဘီးစီးတဲ့လေ့ကျင့်ခန်းကအကောင်းဆုံးလို့ ညွန်းဆိုချင်ပါတယ်။စက်ဘီးစီးလေ့ကျင့်ခန်းဟာ ခြေသလုံးနဲ့ ပေါင်တံတစ်လျောက်က ကြွက်သားတွေကို သန်မာလာစေတဲ့အပြင် အဆီကျလှပစေပြီး သက်လုံလည်းကောင်းစေမှာဖြစ်ပါတယ်။တစ်နေ့ကို နာရီဝက်ခန့်စက်ဘီးစီးခြင်းဖြင့် စိတ်ဖိစီးမှုတွေကို လျော့ကျစေကာ ကျန်းမာပျော်ရွှင်တဲ့နေ့ရက်တွေကို ပိုင်ဆိုင်နိုင်မှာဖြစ်ပါတယ်။
(၄) ဒိုက်ထိုးပါ
Source : Shutterstock
အားကစားလုပ်ဖို့အချိန်အများကြီးမပေးနိုင်တဲ့ သူတွေအနေနဲ့ မနက်ခင်းရုံးမသွားမှီ ရေချိုးခါနီးအချိန်မှာ ဒိုက်ထိုးလေ့ကျင့်ခန်းကိုပြုလုပ်ပေးနိုင်ပါတယ်။ဒိုက်ထိုးလေ့ကျင့်ခန်းက ခန္ဓကိုယ်အပေါ်ပိုင်းကြွက်သားတွေအတွက် အထိရောက်ဆုံးလေ့ကျင့်ခန်းတစ်ခုဖြစ်ပြီး ရင်ဘက် ၊ လက်မောင်းနဲ့ နောက်ကျောဘက်ကြွက်သားတွေကိုသန်မာလာစေမှာဖြစ်ပါတယ်။ပုံမှန်အားဖြင့် တစ်ရက်မှာ ဒိုက်ထိုးလေ့ကျင့်ခန်းကို (၂၀) ကြိမ် ၄ ကျော့လောက်ပြုလုပ်ပေးသင့်ပြီး အခုမှစလုပ်မယ့်သူတွေအနေနဲ့ ကတော့ (၁၀) ကြိမ် ၄ ကျော့လောက်စတင်လုပ်ဆောင်ပေးနိုင်ပါတယ်။နောက်မှလုပ်နိုင်တဲ့အနေအထားပေါ်မူတည်ပြီး အကြိမ်ရေတိုးမြင့်လုပ်ဆောင်နိုင်ပါတယ်။
